Gujarat : ભારતના લોખંડી પુરુષ સરદાર વલ્લભભાઈ પટેલની જન્મજયંતિ નિમિત્તે 31 ઓક્ટોબર, 2026ના રોજ ઉજવનારા રાષ્ટ્રીય એકતા દિવસ (એકતા દિવસ)ની તૈયારીઓ અંતર્ગત ગુજરાતના એકતાનગરમાં વિશેષ રાષ્ટ્રીય એકતા શિબિર (SNIC)નું આયોજન કરવામાં આવ્યું છે. આ શિબિરમાં દેશભરની તમામ 17 NCC ડિરેક્ટોરેટ્સનું પ્રતિનિધિત્વ કરતા 200 પસંદગીના નેશનલ કેડેટ કોર્પ્સ (NCC) કેડેટ્સ ભાગ લઈ રહ્યા છે.
‘એક ભારત, શ્રેષ્ઠ ભારત’ની ભાવનાને સાકાર કરવાનો પ્રયાસ
સ્ટેચ્યુ ઑફ યુનિટી માટે વિશ્વભરમાં જાણીતા એકતાનગરમાં આયોજિત આ શિબિરનો મુખ્ય ઉદ્દેશ્ય યુવાનોમાં રાષ્ટ્રીય એકતા, શિસ્ત, નેતૃત્વ અને સાંસ્કૃતિક સમન્વયની ભાવનાને વધુ મજબૂત બનાવવાનો છે. ‘એક ભારત, શ્રેષ્ઠ ભારત’ની થીમ હેઠળ કેડેટ્સ વિવિધ રાજ્યોની ભાષા, પરંપરા, લોકસંસ્કૃતિ અને જીવનશૈલીને જાણીને પરસ્પર સૌહાર્દ અને એકતાનો સંદેશ આપી રહ્યા છે.
શારીરિક તાલીમથી વ્યક્તિત્વ વિકાસ સુધીની પ્રવૃત્તિઓ
શિબિરમાં કેડેટ્સને શારીરિક અને માનસિક રીતે સક્ષમ બનાવવા માટે વિવિધ તાલીમ સત્રો યોજાઈ રહ્યાં છે. દરરોજ વહેલી સવારે શારીરિક તાલીમ (PT), પરેડ ડ્રિલ અને યોગ દ્વારા કેડેટ્સમાં શિસ્ત, સહનશક્તિ, એકાગ્રતા અને ટીમવર્કના ગુણો વિકસાવવામાં આવી રહ્યા છે.
આ ઉપરાંત, નેતૃત્વ કૌશલ્ય, નૈતિક નિર્ણયશક્તિ, જાહેર વક્તવ્ય અને કટોકટી વ્યવસ્થાપન જેવા વિષયો પર વિશેષ વર્કશોપ તથા નિષ્ણાતોનાં વ્યાખ્યાનો યોજાઈ રહ્યાં છે. આ પ્રવૃત્તિઓ દ્વારા કેડેટ્સને જવાબદાર નાગરિક અને ભવિષ્યના સક્ષમ નેતા બનવા માટે પ્રેરિત કરવામાં આવી રહ્યા છે.
વિવિધતામાં એકતાનું જીવંત ઉદાહરણ બનશે NCC કેડેટ્સ
શિબિર દરમિયાન વિવિધ રાજ્યોમાંથી આવેલા કેડેટ્સ એકબીજાની સંસ્કૃતિ, ભાષા, લોકકથાઓ અને પરંપરાઓ વિશે જાણીને રાષ્ટ્રીય એકતાના બંધનને વધુ મજબૂત બનાવી રહ્યા છે. વિવિધ પૃષ્ઠભૂમિ ધરાવતા આ યુવાનો એક મંચ પર એકત્રિત થઈને ભારતની સાંસ્કૃતિક વિવિધતામાં રહેલી એકતાનું જીવંત ઉદાહરણ પૂરું પાડી રહ્યા છે.
31 ઓક્ટોબરે એકતા દિવસની પરેડમાં લેશે ભાગ
શિબિરનો મુખ્ય ઉદ્દેશ્ય 31 ઓક્ટોબર, 2026ના રોજ યોજાનારી એકતા દિવસની મુખ્ય પરેડ અને સાંસ્કૃતિક કાર્યક્રમો માટે કેડેટ્સને તૈયાર કરવાનો છે. આ પ્રસંગે NCC કેડેટ્સ દ્વારા શિસ્તબદ્ધ માર્ચિંગ, રાષ્ટ્રીય એકતાને ઉજાગર કરતી પ્રસ્તુતિઓ અને સરદાર વલ્લભભાઈ પટેલને શ્રદ્ધાંજલિ અર્પણ કરતી વિવિધ પ્રવૃત્તિઓમાં ભાગ લેવાની તૈયારી કરવામાં આવી રહી છે.
સ્ટેચ્યુ ઑફ યુનિટી ખાતે યોજાનારા આ રાષ્ટ્રીય મહત્ત્વના કાર્યક્રમમાં યુવાનોની શિસ્ત, સમર્પણ અને દેશભક્તિનું પ્રદર્શન જોવા મળશે. એકતાનગરમાં ચાલી રહેલી આ વિશેષ શિબિર ‘એક ભારત, શ્રેષ્ઠ ભારત’ના સંકલ્પને વધુ મજબૂત બનાવવાની સાથે દેશની યુવા શક્તિમાં રાષ્ટ્રીય એકતાનો સંદેશ પ્રસરાવશે.
