નવી દિલ્હી: 19 વર્ષ બાદ અભિનેતા ઈમરાન હાશ્મીની કલ્ટ ફિલ્મ ‘આવારાપન’ની સિક્વલ એટલે કે ‘આવારાપન 2’ આવી છે અને આ ફિલ્મે ચાહકોના દિલ જીતી લીધા છે. કમર્શિયલ રીતે પણ ‘આવારાપન 2’ બોક્સ ઓફિસ પર શાનદાર પ્રદર્શન કરતી જોવા મળી રહી છે.
ફિલ્મની વાર્તા અને સ્ટાર કાસ્ટની પણ ખૂબ ચર્ચા થઈ રહી છે. તેમાં ‘આવારાપન 2’માં વિલન જોરાવરનું પાત્ર ભજવનાર અભિનેતા પણ ચર્ચામાં છે. તો ચાલો જાણીએ કે આ કલાકાર કોણ છે.
ફિલ્મ ‘આવારાપન 2’માં જોરાવરનું પાત્ર મુખ્ય ખલનાયકનું છે અને સમગ્ર ફિલ્મની વાર્તા તેની આસપાસ જ ફરે છે. આ પાત્ર અભિનેતા પૂરન ગબ્બી (Puran Gabbi)એ ભજવ્યું છે. પૂરન જાણીતી બોલિવૂડ અભિનેત્રી વામિકા ગાબ્બીના નાના ભાઈ છે. તેમના પિતાનું નામ ગોવર્ધન ગાબ્બી છે, જેઓ જાણીતા લેખક છે.
પૂરન માત્ર અભિનેતા જ નથી, પરંતુ એક સારો સંગીતકાર પણ છે. ફિલ્મ ‘આવારાપન 2’માં તેમણે જે રીતે જોરાવરનું નેગેટિવ પાત્ર ભજવ્યું છે, તેની દરેક જગ્યાએ પ્રશંસા થઈ રહી છે.
પૂરન ગબ્બી અગાઉ શાહરુખ ખાનની ફિલ્મ ‘ઝીરો’માં પણ જોવા મળી ચૂક્યા છે. જોકે, તેમાં તેમનો રોલ ખૂબ નાનો હતો. આ જ રીતે તેમણે આયુષ્માન ખુરાનાની ફિલ્મ ‘શુભ મંગલ ઝ્યાદા સાવધાન’માં પણ નાની ભૂમિકા ભજવી હતી. એક્ટિંગમાં આવતાં પહેલાં પૂરન ગબ્બીએ અનેક પ્રોડક્શન ટીમ સાથે લાંબા સમય સુધી ઓફ-કેમેરા કામ પણ કર્યું છે.
અભિનેતા તરીકે પૂરન ગબ્બીને વાસ્તવિક ઓળખ OTT પ્લેટફોર્મ નેટફ્લિક્સની લોકપ્રિય વેબ સિરીઝ ‘બ્લેક વોરન્ટ’થી મળી હતી. આ સિરીઝમાં તેમણે રંગાનું પાત્ર ભજવ્યું હતું. પોતાના દમદાર અભિનયથી તેમણે આ પાત્રમાં પોતાની ખાસ છાપ છોડી હતી. હવે ‘આવારાપન 2’માં વિલનની ભૂમિકા ભજવીને પૂરન ગબ્બીએ દર્શકોનું ધ્યાન પોતાની તરફ ખેંચ્યું છે. હાલમાં ઈન્સ્ટાગ્રામ પર પૂરન ગબ્બીના લગભગ 25 હજાર ફોલોઅર્સ છે અને ‘આવારાપન 2’ બાદ તેમના ફોલોઅર્સની સંખ્યામાં ઝડપથી વધારો થતો જોવા મળી રહ્યો છે.
