સાળંગપુર: ગુજરાત ટી ટ્રેડર્સ એસોસિએશન (GTTA) દ્વારા સાળંગપુર સ્થિત શ્રી કષ્ટભંજન દેવ હનુમાનજી મંદિર ખાતે 50મી સુવર્ણ જયંતી અને વાર્ષિક સાધારણ સભા (AGM)નું ભવ્ય આયોજન કરવામાં આવ્યું હતું. વર્ષ 1976થી 2026 સુધીની પાંચ દાયકાની સફરની ઉજવણીમાં ચા ઉદ્યોગ સાથે સંકળાયેલા સેંકડો સભ્યો, ઉદ્યોગસાહસિકો અને તેમના પરિવારો ઉપસ્થિત રહ્યા હતા.
પરમ પૂજ્ય આચાર્ય રાકેશપ્રસાદજી મહારાજની પવિત્ર ઉપસ્થિતિમાં યોજાયેલા કાર્યક્રમમાં FAITTAના ચેરમેન પારસ દેસાઈ, જાણીતા ચા ઉત્પાદક અને Tea Board of India તથા TRAના પૂર્વ ચેરમેન પ્રભાત બેઝબોરુઆ તેમજ J. Thomas & Companyના વાઇસ પ્રેસિડેન્ટ સંજય ચૌધરી સહિતના અગ્રણી મહાનુભાવો જોડાયા હતા.
GTTA પ્રમુખ મનીષ પટેલે સંસ્થાની ઐતિહાસિક સફરને યાદ કરતાં સ્થાપક પ્રમુખ સ્વ. શ્રી પીયૂષભાઈ દેસાઈના યોગદાનને બિરદાવ્યું હતું. તેમણે ગાંધી જયંતીના અવસરે ગાંધીજીના સિદ્ધાંતોમાંથી પ્રેરણા લઈ ઉદ્યોગના વિકાસ માટે એકતાથી આગળ વધવાની અપીલ કરી હતી.
FAITTA ચેરમેન પારસ દેસાઈએ ચાના વપરાશમાં વધારો, યુવા પેઢીને આકર્ષતા નવા ફ્લેવર્સ અને ઉત્પાદનો તથા ગુણવત્તાયુક્ત પેકેજિંગ પર ભાર મૂક્યો હતો. કાર્યક્રમમાં નવી ગવર્નિંગ બોડીની રચનાની પુષ્ટિ સાથે આગામી પેઢીને ચા ઉદ્યોગના વૈશ્વિક પડકારો માટે તૈયાર કરવા માર્ગદર્શન આપવાની અપીલ કરવામાં આવી હતી.
