અમદાવાદ: ઉત્તરાખંડના પ્રસિદ્ધ સંત શ્રી નીબ કરૌરી બાબા, જેમને હનુમાનજીનો અવતાર માનવામાં આવે છે, તેમનો મહાસમાધિ દિવસ શુક્રવાર, તા. 11 સપ્ટેમ્બરના રોજ રાંચરડા ખાતે આવેલા શ્રી સંકટમોચન હનુમાન નીબ કરૌરી બાબા મંદિરમાં ભવ્ય રીતે ઉજવવામાં આવશે.
મંદિરના સંસ્થાપક ડો. પ્રવીણ ગર્ગે જણાવ્યું હતું કે મહાસમાધિ દિવસ નિમિત્તે સવારે 8:00 વાગ્યે બાબાને પુષ્પાંજલિ અર્પણ કરવામાં આવશે. ત્યારબાદ સાંજે 8:30 વાગ્યે 11 હનુમાન ચાલીસાના પાઠનું આયોજન કરવામાં આવ્યું છે. સમગ્ર દિવસ દરમિયાન મંદિર ખાતે ભંડારાનું પણ આયોજન કરવામાં આવ્યું છે.
આ મંદિર ભારતનું ચોથું એવું દિવ્ય મંદિર હોવાનું જણાવવામાં આવે છે, જ્યાં હનુમાનજી વિશ્રામ અવસ્થામાં બિરાજમાન છે. મંદિર ખાતે દર રવિવારે સાંજે 5:30 વાગ્યે નિયમિત રીતે સુંદરકાંડના પાઠનું આયોજન કરવામાં આવે છે.
સંત શ્રી નીબ કરૌરી બાબાની પ્રસિદ્ધ શિક્ષા **“Love All, Serve All, Feed All”**ને અનુસરીને મંદિર દ્વારા વિવિધ સેવાકીય પ્રવૃત્તિઓ પણ કરવામાં આવે છે. મંદિર તરફથી ત્રણ ‘રામ રોટી સેવા રથ’ દ્વારા નિયમિત રીતે આશરે 500 જરૂરિયાતમંદ લોકોને ભોજન પ્રસાદનું વિતરણ કરવામાં આવે છે. આ ઉપરાંત જરૂરિયાતમંદો માટે અન્ય સેવાકીય કાર્યો પણ હાથ ધરવામાં આવે છે. શ્રી નીબ કરૌરી બાબાના આશીર્વાદથી રાંચરડાનું આ મંદિર ધીમે ધીમે શ્રદ્ધાળુઓ માટે શ્રદ્ધા, આસ્થા અને વિશ્વાસનું મહત્વપૂર્ણ કેન્દ્ર બની રહ્યું છે.
