તાજેતરમાં બોલિવૂડ અભિનેત્રી કૃતિ સેનન જ્વેલરી બ્રાન્ડ GIVAના રક્ષાબંધન કેમ્પેઇનમાં જોવા મળી હતી. આ કેમ્પેઇનમાં તેણે ઓફ-વ્હાઇટ ઇન્ડો-વેસ્ટર્ન ડ્રેસ પહેર્યો હતો, જેમાં બ્રાલેટ-સ્ટાઇલ બ્લાઉઝ, કેપ અને ડ્રેપ્ડ સ્કર્ટનો સમાવેશ થતો હતો. જોકે, આ ડ્રેસને લઈને અભિનેત્રી સોશિયલ મીડિયા પર ટ્રોલર્સના નિશાન પર આવી ગઈ હતી. કેટલાક યુઝર્સે સવાલ ઉઠાવ્યો કે રક્ષાબંધન જેવા પરંપરાગત તહેવાર પર આવો પહેરવેશ યોગ્ય છે?
કેમ્પેઇનમાં તહેવારની ફેશનને આધુનિક અંદાજમાં રજૂ કરવાનો પ્રયાસ કરવામાં આવ્યો હતો, પરંતુ કૃતિનો આ લુક સોશિયલ મીડિયા યુઝર્સના એક વર્ગને પસંદ આવ્યો નહોતો. વિવાદ વધ્યા બાદ જ્વેલરી બ્રાન્ડ GIVAએ કૃતિ સેનનને દર્શાવતી રક્ષાબંધનની પોતાની જાહેરાત હટાવી દીધી હતી. આ નિર્ણય ત્યારે લેવામાં આવ્યો જ્યારે કૃતિએ વીડિયો કમર્શિયલમાં પહેરેલા પોતાના કપડાં પર સવાલ ઉઠાવનારા ટીકાકારોને જવાબ આપ્યો હતો. અભિનેત્રી અને ભાજપ સાંસદ કંગના રનૌતે પણ ‘બિકિની પહેરીને રાખડી બાંધવા’ બદલ કૃતિની ટીકા કરી હતી.
વિવાદના થોડા કલાકો બાદ GIVAએ પોતાના સત્તાવાર ઇન્સ્ટાગ્રામ પેજ પર એક નિવેદન જાહેર કર્યું હતું. તેમાં ભારતીય સંસ્કૃતિ અને પરંપરાઓ પ્રત્યે સન્માન વ્યક્ત કરવામાં આવ્યું હતું. બ્રાન્ડે કહ્યું કે, “સન્માનના કારણે તમામ મીડિયા પ્લેટફોર્મ પરથી કમર્શિયલ હટાવી લેવામાં આવ્યું છે.” સાથે જ બ્રાન્ડે જણાવ્યું કે તેઓ ભારતીય સંસ્કૃતિ, પરંપરાઓ અને તહેવારોનું ખૂબ સન્માન કરે છે.
GIVAએ પોતાના નિવેદનમાં કહ્યું કે એક બ્રાન્ડ તરીકે તેઓ હંમેશા આખા પરિવાર સાથે ખુશીની પળો ઉજવવામાં વિશ્વાસ રાખે છે અને આ વખતે તેઓ પોતાના પાલતુ પ્રાણીઓને પણ આ પ્રેમ અને ઉજવણીમાં સામેલ કરવા માગતા હતા.
બ્રાન્ડે વધુમાં જણાવ્યું કે જો તેમના તાજેતરના જાહેરાતથી અજાણતાં સમાજના કેટલાક વર્ગોની લાગણીઓને ઠેસ પહોંચી હોય તો તેનો તેમનો કોઈ ઇરાદો નહોતો. આદરના ભાગરૂપે જાહેરાતને તમામ મીડિયા પ્લેટફોર્મ પરથી હટાવી લેવામાં આવી છે.
જે જાહેરાત હટાવવામાં આવી છે તેમાં કૃતિ સેનન બ્રાલેટ-સ્ટાઇલ બ્લાઉઝ, કેપ અને ડ્રેપ્ડ સ્કર્ટ પહેરીને રક્ષાબંધનની ઉજવણી કરતી જોવા મળી હતી. સોશિયલ મીડિયા યુઝર્સના એક વર્ગને આ રજૂઆત સામે વાંધો હતો.
અભિનેત્રી અને ભાજપ સાંસદ કંગના રનૌતે પણ આ વિવાદ પર પોતાની પ્રતિક્રિયા આપી હતી. તેમણે આ જાહેરાતને “જાણપૂર્વક વિચિત્ર/અશ્લીલ” ગણાવી હતી. કંગના રનૌતની પોસ્ટના થોડા કલાકો બાદ કૃતિ સેનને પોતાની ઇન્સ્ટાગ્રામ સ્ટોરી પર એક નિવેદન શેર કર્યું હતું. તેણે લખ્યું હતું કે તહેવારોનો સાચો અર્થ વ્યક્તિએ પહેરેલા કપડાંમાં નહીં, પરંતુ પરંપરાઓ પ્રત્યેની તેની લાગણી અને તેના અર્થમાં રહેલો છે.
કૃતિએ સવાલ ઉઠાવ્યો કે મહિલાઓના પહેરવેશ પર સમાજની નજર હંમેશા કેમ રહે છે? તેણે કહ્યું કે મહિલાઓને તેઓએ શું પહેરવું જોઈએ તે કહેવાનું આપણે ક્યારે બંધ કરીશું? સમયની સાથે એથનિક ફેશનમાં ઘણો બદલાવ આવ્યો છે, પરંતુ આજે પણ મહિલાના સંસ્કૃતિ પ્રત્યેના સન્માનને માત્ર તેના કપડાં પરથી જ કેમ નક્કી કરવામાં આવે છે? કૃતિએ સ્પષ્ટ શબ્દોમાં કહ્યું કે “સંસ્કૃતિ અને પરંપરા હૃદયમાં હોય છે, ગળાની નેકલાઇનમાં નહીં.”
‘કોકટેલ 2’ની અભિનેત્રીએ સોશિયલ મીડિયાના એ વર્ગની પણ ટીકા કરી હતી, જેમણે તેના કૂતરાને રાખડી બાંધવા સામે વાંધો ઉઠાવ્યો હતો. કૃતિએ કહ્યું કે રક્ષાબંધન સુરક્ષા અને રક્ષણનું બંધન છે. તે અને તેની બહેન એકબીજાને રાખડી બાંધે છે અને તેઓ જાણે છે કે એકબીજાની સુરક્ષા તેઓ એટલી જ સારી રીતે કરી શકે છે જેટલી કોઈ ભાઈ કરે. તેઓ એકબીજાના સ્વાસ્થ્ય, ખુશી અને લાંબા આયુષ્ય માટે પ્રાર્થના કરે છે અને તેમના માટે આ પ્રાર્થના અને વચન તેમના કૂતરાઓ માટે પણ છે, કારણ કે તેઓ પણ પરિવારનો જ એક ભાગ છે.
