EPFO FY26 Interest Credited: દેશના કરોડો નોકરીયાત લોકો માટે મોટી ખુશખબર છે. કર્મચારી ભવિષ્ય નિધિ સંગઠન (EPFO)એ ઈતિહાસ રચતા નાણાકીય વર્ષ 2025-26 માટે આશરે 35 કરોડ સભ્યોના PF ખાતામાં વ્યાજની રકમ જમા કરી દીધી છે. સૌથી ખાસ વાત એ છે કે આ વખતે 15 જુલાઈએ જ તમામ પાત્ર ખાતાઓમાં વ્યાજ ટ્રાન્સફર કરવામાં આવ્યું છે, જ્યારે ગયા વર્ષે આ પ્રક્રિયા સપ્ટેમ્બર સુધી ચાલી હતી. આ વખતે કુલ ₹1.44 લાખ કરોડનું વ્યાજ નવા કેન્દ્રીય ડેટાબેઝ (Centralised National Database) દ્વારા ઓટોમેટેડ રીતે પ્રોસેસ કરવામાં આવ્યું છે.
આ વર્ષે વ્યાજ આટલું વહેલું કેવી રીતે મળ્યું?
EPFO દ્વારા વ્યાજની રકમ રેકોર્ડ સમયમાં જમા થવાનું મુખ્ય કારણ તેનું નવું સેન્ટ્રલાઇઝ્ડ નેશનલ ડેટાબેઝ છે. સંસ્થાએ દેશભરના વિવિધ પ્રાદેશિક કેન્દ્રોમાં રહેલા 123 અલગ-અલગ ડેટાબેઝને એક જ નેશનલ ડેટાબેઝમાં મર્જ કર્યા છે. આ પ્રક્રિયા દરમિયાન લગભગ 1,700 કરોડ ટ્રાન્ઝેક્શન અને નોકરીદાતાઓના રેકોર્ડ્સ નવા સિસ્ટમમાં ટ્રાન્સફર કરવામાં આવ્યા હતા. 30 જૂને માઇગ્રેશન પૂર્ણ થયા બાદ ઓટોમેટેડ સિસ્ટમ દ્વારા વ્યાજની ગણતરી કરીને ફિલ્ડ અધિકારીઓએ તેની ચકાસણી કરી હતી. સિસ્ટમ અપગ્રેડ થયા બાદ EPFOએ એક જ તબક્કામાં અંદાજે ₹3,000 કરોડના 11 લાખ જેટલા પેન્ડિંગ ક્લેમ્સનું પણ નિરાકરણ કર્યું છે.
PF ખાતામાં વ્યાજ જમા થયું છે કે નહીં? આ રીતે કરો ચેક
1. EPFO Member Passbook Portal (e-Sewa) દ્વારા
- EPFOના અધિકૃત પાસબુક પોર્ટલ પર જાઓ.
- તમારો 12 અંકનો UAN, પાસવર્ડ અને કેપ્ચા દાખલ કરીને લોગિન કરો.
- તમારા રજિસ્ટર્ડ મોબાઇલ નંબર પર આવેલ OTP દાખલ કરો.
- લોગિન થયા બાદ Passbook Liteમાં કુલ PF બેલેન્સ, તાજેતરનું યોગદાન અને જમા થયેલું વ્યાજ જોઈ શકશો.
2. UMANG એપ દ્વારા
- સ્માર્ટફોનમાં UMANG એપ ડાઉનલોડ કરો.
- એપમાં EPFO Services વિકલ્પ પસંદ કરો.
- તમારો UAN દાખલ કરીને OTP દ્વારા લોગિન કરો.
- ત્યારબાદ View Passbook પર ક્લિક કરીને PF બેલેન્સ અને વ્યાજની સંપૂર્ણ વિગતો જોઈ શકો છો.
પાસબુકમાં વ્યાજ દેખાવામાં મોડું થાય તો શું નુકસાન થશે?
જો સિસ્ટમ માઇગ્રેશનને કારણે કોઈ સભ્યની પાસબુકમાં વ્યાજની એન્ટ્રી તરત દેખાતી ન હોય તો પણ સભ્યને ₹1નું પણ નુકસાન નહીં થાય. EPF યોજના, 1952ના પેરાગ્રાફ 60 મુજબ વ્યાજની ગણતરી દર મહિને ખાતાના રનિંગ બેલેન્સના આધારે કરવામાં આવે છે. તેથી પાસબુકમાં એન્ટ્રી મોડેથી દેખાય તો પણ સભ્યને તેનું સંપૂર્ણ વ્યાજ મળશે.
