ગુજરાતી ભાષા અને સંસ્કૃતિથી તરબતર “હેલ્લારો” નામની ગુજરાતી ફિલ્મ આ વર્ષના ઓક્ટોબર માસમાં રીલીઝ થવાની છે. પરંતુ આ ફિલ્મના પડઘમ એવા છે કે, લોકો આતુરતાથી ફિલ્મ સિને પડદે નિહાળવા માટે રાહ જોઈ રહ્યા છે. કેમ કે, આ ફિલ્મ ભારત સરકાર દ્વારા અપાતા ૬૬માં રાષ્ટ્રીય ફિલ્મ પુરષ્કારમાં શ્રેષ્ઠ ગુજરાતી ફિલ્મ ઘોષિત કરવામાં આવી છે. રીલીઝ થતા પહેલા જ લોકોએ તેને તાળીઓથી વધાવી લીધી છે. ફિલ્મની સ્ટોરીને લઈને પહેલાથી જ લોકોમાં ચર્ચાઓ સેવાઈ રહી હતી.
“હેલ્લારો” ફિલ્મ સારથી પ્રોડક્શન અને હરફનમૌલા ફિલ્મ્સ (અમદાવાદ) ના બેનર હેઠળ બની છે. ફિલ્મના મુખ્ય નિર્માતા આશિષ પટેલ, જયારે સહ-નિર્માતા અભિષેક શાહ, આયુષ પટેલ, મિત જાની અને પ્રતિક ગુપ્તા છે. ૧૯૭૫ના કચ્છની પાર્શ્વ ભૂમિ પર બનેલી હેલ્લારોના દિગ્દર્શક અભિષેક શાહ ગુજરાતી ફિલ્મોના જાણીતા કાસ્ટિંગ ડીરેક્ટર છે અને ઘણા વર્ષોથી લેખક-દિગ્દર્શક-અભિનેતા તરીકે ગુજરાતી રંગભૂમિ સાથે જોડાયેલા છે. અભિષેક શાહ દ્વારા લખાયેલી આ વાર્તાનો સ્ક્રીન-પ્લે લખવાનું કામ તેમની સાથે પ્રતિક ગુપ્તા એ કર્યું છે. જેમને અને મીત જાનીએ મળીને કરેલી ડોક્યુમેન્ટરી ફિલ્મ “ગુંગા પહેલવાન” માટે ૨૦૧૪ના વર્ષમાં નવોદિત દિગ્દર્શકનો રાષ્ટ્રીય ફિલ્મ પુરષ્કાર મળ્યો હતો. ગુજરાતની પાકિસ્તાન સરહદના છેવાડાના ગામ, કુરનની સીમ પાસે અફાટ રણ ની વચ્ચો-વચ “હેલ્લારો”નો સેટ બનાવવામાં આવ્યો હતો અને ધગધગતી ગરમીમાં હાડમારીઓ વચ્ચે લગભગ ૨૫૦ કલાકાર-કસબીઓએ આ ફિલ્મના વિશ્વને જીવંત કરી દીધું.
ગુજરાતનું લોકનૃત્ય ગરબા અને સ્ત્રીઓની સ્વ-અભિવ્યક્તિને કેન્દ્રમાં રાખીને બનાવાયેલી આ ફિલ્મમાં શ્રદ્ધા ડાંગર સહીત ૧૨ સ્ત્રી કલાકારો અને જયેશ મોરે તથા આર્જવ ત્રીવેદી જેવા મુખ્ય અભિનેતાઓ છે. રસપ્રદ વાત એ છે કે “હેલ્લારો” ને બેસ્ટ ફીચર ફિલ્મ ઉપરાંત કલાકારો ની ઉમદા અદાકારી ને લીધે ફિલ્મમાં ૧૩ ફિમેલ કાસ્ટ ને સ્પેશ્યલ જ્યૂરી મેનશન બેસ્ટ એકટ્રેસ નો પુરષ્કાર પણ મળ્યો છે. આ સાથે હિન્દી ફિલ્મ “૧૦૨ નોટ આઉટ” ના લેખક, સૌમ્ય જોષી આ ફિલ્મના ગીતકાર અને સંવાદ લેખક છે, જયારે ફિલ્મનું સંગીત મેહુલ સુરતીએ આપ્યું છે. રાષ્ટ્રીય ફિલ્મ પુરષ્કાર વિજેતા અને “ઢોલી તારો ઢોલ બાજે” તથા “નગાડા સંગ ઢોલ વાગે” જેવા જાજરમાન હિંદી ફિલ્મ ગીતોની નૃત્ય-નિર્દેશક જોડી સમીર-અર્શ તન્નાએ આ ફિલ્મના ચારેય ગીતોને કોરિયોગ્રાફ કર્યાં છે. આ સિવાય અન્ય મહાનુભાવો પણ આ ફિલ્મનો ભાગ બન્યા હતા.
૧૯૭૫ના સમયની કચ્છી સંસ્કૃતિ, ત્યાંના લોકોનો પરિવેશ અને પહેરવેશ આબેહુબ આ ફિલ્મમાં જોવા મળશે. આ સાથે ફિલ્મની સ્ટોરી ઘણી મજબૂત રીતે દર્શાવવામાં આવી છે જે અત્યારની ફિલ્મો કરતા ખુબ અલગ છે. આ સાથે આ ગુજરાતી ફિલ્મે નેશનલ કોમ્પિટિશનમાં વિનર બન્યા બાદ ગુજરાતી ફિલ્મોના ઈતિહાસમાં પોતાના નામ નોંધાવ્યું છે. જે ગુજરાતી ફિલ્મ ઈન્ડસ્ટ્રી માટે ઘણું જરૂરી છે. આ ફિલ્મને મળેલા પુરષ્કાર બદલ સૌ કોઈમાં હર્ષ ની લાગણી પ્રસરી રહી છે. જેના કારણે ફિલ્મની આતુરતા સિને પડદે જોવાની લોકોના મનમાં વધી રહી છે.
