Hayden Panettiere: હોલિવૂડ એક્ટ્રેસ વિશે સામાન્ય રીતે એવી ધારણા હોય છે કે તેમની લાઇફ ખૂબ જ એક્સાઇટિંગ અને દુઃખોથી પર હોય છે. બેશુમાર પૈસા હોય અને દુનિયાની દરેક સુખ-સુવિધા તેમની પાસે ઉપલબ્ધ હોય. પરંતુ તેમના દુઃખ અને સંઘર્ષ વિશે બહુ ઓછા લોકો જાણી શકે છે. બાળ કલાકાર તરીકે કરિયરની શરૂઆત કરનાર હેડન પેનેટિયર હોલિવૂડના જાણીતા ચહેરાઓમાંની એક હતી. જોકે, માત્ર 36 વર્ષની ઉંમરે તેમનું નિધન થયું.
‘હીરોઝ’ અને ‘નૅશવિલ’ જેવા શોમાં પોતાની ભૂમિકાઓ માટે જાણીતી હોલિવૂડ એક્ટ્રેસ હેડન પેનેટિયરના નિધનની પહેલી જાણકારી તેમના એક પરિચિતે પોલીસને આપી હતી. પોલીસના જણાવ્યા અનુસાર, ગઈકાલે બપોરે 911 પર કોલ આવ્યો હતો, જેમાં જણાવવામાં આવ્યું હતું કે હેડનને હલાવવા છતાં તે કોઈ જવાબ આપી રહી નહોતી. પોલીસ અને પેરામેડિક્સ સાઉથ કેરોલિનાના ગ્રીનવિલે સ્થિત તેમના એપાર્ટમેન્ટ બ્લોકમાં પહોંચ્યા હતા. તેમણે હેડનને બચાવવાના પ્રયાસો કર્યા, પરંતુ સ્થળ પર જ તેને મૃત જાહેર કરવામાં આવ્યા.
36 વર્ષની આ સ્ટારે બાળપણમાં જ એક્ટિંગની શરૂઆત કરી હતી. તેમણે સોપ ઓપેરામાં પણ કામ કર્યું હતું. ત્યારબાદ વર્ષ 2000ની સ્પોર્ટ્સ ડ્રામા ફિલ્મ ‘રિમેમ્બર ધ ટાઇટન્સ’માં ડેન્ઝલ વોશિંગ્ટન સાથેની ભૂમિકા અને પિક્સરની 1998ની ફિલ્મ ‘અ બગ્સ લાઇફ’માં ડોટના પાત્રને આપેલા અવાજથી તેને ખાસ ઓળખ મળી હતી.
ત્યારબાદ પેનેટિયરને સુપરહીરો ડ્રામા ‘હીરોઝ’માં ચીયરલીડર ક્લેર બેનેટની ભૂમિકા ભજવીને મોટી લોકપ્રિયતા મળી. ત્યારબાદ તેણે ‘નૅશવિલ’માં છ સીઝન સુધી કન્ટ્રી સિંગર જુલિયટ બાર્ન્સની ભૂમિકા ભજવી હતી. આ શો માટે તેને બે વખત બેસ્ટ સપોર્ટિંગ એક્ટ્રેસ તરીકે ગોલ્ડન ગ્લોબ માટે નોમિનેશન મળ્યું હતું. જ્યારે તેમના ગીતોએ US બિલબોર્ડ હોટ કન્ટ્રી સોંગ્સ ચાર્ટમાં 11 વખત સ્થાન મેળવ્યું હતું. પેનેટિયરની ફિલ્મોમાં 2006ની ‘બ્રિંગ ઇટ ઓન: ઓલ ઓર નથિંગ’, કોમેડી-ડ્રામા ફિલ્મ ‘રેઝિંગ હેલેન’ અને ‘સ્ક્રીમ 4’ તથા ‘સ્ક્રીમ VI’માં કિર્બી રીડની ભૂમિકાનો સમાવેશ થાય છે.
આ વર્ષની શરૂઆતમાં પ્રકાશિત થયેલા પોતાના મેમોયરમાં પેનેટિયરે માનસિક સ્વાસ્થ્ય સાથે જોડાયેલી મુશ્કેલીઓ, પોતાના નાના ભાઈ જાનસેનના નિધન અને વર્ષ 2018માં પોતાની પુત્રી કાયાની સંપૂર્ણ કસ્ટડી પૂર્વ પાર્ટનર વ્લાદિમીર ક્લિટ્સ્કોને સોંપવાના નિર્ણય વિશે ખુલ્લીને વાત કરી હતી. મે મહિનામાં પુસ્તકના પ્રકાશન બાદ પોડકાસ્ટર જય શેટ્ટી સાથેની વાતચીતમાં તેણે કહ્યું હતું, “આ વિચારવું પણ દિલ તોડી નાખે છે કે કોઈ એવું વિચારી શકે કે હું બસ મારી બાળકીને કોઈ બીજાને સોંપી દઉં અને તેનાથી મને કોઈ ફરક ન પડે. આ વાત સત્યથી બિલકુલ દૂર છે.”
પેનેટિયરે જણાવ્યું હતું કે જ્યારે તેઓ નશાની લત અને માનસિક સ્વાસ્થ્ય સાથે જોડાયેલી સમસ્યાઓ સામે ઝઝૂમી રહી હતી, ત્યારે તેની પુત્રી નાની ઉંમરથી જ પોતાના પિતા સાથે રહેતી હતી. પેનેટિયરની કાયા નામની 11 વર્ષની પુત્રી છે. પુત્રીના જન્મ સમયે હેડનની સ્થિતિ ખૂબ જ ગંભીર બની ગઈ હતી. બાદમાં તેણે પોતાની પુત્રીની સંપૂર્ણ કસ્ટડી પોતાના પૂર્વ મંગેતર અને યુક્રેનિયન બોક્સર વ્લાદિમીર ક્લિટ્સ્કોને સોંપી દીધી હતી. તેણે કહ્યું હતું, “હું માનસિક સ્વાસ્થ્ય, એન્ઝાયટી અને પોસ્ટપાર્ટમ સમસ્યાઓથી ઝઝૂમી રહી હતી. આ બધાની વચ્ચે મારે સામાન્ય દેખાવાનો ઢોંગ કરવો પડતો હતો અને મને એવું લાગતું હતું કે જાણે મેં પોતાને સંપૂર્ણપણે ગુમાવી દીધી હોય.”
પેનેટિયરે પોતાના નિધન પહેલાં આપેલા અંતિમ ઇન્ટરવ્યૂઝમાંથી એકમાં નશાની લત સામે ઝઝૂમતી વખતે પોતાની પુત્રીની કસ્ટડી છોડવા અંગે પણ વાત કરી હતી. જુલાઈના કવર માટે પેરેન્ટિંગ આઉટલેટ ‘Mome’ને આપેલા ઇન્ટરવ્યૂમાં તેમણે પોતાની પુત્રી કાયાના જીવલેણ જન્મ અને અંતે ક્લિટ્સ્કોને કસ્ટડી સોંપવાના નિર્ણય વિશે વાત કરી હતી.
નશાની લત સામે ઝઝૂમતી વખતે વર્ષ 2018માં એક્ટ્રેસે પોતાની પુત્રીની કસ્ટડી ક્લિટ્સ્કોને સોંપવાનો નિર્ણય લીધો હતો. તે સમયે ક્લિટ્સ્કો પેનેટિયર સાથે એક જ દેશમાં રહેતા નહોતા. તેમણે કહ્યું હતું, “આ એવો નિર્ણય નહોતો જે મેં હળવાશથી લીધો હોય અને ન તો એવો નિર્ણય હતો જે હું લેવા માંગતી હતી. હું મારી જિંદગીના ખૂબ જ મુશ્કેલ તબક્કામાંથી પસાર થઈ રહી હતી. મને ખબર હતી કે મારે તેને પ્રાથમિકતા આપવી પડશે, જેથી હું જરૂરી મદદ મેળવી શકું અને એવી માતા બની શકું જેવી તેને જરૂર હતી.”
વર્ષ 2014માં પુત્રીને જન્મ આપ્યા બાદ પેનેટિયરને ખૂબ જ વધારે બ્લીડિંગ એટલે કે હેમરેજ થયું હતું. ત્યારબાદ તેમને સાત વખત બ્લડ ટ્રાન્સફ્યુઝન કરાવવું પડ્યું હતું અને જે નસોએ કામ કરવાનું બંધ કરી દીધું હતું તેને સુધારવા માટે સર્જરી પણ કરાવવી પડી હતી. તેણે કહ્યું હતું, “મેં મારી આંખો બંધ કરી અને બસ મારી દીકરી ઠીક રહે તેવી પ્રાર્થના કરી. જો મારો સમય આવી ગયો હોત તો હું જવા માટે તૈયાર હતી. કાયાનું સુરક્ષિત અને સ્વસ્થ રહેવું જ સૌથી મહત્વનું હતું.”
જોકે, થોડા દિવસો બાદ જ્યારે તેઓ પોતાની પુત્રીને જોઈ રહી હતી ત્યારે તેને “કંઈ જ અનુભવાયું નહીં” અને તેમને પોસ્ટનેટલ ડિપ્રેશન થઈ ગયું. ત્યારબાદ એક્ટ્રેસે દારૂ પીવાનું શરૂ કર્યું. તેમણે કહ્યું હતું, “મેં વાઇન પીવાનું શરૂ કર્યું, જે આખરે દારૂની લતમાં ફેરવાઈ ગયું. આ રીતે હું દરરોજ પસાર કરતી હતી.” જોકે તેણે સારવાર કરાવી હતી, પરંતુ પેનેટિયરને લાગ્યું હતું કે દારૂ પીવા પાછળનું “વાસ્તવિક કારણ” એટલે કે ડિપ્રેશનની યોગ્ય સારવાર થઈ શકી નહોતી. તેમણે કહ્યું હતું, “કાશ તે સમયે વધુ લોકોને ખબર હોત કે આ શું છે. કદાચ મદદ મેળવવા માટે મેં આટલો સમય રાહ ન જોઈ હોત.”
પુત્રીની કસ્ટડી છોડ્યાના છ વર્ષ બાદ પેનેટિયરે પોતાની દીકરી સાથેના હાલના સંબંધ વિશે પણ વાત કરી હતી. હેડને કહ્યું હતું, “હું મારી દીકરીને ખૂબ પ્રેમ કરું છું અને તે જે પ્રકારની યુવતી બની રહી છે તેના પર મને ખૂબ ગર્વ છે. હું તેની સાથે હંમેશા વાત કરું છું અને મને તેની સાથે ખૂબ જ જોડાણ અનુભવાય છે. તે બિલકુલ મારી નાની કોપી જેવી છે.”
એક્ટ્રેસે આગળ કહ્યું હતું કે, “મને કેવું પણ લાગ્યું હોય કે મેં કંઈ પણ અનુભવ્યું હોય, મેં હંમેશા તેને જ પ્રાથમિકતા આપી છે.” તેમને આશા હતી કે એક દિવસ કાયા તેમની કહાની સમજશે અને એ પણ સમજશે કે તેઓ દરેક સમયે તેની સાથે કેમ રહી શકી નહોતી.
હાલ પોલીસ અને સ્થાનિક કોરોનરનું કાર્યાલય આ મોતની તપાસ કરી રહ્યા છે. જોકે, તેમણે કહ્યું છે કે પ્રાથમિક તપાસમાં કોઈ ગેરરીતિ કે શંકાસ્પદ પરિસ્થિતિના સંકેતો મળ્યા નથી. અહેવાલો અનુસાર, હેડન અને તેમના રિયલ એસ્ટેટ એજન્ટ બોયફ્રેન્ડ બ્રાયન હિકરસન, જેમની સાથે તેમનો સંબંધ ક્યારેક બનતો અને ક્યારેક બગડતો રહ્યો હતો, તેમના નિધનના એક દિવસ પહેલાં લોસ એન્જલસથી સાઉથ કેરોલિના ગયા હતા. સાઉથ કેરોલિના બ્રાયનનું હોમટાઉન છે. હાલ આ કેસમાં અનેક સવાલો અને પરતો છે, જેની તપાસ પૂર્ણ થયા બાદ જ સમગ્ર હકીકત સામે આવી શકશે.
