અમદાવાદમાં નારાયણા બિઝનેસ સ્કૂલ દ્વારા ‘Period Power Up’ કાર્યક્રમનું આયોજન કરાયું
narayana-business-school-period-power-up-menstrual-hygiene-day-2026-ahmedabad-news
અમદાવાદ: મેન્સ્ટ્રુઅલ હાઈજીન ડે 2026ના અવસરે અમદાવાદ સ્થિત નારાયણા બિઝનેસ સ્કૂલ (NBS) દ્વારા “Period Power Up – The 100% Conversation” કાર્યક્રમનું આયોજન કરવામાં આવ્યું હતું. કાર્યક્રમનો મુખ્ય હેતુ માસિક સ્વાસ્થ્ય અંગે જાગૃતિ ફેલાવવાનો, સમાનતાભર્યા વાતાવરણને પ્રોત્સાહન આપવાનો અને શૈક્ષણિક તેમજ વ્યાવસાયિક ક્ષેત્રોમાં ખુલ્લી ચર્ચાને પ્રોત્સાહિત કરવાનો હતો.
આ કાર્યક્રમનું આયોજન મેન્સ્ટ્રુપીડિયા, સ્ટેફ્રી ઈન્ડિયા, સીઆઈઆઈ ઈન્ડિયન વુમન નેટવર્ક (IWL) ગુજરાત, ત્રેસ્ના ફાઉન્ડેશન, સન્નિધ્યા મેટરનિટી અને મલ્ટિસ્પેશિયાલિટી હોસ્પિટલ, ફિલકોમ, સોમકોમતથા NBSની વુમેન ડેવલપમેન્ટ સેલના સહયોગથી કરવામાં આવ્યું હતું. કાર્યક્રમમાં ઉદ્યોગજગતના અગ્રણીઓ, આરોગ્ય નિષ્ણાતો, સામાજિક કાર્યકરો, વિદ્યાર્થીઓ અને પૂર્વ વિદ્યાર્થીઓએ હાજરી આપી હતી.
કાર્યક્રમ દરમિયાન પ્રેરણાદાયી કીનોટ સેશન, પેનલ ચર્ચા, વિદ્યાર્થી સંવાદ અને ઇન્ટરેક્ટિવ પ્રવૃત્તિઓ યોજાઈ હતી. ચર્ચાઓમાં માસિક સ્વાસ્થ્યને લઈને સમાજમાં રહેલા અંધશ્રદ્ધા અને સંકોચને દૂર કરવા તથા વધુ સંવેદનશીલ અને સમાવેશી સમાજ નિર્માણ પર ભાર મૂકાયો હતો.
કાર્યક્રમમાં સ્ટેફ્રી ઈન્ડિયાની સુપ્રિયા શ્રીનિવાસા, મેન્સ્ટ્રુપીડિયાની સ્થાપિકા આદિતિ ગુપ્તા, CII IWN Gujaratની ચેરપર્સન યોગિતા બંસલ આહુજા, Sannidhya Multispeciality Hospitalની ડૉ. અર્ચના શાહ, Tresna Foundationની સ્થાપિકા ડૉ. કૃષ્ણા પટેલ તેમજ નારાયણા બિઝનેસ સ્કૂલના વાઈસ પ્રેસિડેન્ટ – ગ્રોથ એન્ડ સ્ટ્રેટેજી વિશાલ તિવારીએ પોતાના વિચારો રજૂ કર્યા હતા.
નારાયણા બિઝનેસ સ્કૂલના ડીન ડૉ. પૂર્વી ગુપ્તા અને ડિરેક્ટર ડૉ. અમિત ગુપ્તાએ જણાવ્યું હતું કે સંસ્થા ભવિષ્યના સામાજિક રીતે જાગૃત અને ભાવનાત્મક રીતે સંવેદનશીલ નેતાઓ તૈયાર કરવા માટે સતત પ્રયત્નશીલ છે.
કાર્યક્રમની વિશેષતા તરીકે સોશિયલ મીડિયા ચેલેન્જનું પણ આયોજન કરવામાં આવ્યું હતું, જેમાં ખાસ કરીને યુવકોને માસિક સ્વાસ્થ્ય અંગેની ચર્ચામાં સક્રિય ભાગ લેવા પ્રોત્સાહિત કરવામાં આવ્યા હતા, જેથી સમાજમાં સમાવેશી દૃષ્ટિકોણ વિકસે.
કાર્યક્રમનો અંત માસિક સ્વાસ્થ્ય અંગે જાગૃતિ, ગૌરવ, સહાનુભૂતિ અને ખુલ્લી ચર્ચાને સમાજનો અભિન્ન ભાગ બનાવવાના સંદેશ સાથે થયો હતો.
