વિશ્વ ઉમિયા ફાઉન્ડેશન અમદાવાદ દ્વારા ભારતના સૌ પ્રથમ સોશિયલ બિઝનેસ પ્લેટફોર્મ VIBOSનું લોન્ચિંગ કરવામાં આવ્યું છે. અમદાવાદ ખાતે રાજ્યના મૃદુ અને મક્કમ મુખ્યમંત્રીશ્રી ભુપેન્દ્રભાઈ પટેલના હસ્તે યુવા ઉદ્યોગસાહસિકોને વૈશ્વિક ફલક પર સ્થાન અપાવવા માટે બનેલા VIBOS પ્લેટફોર્મનું ઉદ્ધાટન કરાયું હતું. વિશ્વ ઉમિયાધામના પ્રણેતા અને પ્રમુખશ્રી આર. પી. પટેલના માર્ગદર્શન હેઠળ યુવા સશક્તિકરણ પર વિશેષ ભાર મૂકવામાં આવ્યો છે અને વેપાર-ઉદ્યોગ તેનો એક મહત્વનો ભાગ છે. આ પહેલ અંતર્ગત વિશ્વ ઉમિયા ફાઉન્ડેશન એક નવું પ્રીમીયમ બિઝનેસ પ્લેટફોર્મ ‘વાઇબોસ’ (VIBOS – વિશ્વ ઉમિયા ઇન્ટરનેશનલ બિઝનેસ ઓર્ગેનાઇઝેશન એન્ડ સોશિયલ નેટવર્ક)નો શુભારંભ કર્યો છે.
VIBOS નું ઉદ્ઘાટન કરતાં માનનીય મુખ્યમંત્રી શ્રી ભુપેન્દ્રભાઈ પટેલ જણાવે છે ગુજરાત પ્રથમ નંબરનું દેશનું બિઝનેસ પ્લેટફોર્મ છે. વિશ્વ ઉમિયા ફાઉન્ડેશન દ્વારા યુવા ઉદ્યોગ સાહસિકો માટે બનાવાયેલા આ VIBOS પ્લેટફોર્મ ને ખૂબ ખૂબ અભિનંદન. વિશ્વ ઉમિયા ધામ એ પાટીદારોની સાથે સાથે સર્વ સમાજની સાથે લઈને ચાલી રહ્યો છે તે અભિનંદનને પાત્ર છે. પથ્થર માં પાટુ મારી પાણી કાઢે એ પાટીદાર છે એ આપ સર્વે સાબિત કર્યું છે.
VIBOS અંગે વાત કરતા સંસ્થાના પ્રમુખશ્રી આર.પી.પટેલ જણાવે છે કે VIBOS ગુજરાત અને ભારતના સિમાડા પાર કરી વૈશ્વિક ફલક પર કામ કરશે. VIBOSમાં NRI બિઝનેસમેન પણ જોડાયા છે. VIBOSએ ભારતનું પ્રથમ આધ્યાત્મિક પ્લેટફોર્મ પર બનેલું બિઝનેસ પ્લેટફોર્મ છે. VIBOS નવી રોજગારીની તકો ઉભી કરશે.
“When Achievers Meet Achievers, Opportunities Turn Into Empires.” ના સૂત્ર પર કાર્યરત VIBOS એ વિશ્વ ઉમિયા ફાઉન્ડેશન દ્વારા સફળ અને પ્રતિષ્ઠિત ઉદ્યોગસાહસિકો તેમજ વ્યાપારી અગ્રણીઓ માટે ખાસ તૈયાર કરવામાં આવેલું એક પ્રીમિયમ બિઝનેસ નેટવર્કિંગ પ્લેટફોર્મ છે. તે પ્રગતિશીલ વ્યવસાયિકોને એકસાથે લાવે છે જેથી તેઓ પરસ્પર સંબંધો બાંધી શકે, વ્યાપારિક તકોની આપ-લે કરી શકે અને વ્યવસાયના વિસ્તરણને વેગ આપી શકે.માત્ર વ્યાપારિક વૃદ્ધિથી આગળ વધીને, આ પહેલ એ વાત પર વિશેષ ધ્યાન કેન્દ્રિત કરશે કે સભ્યો કેવી રીતે સમાજનો ઉદ્ધાર કરી શકે અને જરૂરિયાતમંદોને રોજગારીની વધુ સારી તકો પૂરી પાડી શકે. આ માત્ર વ્યવસાયિક સંપર્કો વધારવાનું માધ્યમ નથી, પરંતુ અગ્રણીઓ માટે સામાજિક કાર્યોમાં સાથે મળીને યોગદાન આપવાનું એક સક્ષમ અને પવિત્ર મંચ છે.
આ મંચ પર આયોજનબદ્ધ મીટિંગ્સ અને બિઝનેસ કોન્ક્લેવ દ્વારા સભ્યોને એક મજબૂત અને વિશ્વાસુ નેતૃત્વ વ્યવસ્થાનો લાભ પ્રાપ્ત થાય છે. VIBOS પરંપરાગત નેટવર્કિંગથી ઘણું આગળ વધીને પરસ્પર સહયોગ, જ્ઞાનની ભાગીદારી અને લાંબા ગાળાના વ્યવસાયિક વિકાસને પ્રોત્સાહન આપે છે. આ એક એવો વિશિષ્ટ પ્રકલ્પ છે જ્યાં અગ્રણીઓ જોડાય છે, વ્યવસાયોનો વ્યાપ વધે છે અને નવી સંભાવનાઓ સર્જાય છે— જે માત્ર ઉદ્યોગસાહસિકો માટે જ નહીં, પરંતુ સમગ્ર સમાજ માટે રોજગારીનું સર્જન કરે છે અને સામાજિક સશક્તિકરણનું કાર્ય કરે છે.
મહત્વનું છે કે વિશ્વ ઉમિયા ફાઉન્ડેશન સનાતન સંસ્કૃતિ અને સમાજના સર્વાંગી વિકાસ માટે આધ્યાત્મિક ચેતનાને સામાજિક તેમજ રાષ્ટ્રીય ચેતનામાં રૂપાંતરિત કરીને રાષ્ટ્ર નિર્માણનું કાર્ય કરી રહ્યું છે. આ જ સંકલ્પ સાથે હાલમાં અમદાવાદમાં 60 એકરમાં ફેલાયેલું અને 2000 કરોડના સામાજિક નિધિ સહયોગથી આકાર લઈ રહેલું ‘વિશ્વ ઉમિયાધામ’ એક સામાજિક સશક્તિકરણ કેન્દ્ર તરીકે નિર્માણ પામી રહ્યું છે. જેમાં શિવ અને શક્તિ એટલે કે જગતજનની મા ઉમિયાને સમર્પિત વિશ્વનું સૌથી ઊંચું 504 ફૂટનું મંદિર કેન્દ્રસ્થાને છે. વિશ્વ ઉમિયાધામ માત્ર આધ્યાત્મિકતાનું જ નહીં, પરંતુ શિક્ષણ, સ્વાસ્થ્ય, મહિલા અને યુવા સશક્તિકરણનું પણ કેન્દ્ર છે, જે અંતર્ગત સંસ્થા દ્વારા 22 જેટલી વિવિધ પ્રવૃત્તિઓ ચલાવવામાં આવી રહી છે.
