અમદાવાદ : અમદાવાદના સાઉથ બોપાલ વિસ્તારમાં આવેલી વેદાંત ઇન્ટરનેશનલ પ્રી-સ્કૂલ ખાતે ગણેશ ચતુર્થીના પાવન પર્વ નિમિત્તે ઈકો-ફ્રેન્ડલી ગણેશ મૂર્તિ નિર્માણ વર્કશોપનું આયોજન કરવામાં આવ્યું હતું. પર્યાવરણની જાળવણી સાથે ધાર્મિક ઉત્સવોની પવિત્રતા જળવાઈ રહે તેવા હેતુથી યોજાયેલા આ વર્કશોપમાં બાળકોએ ઉત્સાહપૂર્વક ભાગ લીધો હતો. વર્કશોપ દરમિયાન વિદ્યાર્થીઓને પ્લાસ્ટર ઓફ પેરિસ (POP) તેમજ કેમિકલયુક્ત રંગોથી પર્યાવરણને થતા નુકસાન અંગે માહિતગાર કરવામાં આવ્યા હતા. ત્યારબાદ કલા શિક્ષકોના માર્ગદર્શન હેઠળ બાળકોએ શુદ્ધ કાળી માટી, શાડુની માટી અને કુદરતી રંગોનો ઉપયોગ કરીને ગણેશજીની સુંદર મૂર્તિઓ બનાવવાની તાલીમ મેળવી હતી.
બાળકોએ પોતાના કુમળા હાથે ગણેશજીની આકર્ષક મૂર્તિઓ તૈયાર કરી હતી. આ મૂર્તિઓની વિશેષતા એ હતી કે તેમાં વિવિધ ફૂલ અને છોડના બીજ પણ મૂકવામાં આવ્યા હતા. મૂર્તિના વિસર્જન બાદ તે ઘરના કુંડામાં જ ઓગળી જાય અને તેમાંથી છોડનો ઉછેર થઈ શકે તેવો પર્યાવરણમૈત્રી વિચાર આ પહેલ પાછળ રાખવામાં આવ્યો હતો.
વેદાંત ઇન્ટરનેશનલ પ્રી-સ્કૂલના સેન્ટર હેડ સોનલ ઠક્કરે જણાવ્યું હતું કે, “બાળકોમાં નાનપણથી જ પર્યાવરણ પ્રત્યે જાગૃતિ કેળવાય અને તેઓ આપણી સંસ્કૃતિ તથા પરંપરાઓને પ્રકૃતિ સાથે જોડીને ઉજવતા શીખે તે માટે આ પ્રયાસ કરવામાં આવ્યો છે. બાળકો દ્વારા બનાવવામાં આવેલી ઈકો-ફ્રેન્ડલી ગણેશ મૂર્તિઓ તેઓ પોતાના ઘરે સ્થાપના માટે લઈ જશે. આ નાનકડી પહેલ દ્વારા બાળકોમાં સર્જનાત્મકતા સાથે પર્યાવરણ પ્રત્યેની જવાબદારીની ભાવના પણ વિકસે તે અમારો મુખ્ય ઉદ્દેશ છે.”
આ સમગ્ર પ્રવૃત્તિ દ્વારા શાળાએ બાળકોમાં “ભક્તિ સાથે પ્રકૃતિનું રક્ષણ” કરવાનો સુંદર સંદેશ આપ્યો હતો.
