અમદાવાદ: ગુજરાતમાં ચોમાસાના અંતિમ રાઉન્ડમાં મેઘરાજાએ ફરી જોરદાર બેટિંગ શરૂ કરી છે. રાજ્યભરમાં આજે પણ વરસાદનું જોર યથાવત રહેવાની આગાહી કરવામાં આવી છે. હવામાન વિભાગની આગાહી મુજબ ઉત્તર, મધ્ય અને દક્ષિણ ગુજરાતમાં ભારે વરસાદ પડી શકે છે. રાજ્યના 11 જિલ્લાઓમાં અતિભારે વરસાદની શક્યતાને પગલે ઓરેન્જ એલર્ટ જાહેર કરવામાં આવ્યું છે. કેટલાક વિસ્તારોમાં ગાજવીજ અને વાવાઝોડા સાથે વરસાદ પડી શકે છે. આ દરમિયાન પ્રતિ કલાક 40 કિમીની ઝડપે પવન ફૂંકાવાની પણ શક્યતા છે.
અમદાવાદ, કચ્છ, મોરબી, ડાંગ અને વડોદરા સહિતના વિસ્તારો માટે યલો એલર્ટ જાહેર કરવામાં આવ્યું છે. બીજી તરફ કચ્છ અને સૌરાષ્ટ્રના કેટલાક વિસ્તારોમાં હળવાથી મધ્યમ વરસાદની સંભાવના વ્યક્ત કરવામાં આવી છે.
240 તાલુકામાં વરસાદ, કપરાડામાં સૌથી વધુ
રાજ્યમાં છેલ્લા 24 કલાક દરમિયાન 240 તાલુકામાં વરસાદ નોંધાયો છે. જેમાં વલસાડના કપરાડામાં સૌથી વધુ 4.45 ઇંચ વરસાદ નોંધાયો છે. ભરૂચના વાલિયામાં 3.82 ઇંચ, વલસાડના નાનાપોંઢામાં 3.54 ઇંચ અને ધરમપુરમાં 3.43 ઇંચ વરસાદ ખાબક્યો છે. રાજ્યના 9 તાલુકામાં 3 ઇંચથી વધુ વરસાદ નોંધાયો છે, જ્યારે 27 તાલુકામાં 2 ઇંચથી વધુ વરસાદ પડ્યો છે. આ ઉપરાંત આશરે 100 તાલુકામાં 1 ઇંચથી વધુ વરસાદ નોંધાયો છે. સાર્વત્રિક વરસાદને કારણે અનેક વિસ્તારોમાં ઠંડક પ્રસરી છે અને સારા વરસાદથી ખેડૂતોમાં પણ ખુશીનો માહોલ જોવા મળી રહ્યો છે.
માંગરોળ બંદરે 3 નંબરનું સિગ્નલ લગાવાયું
વરસાદી સિસ્ટમની અસરને પગલે જૂનાગઢના માંગરોળ બંદર નજીક દરિયામાં ભારે કરંટ જોવા મળી રહ્યો છે અને ઊંચા મોજા ઉછળી રહ્યા છે. સ્થિતિને ધ્યાનમાં રાખીને બંદર પર 3 નંબરનું સિગ્નલ લગાવવામાં આવ્યું છે. તંત્ર દ્વારા માછીમારોને દરિયામાં ન જવાની સૂચના આપવામાં આવી છે. માંગરોળ અને આસપાસના વિસ્તારોમાં સતત સારો વરસાદ વરસી રહ્યો છે. ભારે પવન અને દરિયામાં ઉછળતા મોજાને પગલે દરિયાકાંઠાના વિસ્તારોમાં પણ તંત્ર દ્વારા સાવચેતી રાખવામાં આવી રહી છે.
આણંદ જિલ્લામાં વાદળછાયા વાતાવરણ બાદ મેઘરાજાએ ધમાકેદાર એન્ટ્રી કરી છે. ગાજવીજ અને ભારે પવન સાથે જિલ્લામાં ધોધમાર વરસાદ વરસતા વાતાવરણમાં ઠંડક પ્રસરી ગઈ છે. ઉમરેઠ, લીંગડા અને પણસોરા સહિતના વિસ્તારોમાં પણ સારો વરસાદ નોંધાયો છે. અચાનક પડેલા ધોધમાર વરસાદને કારણે કેટલાક રસ્તાઓ પર પાણી વહેતા થયા હતા. લાંબા સમયથી વરસાદની રાહ જોઈ રહેલા ખેડૂતોમાં સારા વરસાદથી ખુશીનો માહોલ છે. વરસાદને કારણે ખેતી પાકને ફાયદો થવાની આશા પણ ખેડૂતોમાં જાગી છે.
અમદાવાદમાં મોડી રાતથી ધીમીધારે વરસાદ વરસી રહ્યો છે. વહેલી સવારથી શહેરના અનેક વિસ્તારોમાં ઝરમર વરસાદ યથાવત રહ્યો છે. આકાશમાં કાળા ડિબાંગ વાદળો છવાયેલા હોવાથી દિવસ દરમિયાન પણ વરસાદી માહોલ રહેવાની શક્યતા છે. શહેરના કેટલાક વિસ્તારોમાં ધોધમાર વરસાદના અહેવાલ પણ સામે આવ્યા છે. સતત વરસાદને કારણે અમદાવાદમાં વાતાવરણ ઠંડુ બન્યું છે. વહેલી સવારે કામકાજ માટે ઘરેથી નીકળેલા લોકોને પણ વરસાદનો સામનો કરવો પડી રહ્યો છે.
આગામી કલાકોમાં પણ રાજ્યના અનેક વિસ્તારોમાં વરસાદી માહોલ યથાવત રહેવાની શક્યતા હોવાથી તંત્ર દ્વારા લોકોને સાવચેતી રાખવા અને ખાસ કરીને દરિયાકાંઠાના વિસ્તારોમાં જરૂરી તકેદારી રાખવા અપીલ કરવામાં આવી છે.
