અમદાવાદ: ગુજરાતમાં ચોમાસાએ ફરી જોર પકડ્યું છે. અપર એર સાયક્લોનિક સર્ક્યુલેશન અને ટ્રફ લાઇન સક્રિય થતાં રાજ્યના અનેક વિસ્તારોમાં ભારે વરસાદી માહોલ સર્જાયો છે. આજે સવારે 6 વાગ્યાથી અત્યાર સુધીમાં રાજ્યના 162 તાલુકામાં વરસાદ નોંધાયો છે. તેમાં નવસારી જિલ્લાના વાંસદામાં સૌથી વધુ અંદાજે 5 ઇંચ વરસાદ વરસ્યો છે. ભારે દરિયાઈ કરંટને કારણે જાફરાબાદ અને માંગરોળ બંદર પર 3 નંબરનું ભય સૂચક સિગ્નલ ફરકાવવામાં આવ્યું છે.
હવામાન નિષ્ણાત અંબાલાલ પટેલે આગામી દિવસોમાં રાજ્યના અનેક વિસ્તારોમાં ભારે વરસાદની શક્યતા વ્યક્ત કરી છે. તેમના જણાવ્યા અનુસાર, 24થી 27 જુલાઈ દરમિયાન મધ્ય અને ઉત્તર ગુજરાતમાં ભારે વરસાદી માહોલ રહી શકે છે. ગોધરા, લુણાવાડા અને દાહોદ સહિતના વિસ્તારોમાં ભારે વરસાદને કારણે નીચાણવાળા વિસ્તારોમાં પાણી ભરાવા અને પૂર જેવી સ્થિતિ સર્જાવાની સંભાવના છે.
અંબાલાલ પટેલના કહેવા મુજબ, આ વરસાદી સિસ્ટમના કારણે અનેક નદીઓમાં જળસ્તર વધવાની શક્યતા છે. મહેસાણા, પાટણ, સાબરકાંઠા, અરવલ્લી અને બનાસકાંઠામાં 27 જુલાઈ સુધી ગાજવીજ સાથે વરસાદ પડી શકે છે. કચ્છના કેટલાક વિસ્તારોમાં પણ ભારે વરસાદની આગાહી કરવામાં આવી છે.
આ તરફ ભારતીય હવામાન વિભાગ (IMD)એ આગામી ત્રણ કલાક માટે નાઉકાસ્ટ બુલેટિન જાહેર કર્યું છે. તેમાં વલસાડ, નવસારી, ડાંગ, સુરત અને તાપીમાં ગાજવીજ તથા તેજ પવન સાથે ભારે વરસાદની શક્યતા દર્શાવવામાં આવી છે. દમણ અને દાદરા-નગર હવેલીમાં પણ ભારે વરસાદની આગાહી છે. જ્યારે ભાવનગર, અમરેલી, ગીર સોમનાથ, ભરૂચ, નર્મદા, બનાસકાંઠા અને સાબરકાંઠામાં મધ્યમ વરસાદ સાથે વીજળી પડવાની શક્યતા છે. અમદાવાદ, ગાંધીનગર, રાજકોટ અને કચ્છમાં હળવાથી મધ્યમ વરસાદી ઝાપટાં પડી શકે છે.
હવામાન વિભાગે આજે નવસારી, વલસાડ, દમણ અને દાદરા-નગર હવેલી માટે અત્યંત ભારે વરસાદનું રેડ એલર્ટ જાહેર કર્યું છે. સતત વરસાદને કારણે નવસારી જિલ્લામાં લગભગ 98 રસ્તાઓ પર અવરજવર પ્રભાવિત થઈ છે. સુરત, તાપી, ડાંગ અને દમણમાં ભારેથી અતિભારે વરસાદની સંભાવના છે, જ્યારે ભરૂચ, નર્મદા, વડોદરા અને બોટાદમાં તેજ પવન સાથે વરસાદ પડી શકે છે.
દરિયામાં ભારે કરંટને ધ્યાનમાં રાખીને માછીમારોને આગામી ત્રણ દિવસ સુધી દરિયો ન ખેડવાની સૂચના આપવામાં આવી છે. ભારે વરસાદને કારણે નીચાણવાળા વિસ્તારોમાં પાણી ભરાવા, ટ્રાફિકની સમસ્યા અને જનજીવન પર અસર થવાની શક્યતા હોવાથી તંત્રે લોકોને બિનજરૂરી મુસાફરી ટાળવા, સુરક્ષિત સ્થળે રહેવા તેમજ વરસાદ દરમિયાન ઝાડ અથવા વીજળીના થાંભલા નીચે આશરો ન લેવા અપીલ કરી છે.
