આ સાંસ્કૃતિક કાર્યક્રમમાં સંસ્થાના ફેકલ્ટી સભ્યો, વિદ્યાર્થીઓ, ભૂતપૂર્વ વિદ્યાર્થીઓ, રાજ્ય સરકારના મહાનુભાવો તેમજ આંતરરાષ્ટ્રીય તાલીમ કાર્યક્રમોના સહભાગીઓ ઉપસ્થિત રહ્યા હતા. કેડિયાં અને ચણિયા-ચોળી જેવા પરંપરાગત પોશાકમાં સજ્જ આંતરરાષ્ટ્રીય પ્રતિનિધિઓએ સંગીતના તાલે ગરબા રમીને ગુજરાતી સંસ્કૃતિ પ્રત્યે ઉત્સાહ દર્શાવ્યો હતો.
આંતરરાષ્ટ્રીય પ્રતિનિધિઓ ભારત સરકારના વિદેશ મંત્રાલયના ભારતીય ટેકનિકલ અને આર્થિક સહકાર (ITEC) કાર્યક્રમ હેઠળ આયોજિત બે તાલીમ કાર્યક્રમોમાં ભાગ લઈ રહ્યા છે. આ તાલીમ કાર્યક્રમોમાં ‘નવા ઉદ્યોગોની સ્થાપના અને કૌશલ્યવર્ધન’ તથા ‘અનૌપચારિક ક્ષેત્ર, ઉદ્યોગસાહસિકતા અને સ્થાનિક આર્થિક વિકાસ’નો સમાવેશ થાય છે. બંને કાર્યક્રમો 14થી 27 ઑક્ટોબર, 2026 દરમિયાન યોજાઈ રહ્યા છે.
‘ઝણકાર ’26’ દ્વારા આંતરરાષ્ટ્રીય સહભાગીઓને ગુજરાતની સમૃદ્ધ સાંસ્કૃતિક પરંપરાઓને નજીકથી જાણવાની અને તેનો અનુભવ કરવાની તક મળી હતી. આ કાર્યક્રમ વિવિધ દેશોના પ્રતિનિધિઓ વચ્ચે સાંસ્કૃતિક આદાનપ્રદાન, પરસ્પર સમજણ અને મિત્રતાને પ્રોત્સાહન આપવાની દિશામાં મહત્વપૂર્ણ સાબિત થયો હતો. સંગીત, નૃત્ય અને ઉત્સાહભર્યા વાતાવરણ વચ્ચે યોજાયેલા આ કાર્યક્રમમાં ગુજરાતી સંસ્કૃતિની વૈશ્વિક ઝલક જોવા મળી હતી.
