ગુજરાતમાં હાલ ભીષણ ગરમીનો પ્રકોપ યથાવત છે, પરંતુ હવે રાજ્યના લોકોને ગરમીમાંથી થોડોક રાહત મળે તેવા સંકેતો મળી રહ્યા છે. હવામાન વિભાગ તેમજ હવામાન નિષ્ણાત અંબાલાલ પટેલએ આગામી દિવસોમાં રાજ્યના કેટલાક વિસ્તારોમાં વરસાદની આગાહી કરી છે. હવામાન વિભાગ અનુસાર આગામી સાત દિવસ દરમિયાન રાજ્યના હવામાનમાં કોઈ મોટો ફેરફાર થવાની શક્યતા નથી, પરંતુ અનેક વિસ્તારોમાં તાપમાન 40 ડિગ્રીથી વધુ રહેવાની સંભાવના વ્યક્ત કરવામાં આવી છે. આ વચ્ચે સૌરાષ્ટ્ર અને દક્ષિણ ગુજરાતના ભાગોમાં પ્રિ-મોન્સૂન એક્ટિવિટી સક્રિય બનતા વરસાદી માહોલ સર્જાઈ શકે છે.
22 અને 23 મે માટે વરસાદની આગાહી
હવામાન વિભાગ મુજબ 22 મેના રોજ ગીર સોમનાથ, અમરેલી, નવસારી અને ડાંગ સહિત દમણ અને દાદરા નગર હવેલી વિસ્તારમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડી શકે છે. તે જ રીતે 23 મેના રોજ ભાવનગર, તાપી અને વલસાડ સહિત દક્ષિણ ગુજરાત અને સૌરાષ્ટ્રના વિસ્તારોમાં વરસાદી ઝાપટાં પડવાની શક્યતા છે.
અંબાલાલ પટેલની આગાહી
હવામાન નિષ્ણાત અંબાલાલ પટેલે જણાવ્યું છે કે આગામી દિવસોમાં રાજ્યમાં તાપમાનમાં ધીમે ધીમે ઘટાડો થઈ શકે છે. ખાસ કરીને દક્ષિણ ગુજરાત અને દરિયાકાંઠાના વિસ્તારોમાં હળવા વરસાદ અને ગાજવીજની શક્યતા વધુ રહેશે. તેમણે વધુમાં જણાવ્યું કે દ્વારકા, જામનગર અને પોરબંદર જિલ્લામાં પણ પ્રિ-મોન્સૂન એક્ટિવિટીના કારણે વાતાવરણમાં ફેરફાર જોવા મળી શકે છે.
જૂનમાં ચોમાસાની એન્ટ્રીના સંકેત
અંબાલાલ પટેલના અનુમાન મુજબ 1થી 5 જૂન દરમિયાન પણ રાજ્યના કેટલાક વિસ્તારોમાં વરસાદી ઝાપટાં પડી શકે છે. સાથે જ 8થી 15 જૂન દરમિયાન વધુ એક વરસાદી સિસ્ટમ સક્રિય બનવાની શક્યતા વ્યક્ત કરવામાં આવી છે.
તેમણે જણાવ્યું કે હાલ અરબી સમુદ્રમાં બનેલી સિસ્ટમના કારણે ચોમાસાની ગતિ થોડોક ધીમી પડી છે, પરંતુ સિસ્ટમ ઓમાન તરફ આગળ વધતા ચોમાસું ફરી ગતિ પકડી શકે છે. તેમના અનુમાન પ્રમાણે 26 મેથી 1 જૂન વચ્ચે ચોમાસું કેરળ કાંઠે પહોંચે તેવી શક્યતા છે.
