UPI ટ્રાન્ઝેક્શન માટે નવા મર્ચન્ટ ડિસ્કાઉન્ટ રેટ (MDR) ફ્રેમવર્ક લાગુ કરવાની તારીખ આગળ વધારીને 1 જાન્યુઆરી 2027 કરવામાં આવે તેવી શક્યતા છે. તહેવારોની સિઝન દરમિયાન વેપારીઓ અને ડિજિટલ પેમેન્ટ ઇકોસિસ્ટમને તૈયારી માટે પૂરતો સમય મળી રહે તે માટે આ નિર્ણય લેવામાં આવી શકે છે. નવા નિયમો હેઠળ પણ નાના વેપારીઓ અને પર્સન-ટુ-પર્સન (P2P) ટ્રાન્ઝેક્શન પર શૂન્ય MDR જ લાગુ રહેશે. RBI ગવર્નર સંજય મલ્હોત્રાએ પણ સ્પષ્ટ કર્યું છે કે ખૂબ જ નજીવી ફીથી ડિજિટલ ટ્રાન્ઝેક્શનના વોલ્યુમ પર કોઈ મોટો પ્રભાવ પડવાની શક્યતા નથી.
હજુ કોઈ અંતિમ નિર્ણય લેવાયો નથી- સૂત્રો
ફાઇનાન્શિયલ એક્સપ્રેસે સૂત્રોને ટાંકીને જણાવ્યું છે કે UPI પર MDR લાગુ કરવાની તારીખ આગળ વધારવામાં આવી શકે છે, જેથી વેપારીઓ અને પેમેન્ટ સિસ્ટમને તૈયારી માટે વધુ સમય મળી શકે. જોકે, આ અંગે હજુ સુધી કોઈ અંતિમ નિર્ણય લેવામાં આવ્યો નથી. સૂત્રોના જણાવ્યા અનુસાર, જાહેર કરવામાં આવેલા MDR ફ્રેમવર્કમાં કોઈ ફેરફાર કરવામાં આવશે નહીં. હાલમાં UPI માટે MDR લાગુ કરવાની સત્તાવાર તારીખ 15 ઑક્ટોબર 2026 છે.
આ માહિતી એવા સમયે સામે આવી છે જ્યારે UPIના નવા ફ્રેમવર્કને લઈને સરકાર કાનૂની પડકારનો સામનો કરી રહી છે. 28 સપ્ટેમ્બરે સુપ્રીમ કોર્ટે કેન્દ્ર સરકારના તે નિર્ણય પર રોક લગાવવાનો ઇનકાર કર્યો હતો, જેમાં વ્યક્તિ-થી-વેપારી એટલે કે P2M ટ્રાન્ઝેક્શન પર MDR લાગુ કરવાનો નિર્ણય લેવામાં આવ્યો હતો. જોકે, સુપ્રીમ કોર્ટે નાણા મંત્રાલય, RBI અને NPCIને જવાબ દાખલ કરવા માટે ચાર અઠવાડિયાનો સમય આપ્યો હતો.
હકીકતમાં, 2,000 રૂપિયાથી વધુના UPI પેમેન્ટ પર 0.4% MDR પ્રસ્તાવિત છે. જ્યારે 75,000 રૂપિયા કે તેથી વધુના પેમેન્ટ પર મહત્તમ 300 રૂપિયા MDR લાગુ કરવાની દરખાસ્ત છે. જોકે, નાના વેપારીઓ અને વ્યક્તિગત એટલે કે પર્સન-ટુ-પર્સન (P2P) ટ્રાન્ઝેક્શન પર MDR શૂન્ય રહેશે. MDRની જાહેરાત બાદથી વેપારીઓ સતત તેનો વિરોધ કરી રહ્યા છે. આ મુદ્દે 2 ઑક્ટોબરે દેશના અનેક વિસ્તારોમાં વેપારીઓએ ‘નો UPI ડે’ પણ મનાવ્યો હતો.
