સંજય લીલા ભણસાલીની ખુશી અત્યારે કદાચ સમાતી નહી હોય, કારણકે ખુબ વિવાદો પછી રીલિઝ થયેલી તેમની ફિલ્મ પદ્માવતે બોક્સઓફિસ પર 50 દિવસ પૂર્ણ કરી લીધા છે અને 300 કરોડના ક્લબમાં સામેલ થઇ ગઇ છે.
તમને જણાવી દઇએ કે ફિલ્મ પદ્માવતને લઇને ખુબ વિવાદ સર્જાયા હતા. પહેલા ફિલ્મનો સેટ તોડી નાંખ્યો હતો ત્યારબાદ ફિલ્મ રીલીઝ ના કરવા માટે કરણીસેનાએ એડીચોટીનું જોર લગાવ્યું હતું. સેન્સર બોર્ડ દ્વારા ફિલ્મમાં 30 જેટલા કટ લગાવવામાં આવ્યા હતા અને ફિલ્મનું નામ પણ પદ્માવતીથી બદલીને પદ્માવત રાખવામાં આવ્યું હતું. તેમ છતા કરણીસેનાનો પુષ્કળ વિરોધ ચાલું જ હતો. મામલો એટલો બધો જટીલ બન્યો હતો કે સંજય લીલા ભણસાલીએ સુપ્રીમનો દરવાજો ખટખટાવ્યો હતો, ત્યારબાદ સુપ્રીમે ફિલ્મને રીલીઝ કરવા માટેની પરવાનગી આપી હતી. 4 રાજ્યોમાં ફિલ્મની રીલીઝ અટકી ગઇ હતી.
આટઆટલી મુશ્કેલીઓનો સામનો કર્યા પછી પણ પદ્માવતે બોક્સઓફિસ પર ધૂમ મચાવી દીધી હતી અને હવે ફિલ્મ પદ્માવતને 50 દિવસ પૂર્ણ થવા પર સંજય લીલા ભણસાલીની સાથે સાથે દિપીકા, રણવીર અને શાહિદની ખુશીનો પણ પાર નહી હોય. વેલ, કોન્ગ્રેચ્યુલેશન્સ ટીમ પદ્માવત.
