અમદાવાદ : ગુજરાતી મનોરંજન જગતમાં અભિનેત્રી અને ડાન્સર મેઘના સંઘાણી ‘ઘેરદાર ઘમ્મરિયા’ નામના નવા ગુજરાતી ગરબા સોંગ સાથે નવરાત્રિ દરમિયાન દર્શકો સમક્ષ નવા અંદાજમાં આવી રહી છે.
પિક્સેલ પોપ મીડિયા દ્વારા તૈયાર કરવામાં આવેલું અને સારેગામાના પ્લેટફોર્મ પર રજૂ થયેલું આ ગીત મેઘનાની કલાત્મક સફરનું મહત્વપૂર્ણ પગલું છે. ગીતમાં તેનો અભિનય, ડાન્સ, અભિવ્યક્તિ અને સ્ક્રીન પ્રેઝન્સ મુખ્ય આકર્ષણ બની રહ્યા છે. પરંપરાગત ગરબાની ઊર્જાને આધુનિક સંગીત અને ભવ્ય વિઝ્યુઅલ્સ સાથે રજૂ કરવામાં આવ્યું છે. ગુજરાતી સંસ્કૃતિની ઝલક સાથે યુવા પેઢીને આકર્ષે તેવી આધુનિક રજૂઆત ગીતમાં જોવા મળે છે.
મેઘના સંઘાણીએ જણાવ્યું હતું કે, “‘ઘેરદાર ઘમ્મરિયા’ મારા માટે માત્ર એક ગીત નથી, પરંતુ મારા જીવનની એક નવી શરૂઆત છે. ડાન્સ અને અભિનય હંમેશાંથી મારા દિલની ખૂબ નજીક રહ્યાં છે અને હવે તેને મોટા સ્તરે દર્શકો સમક્ષ રજૂ કરવાની તક મળી છે.”
તેમણે ઉમેર્યું હતું કે નવરાત્રિ અને ગરબા સાથે ગુજરાતીઓનું ખાસ ભાવનાત્મક જોડાણ હોવાથી આ ગીત સાથે પોતાની નવી સફરની શરૂઆત થવી તેમના માટે ખાસ છે. તેમણે પ્રિન્સ ગુપ્તા સાથેના અનુભવ તેમજ જ્હાનવી શ્રીમાંકર, કેદાર-ભાર્ગવ અને પાર્થ તારપરા સહિતની ટીમના યોગદાનને પણ યાદ કર્યું હતું. પિક્સેલ પોપ મીડિયાના ડિરેક્ટર અક્ષય સિંગએ જણાવ્યું હતું કે, “‘ઘેરદાર ઘમ્મરિયા’ને ભવ્ય અને યાદગાર ગરબા સોંગ તરીકે રજૂ કરવાનો પ્રયાસ કરવામાં આવ્યો છે. મેઘનાએ પોતાના અભિનય, નૃત્ય અને અભિવ્યક્તિ દ્વારા ગીતની ઊર્જાને સુંદર રીતે સ્ક્રીન પર રજૂ કરી છે.”
ગીતનું ડાયરેક્શન અને કોરિયોગ્રાફી પ્રિન્સ ગુપ્તા, જ્યારે ગાયન જ્હાનવી શ્રીમાંકરનું છે. કેદાર-ભાર્ગવે સંગીત આપ્યું છે અને પાર્થ તારપરાએ ગીતના શબ્દો લખ્યા છે. ‘ઘેરદાર ઘમ્મરિયા’ સાથે મેઘના સંઘાણી ગુજરાતી મનોરંજન જગતમાં પોતાની કલાત્મક સફરના નવા અધ્યાયની શરૂઆત કરી રહી છે. ગરબાની પરંપરા, ગુજરાતી સંસ્કૃતિ અને આધુનિક મ્યુઝિક-વિઝ્યુઅલ્સના સંગમ સાથે તૈયાર થયેલું આ ગીત નવરાત્રિ દરમિયાન દર્શકો માટે ખાસ આકર્ષણ બની શકે છે.
