આસામ: આસામના કામરૂપ જિલ્લાની રહેવાસી હિમાશ્રી બોરોએ રાત્રે આશરે 2 વાગ્યે પરિવારને ફોન કરીને જણાવ્યું હતું કે ટ્રેનમાં દારૂના નશામાં ધૂત કેટલાક યુવકો વચ્ચે તે અસહજ અનુભવી રહી છે. આ ઘટનાના એક દિવસ બાદ તેનો મૃતદેહ રેલવે ટ્રેક પરથી મળી આવ્યો હતો.
હિમાશ્રી એક ડાન્સ સ્પર્ધામાં ભાગ લેવા માટે વિશાખાપટ્ટનમ ગઈ હતી. ત્યાંથી તે ટ્રેનમાં ગૌહાટી પરત ફરી રહી હતી. પરિવારને ફોન કર્યા બાદ તેનો મોબાઇલ બંધ થઈ ગયો હતો. પરિવારના સભ્યોએ વારંવાર ફોન કરીને તેનો સંપર્ક કરવાનો પ્રયાસ કર્યો હતો. પરંતુ ફોન ન લાગતાં તેઓ ચિંતિત થઈ ગયા હતા અને રેલવે પોલીસ (GRP)નો સંપર્ક કર્યો હતો. GRPની તપાસ દરમિયાન હિમાશ્રીની બેગ અને ઓળખપત્ર મળી આવ્યાં હતાં, પરંતુ તેનો કોઈ પત્તો લાગ્યો નહોતો.
શું છે સમગ્ર ઘટના?
આસામના કામરૂપ જિલ્લાની 21 વર્ષીય હિમાશ્રી ગૌહાટીની બી. બરુઆ કોલેજમાં અભ્યાસ કરતી હતી. તે ડાન્સ સ્પર્ધામાં ભાગ લેવા માટે વિશાખાપટ્ટનમ ગઈ હતી. પરિવારના જણાવ્યા અનુસાર, 5 ઓક્ટોબરની રાત્રે તેણે ગૌહાટી પરત ફરવા માટે વિશાખાપટ્ટનમ રેલવે સ્ટેશન પરથી ડિબ્રુગઢ જતી વિવેક એક્સપ્રેસ ટ્રેન પકડી હતી. હિમાશ્રી ટ્રેનના S2 કોચમાં મુસાફરી કરી રહી હતી.
પરિવારે જણાવ્યું કે 6 ઓક્ટોબરની મધરાતે મુસાફરી દરમિયાન હિમાશ્રી સાથે છેલ્લી વખત વાત થઈ હતી. ત્યારબાદ તેનો સંપર્ક ન થતાં પરિવાર ચિંતિત થઈ ગયો હતો. તેમણે ગૌહાટીમાં રેલવે પોલીસ (GRP)નો સંપર્ક કર્યો હતો અને રેલવે હેલ્પલાઇન નંબર 139 પર પણ ફોન કર્યો હતો.
‘ધ હિન્દુ’ના અહેવાલ મુજબ, ગૌહાટીમાં હિમાશ્રીની પરીક્ષા હોવાથી તેને એકલી જ પરત ફરવું પડ્યું હતું. તેના ડાન્સ ગ્રૂપના મિત્રોએ તેની સુરક્ષાને લઈને ચિંતા વ્યક્ત કરી હતી અને તેને રોકવાનો પ્રયાસ પણ કર્યો હતો, પરંતુ તે માની નહોતી. તેની ટ્રેન 6 ઓક્ટોબરની રાત્રે 12:15 વાગ્યે વિશાખાપટ્ટનમથી રવાના થઈ હતી. CCTV ફૂટેજમાં હિમાશ્રી ટ્રેનમાં સવાર થતી જોવા મળે છે. સ્ટેશન પર તેની સાથે એક યુવક પણ હતો, જે તેનો મિત્ર હોવાનું કહેવાય છે. તે હિમાશ્રીને સ્ટેશન પર મૂકવા આવ્યો હતો.
અહેવાલ અનુસાર, હિમાશ્રી જે કોચમાં મુસાફરી કરી રહી હતી, તેમાં કેટલાક યુવકો કથિત રીતે દારૂ પી રહ્યા હતા. હિમાશ્રીએ આ બાબતે વાંધો ઉઠાવ્યો હતો અને પોતાના ફોનમાં તેનો વીડિયો પણ બનાવ્યો હતો. ત્યારબાદ તેણે માતા-પિતાને ફોન કર્યો હતો અને જણાવ્યું હતું કે દારૂના નશામાં ધૂત કેટલાક યુવકો તેને ધમકી આપી રહ્યા છે. પરિવાર સાથેની આ તેની છેલ્લી વાતચીત હતી, કારણ કે ત્યારબાદ તેનો ફોન બંધ થઈ ગયો હતો.
પરિવારની ફરિયાદ બાદ પોલીસે હિમાશ્રીની શોધખોળ શરૂ કરી હતી. આ દરમિયાન પોલીસને માહિતી મળી હતી કે શ્રીકાકુલમ જિલ્લાના મલયાપુરમ-પેનુબર્થિ વિસ્તાર નજીક રેલવે ટ્રેક પરથી એક યુવતીનો મૃતદેહ મળી આવ્યો છે. માહિતી મળતાં જ પોલીસ ઘટનાસ્થળે પહોંચી હતી. શ્રીકાકુલમના પોલીસ અધિક્ષક મહેશ્વર રેડ્ડી પણ ઘટનાસ્થળે પહોંચ્યા હતા. હિમાશ્રીના પરિવારજનો પણ શ્રીકાકુલમ પહોંચ્યા હતા. ઘટનાને લઈને પોલીસ તપાસ કરી રહી છે. જોકે, હિમાશ્રીના મૃત્યુ પાછળનું ચોક્કસ કારણ અને સમગ્ર ઘટનાક્રમ અંગેની વિગતો તપાસ બાદ જ સ્પષ્ટ થઈ શકશે.
