દક્ષિણ આફ્રિકાના એબી ડિવિલિયર્સ બાદ વધુ એક મહાન ખેલાડી હાસિમ અમલાએ આંતરરાષ્ટ્રીય ક્રિકેટમાંથી નિવૃતિ લઇ લેતા કરોડો ચાહકો નિરાશ થયા છે. અમલાને પોતાના સમયના સૌથી સારા ખેલાડીઓ પૈકી એક તરીકે ગણવામાં આવે છે. આફ્રિકા હમેંશા તેની બેટિંગને મીસ કરશે તેમાં કોઇ બે મત નથી. ટેસ્ટ, વનડે અને ટ્વેન્ટી મેચોમાં દક્ષિણ આફ્રિકા તરફથી શાનદાર કેરિયર ધરાવનાર અમલાએ હાલમાં આંતરરાષ્ટ્રીય ક્રિકેટમાંથી નિવૃતિ લેવાની જાહેરાત કરી દીધી છે.
અમલાના નામ પર કેટલાક રેકોર્ડ તો હજુ પણ રહેલા છે. જે તુટ્યા નથી. તેના નામ પર જે રેકોર્ડ રહ્યા છે તેમાં વનડે મેચોમાં સૌથી ઝડપી ૨૦૦૦ રન, સૌથી ઝડપી ૩૦૦૦ રન, સૌથી ઝડપી ૪૦૦૦ રન અને સૌથી ઝડપી ૫૦૦૦, ૬૦૦૦ અને ૭૦૦૦ રનનો રેકોર્ડ છે. એક રન મશીન તરીકે પણ અમલાને આફ્રિકા માટે ગણી શકાય છે. અમલવા એક વર્લ્ડ કલાસ બેટ્સમેનની સાથે સાથે ઉપયોગી ઓફ બ્રેક બોલર પણ છે. તે આફ્રિકાની ટીમના કેપ્ટન તરીકે પણ જુન ૨૦૧૪થી જાન્યુઆરી ૨૦૧૬ સુધી રહ્યો હતો. તે રાઇટ હેન્ડડ બેટ્સમેન તરીકે ભારે લોકપ્રિયતા ધરાવે છે. તેના નામ પર આફ્રિકા તરફથી સૌથી વધારે ૩૧૧ રન અણનમનો વ્યક્તિગત ટેસ્ટ સ્કોર પણ છે. જે કોઇ પણ આફ્રિકન દ્વારા કરવામાં આવેલા એક ઇનિગ્સમાં સૌથી વધારે રનનો સ્કોર છે.
જુલાઇ ૨૦૧૨માં લંડનના ઐતિહાસિક મેદાન ખાતે ઇંગ્લેન્ડ સામે અમલાએ આ ૩૧૧ રન અણનમની ઐતિહાસિક ઇનિગ્સ રમી હતી. વર્ષ ૨૦૧૪માં અમલા વનડે મેચોમાં સૌથી ઝડપથી ૧૫ સદીના રેકોર્ડ સુધી પહોંચી ગયો હતો. અમલાએ માત્ર ૮૬ ઇનિગ્સમાં આ સદી પુરી કરી હતી. આ જ વર્ષમાં તે ૯૮ ઇનિગ્સમાં સૌથી ઝડપથી ૧૬ સદી પર પહોંચનાર ખેલાડી બની ગયો હતો. ૧૮મી જાન્યુઆરી ૨૦૧૫ના દિવસે તે વનડે ક્રિકેટમાં સૌથી વધારે ઝડપતી ૧૮ સદી સુધી પહોંચી જનાર ખેલાડી બની ગયો હતો. ત્રીજી માર્ચ ૨૦૧૫ના દિવસે તે ૧૦૮ ઇનિગ્સમાં સૌથી ઝડપથી ૨૦ સદી સુધી પહોંચી જનાર ખેલાડી બન્યો હતો. આ પણ ખુબ ઓછા લોકો જાણે છે કે તે કોઇ એક દેશ સામે શાનદાર બેટિંગ કરતો ન હતો. અમલાએ તમામ ટેસ્ટ મેચ રમતા દેશોની સામે વનડે મેચોમાં સદી કરી છે. આવી સિદ્ધી હાંસલ કરનાર તે માત્ર ચોથો બેટ્સમેન રહ્યો છે. વર્ષ ૨૦૧૩માં તેને વિઝડન ક્રિકેટર ઓફ ધ યર તરીકે જાહેર કરવામાં આવ્યો હતો. વર્ષ ૨૦૧૭ાં આઇપીએલમાં બે સદી ફટકારી હતી. કિગ્સ ઇલેવન પંજાબ તરફથી રમતા અમલાએ બે સદી ફટકારી હતી. ત્રીજી જુન ૨૦૧૭ના દિવસે ૨૫ વને સદી સુધી પહોંચનાર સૌથી ઝડપી ખેલાડી બની ગયો હતો. અમલાએ આ સિદ્ધી ૧૬૭ ઇનિગ્સમાં હાંસલ કરી લીધી હતી. વનડે ક્રિકેટમાં સૌથી ઝડપથી ૨૭ સદી પૂર્ણ કરવાના ભારતના વિરાટ કોહલીના રેકોર્ડને પણ તોડવામાં સફળ રહ્યો હતો. કોહલીએ ૧૬૯ ઇનિગ્સમાં ૨૭ સદી પૂર્ણ કરી હતી.
આઠમી ઓગષ્ટ ૨૦૧૯ના દિવસે હાસીમ અમલાએ આંતરરાષ્ટ્રીય ક્રિકેટમાંથી નિવૃતિ લઇને તમામને ચોંકાવી દીધા હતા. આ ભવ્ય અને શાનદાર ક્રિકેટરે એ વખતે નિવૃતિ લીધી હતી જ્યારે તેની ટીમને તેની જરૂર હતી. સાથે સાથે ફોર્મમાં પણ ચાલી રહ્યો હતો. વન ડે ક્રિકેટમાં અનેક રેકોર્ડ હજુ પણ પોતાના નામ પર ધરાવનાર અમલાના માર્ગ પર ચાલવા માટે આફ્રિકાના જ નહીં બલ્કે દુનિયાના યુવા ખેલાડી ઉત્સુક દેખાઇ રહ્યા છે. તેની બેટિંગમાં તમામ પ્રકારની કુશળતા રહેલી હતી. જે આજે પણ યુવા ખેલાડી માટે જરૂરી હોય છે. ટેસ્ટ ક્રિકેટની વાત કરવામાં આવે તો અમલાએ ૧૨૪ ટેસ્ટ મેચ રમીને ૯૨૮૨ રન કર્યા છે. જેમાં તેની સરેરાશ ૪૬ રનથી વધારે રહી છે. જે તેની કુશળતાને પુરવાર કરવા માટે પુરતી છે. કોઇ પણ વર્લ્ડ ક્લાસ બેટ્સમેનની સરેરાશ જેટલી તેની સરેરાશ રહેલી છે. ટેસ્ટમાં તેના નામ પર ૨૮ સદી અને ૪૧ અડધી સદી છે. વનડે મેચમાં તેના નામ પર ૮૧૧૩ રન રહેલા છે. જેમાં ૨૭ સદી અને ૩૯ અડધી સદીનો સમાવેશ થાય છે. આંકડા જ તેને એક મહાન ખેલાડી સાબિત કરવા માટે પુરતા છે.
