‘લગ્ન કરતાં લિવ-ઇન રિલેશનશિપ સારી’, ‘બાહુબલી’ ફેમ રામ્યા કૃષ્ણને પતિ સાથેના સંબંધને તોડ્યું મૌન

Rudra
4 Min Read

નવી દિલ્હી: ‘બાહુબલી’ ફેમ અભિનેત્રી રામ્યા કૃષ્ણન અને ડિરેક્ટર કૃષ્ણા વંશી અલગ થઈ ગયાં હોવાની અટકળો છેલ્લા ઘણા વર્ષોથી ચાલી રહી છે. બંને અલગ-અલગ શહેરોમાં રહેતાં હોવાથી આ અફવાઓને વધુ વેગ મળતો રહ્યો છે. જોકે, તાજેતરમાં એક પોડકાસ્ટમાં વાતચીત દરમિયાન રામ્યાએ આ તમામ અટકળો પર મૌન તોડ્યું છે. તેમણે સ્પષ્ટ કર્યું છે કે તેઓ આજે પણ સાથે છે. આ દરમિયાન તેમણે એવું પણ કહ્યું કે લગ્ન કરતાં લિવ-ઇન રિલેશનશિપ વધુ સારો વિકલ્પ છે.

‘રૉ ટોક્સ વિથ વીકે’ પોડકાસ્ટમાં વાતચીત દરમિયાન જ્યારે રામ્યા કૃષ્ણનને તેમના લગ્નજીવન અંગે ચાલી રહેલી અટકળો વિશે સવાલ કરવામાં આવ્યો, ત્યારે તેમણે સ્પષ્ટ શબ્દોમાં પોતાનો જવાબ આપ્યો હતો. રામ્યાએ કહ્યું, ‘અમે આજે પણ 100 ટકા પરિણીત છીએ. બસ એટલો જ ફરક છે કે અમે અમારી અનુકૂળતા અને ખુશી પ્રમાણે બે અલગ-અલગ શહેરોમાં રહીએ છીએ. જ્યારે મેં એક ટીવી શોનું શૂટિંગ શરૂ કર્યું હતું, ત્યારે મારો દીકરો મોટો થઈ રહ્યો હતો અને અમે હૈદરાબાદમાં રહેતાં હતાં.’

તેમણે વધુમાં જણાવ્યું હતું કે, ‘તેલંગાણા આંદોલન દરમિયાન હું દર 15 દિવસે ચેન્નાઈ આવતી અને ત્યારબાદ પાછી જતી હતી. તે સમયે હડતાળ અને શાળાઓ બંધ રહેવાને કારણે મારા અને મારા દીકરા બંને માટે પરિસ્થિતિ ખૂબ જ તણાવપૂર્ણ બની જતી હતી. જ્યારે પણ હું શહેરની બહાર જતી ત્યારે મારો દીકરો બીમાર પડી જતો હતો. આખરે બાળકના હિતને ધ્યાનમાં રાખીને મેં તેને ચેન્નાઈની એક શાળામાં દાખલ કરવાનો નિર્ણય લીધો હતો.’

રામ્યાએ લગ્નને ગણાવ્યા ઓવરરેટેડ

રામ્યા કૃષ્ણને લગ્નને ઓવરરેટેડ ગણાવતાં કહ્યું હતું કે તેમને કૃષ્ણા વંશી સાથે લગ્ન કરવાને બદલે લિવ-ઇનમાં જ રહેવું જોઈતું હતું. તેમણે કહ્યું, ‘મને લાગે છે કે કોઈપણ સંબંધમાં લગ્ન એક ઓવરરેટેડ પ્રક્રિયા છે અને જ્યારે ખરેખર તેની જરૂર હોય ત્યારે જ લગ્ન થવાં જોઈએ. હકીકતમાં વંશી હંમેશાં કહેતા હતા કે લગ્ન કરવાની શું જરૂર છે, ચાલો સાથે લિવ-ઇનમાં રહીએ.’

તેમણે વધુમાં કહ્યું, ‘કદાચ તે સમયે મારે તેમની વાત માની લેવી જોઈતી હતી. મારું માનવું છે કે લગ્નમાં બંને પરિવારો અને આસપાસના ઘણા લોકો જોડાઈ જાય છે. તેના કારણે તમે તમારા પાર્ટનર કરતાં સમગ્ર સંબંધ પ્રત્યે વધુ જવાબદાર બની જાઓ છો. મારો કહેવાનો અર્થ એ છે કે તેમની સાથે મારો સંબંધ એકદમ પરફેક્ટ છે અને હંમેશાં આવો જ રહેશે.’

અલગ રહેવાને કારણે જ લગ્નજીવન ટકી રહ્યું છે?

રામ્યાએ મજાકિયા અંદાજમાં કહ્યું હતું કે કદાચ તેમનું લગ્નજીવન આજે પણ એટલા માટે ટકી રહ્યું છે કારણ કે તેઓ બંને અલગ-અલગ રહે છે. તેમણે એ પણ સ્વીકાર્યું કે સતત ઝઘડતા રહેવાને બદલે હવે બંને સારા મિત્રો બની ગયાં છે. રામ્યાએ જણાવ્યું હતું કે તેમના પતિનો દિવસ સિનેમાથી શરૂ થાય છે અને સિનેમા પર જ પૂરો થાય છે.

તેમણે એક રસપ્રદ કિસ્સો પણ શેર કર્યો હતો. રામ્યાએ ખુલાસો કર્યો કે વર્ષો પહેલાં જ્યારે તેમણે કૃષ્ણાની ફિલ્મ ‘શ્રી અંજનેયમ’ના બીજા ભાગની ટીકા કરી હતી, ત્યારથી કૃષ્ણાએ પોતાનું કામ રામ્યા સાથે શેર કરવાનું બંધ કરી દીધું હતું. હવે બંને પોતપોતાની દુનિયામાં ખુશ રહેવાનું પસંદ કરે છે.

‘જેલર 2’માં જોવા મળી હતી રામ્યા કૃષ્ણન

વર્કફ્રન્ટની વાત કરીએ તો રામ્યા કૃષ્ણન છેલ્લે સુપરસ્ટાર રજનીકાંતની બ્લોકબસ્ટર ફિલ્મ ‘જેલર 2’માં જોવા મળ્યાં હતાં. આગામી સમયમાં તેમની પાસે ‘રાકા’, ‘શ્રી શ્રી’, ‘પોકેટ નોવેલ’ અને ‘તેરા યાર હૂં મૈં’ જેવી અનેક મોટી ફિલ્મો છે. આ ઉપરાંત તાજેતરમાં તેઓ ‘બિગ બોસ 10 તમિલ’માં ગેસ્ટ હોસ્ટ તરીકે પણ જોવા મળ્યાં હતાં.

Share This Article