અમદાવાદના ડ્રાઇવ-ઇન સિનેમામાં ગુજરાતી ફિલ્મ ‘જિંદગી Once More’નું ભવ્ય ફ્રી સ્ક્રીનિંગ યોજાયું. સ્ટારકાસ્ટે દર્શકો સાથે ફિલ્મ નિહાળી અને ઐતિહાસિક શોને મળ્યો જબરદસ્ત પ્રતિસાદ.
અમદાવાદ: અમદાવાદના પ્રતિષ્ઠિત ડ્રાઇવ-ઇન સિનેમામાં સોમવારે ગુજરાતી ફિલ્મ **’જિંદગી Once More’**નું ભવ્ય અને ઐતિહાસિક ફ્રી સ્ક્રીનિંગ યોજાયું હતું. સાંજે 7 વાગ્યાથી શરૂ થયેલા આ વિશેષ શોમાં મોટી સંખ્યામાં દર્શકો ઉમટી પડ્યા હતા, જેના કારણે સમગ્ર વાતાવરણ ઉત્સવમય બની ગયું હતું.
ફિલ્મની સ્ટારકાસ્ટમાં આરતી પટેલ, દીપ ધોળકિયા સહિતના કલાકારોએ ખાસ હાજરી આપી હતી. જોકે વિદેશ પ્રવાસને કારણે સિદ્ધાર્થ રાંદેરિયા હાજર રહી શક્યા નહોતા. હાજર કલાકારોએ ચાહકો સાથે મુલાકાત કરી હતી તેમજ તેમની સાથે બેસીને આખી ફિલ્મ પણ નિહાળી હતી.
‘ફર્સ્ટ કમ, ફર્સ્ટ સર્વ‘ના આધારે યોજાયેલા આ ફ્રી એન્ટ્રી શોમાં દર્શકોનો જબરદસ્ત પ્રતિસાદ જોવા મળ્યો હતો. ગુજરાતની સૌથી વધુ પ્રેક્ષક ક્ષમતા ધરાવતી અને પોતાની કારમાં બેસીને ફિલ્મ જોવાની અનોખી સુવિધા ધરાવતા ડ્રાઇવ-ઇન સિનેમામાં કોઈ ગુજરાતી ફિલ્મનું આ પ્રકારનું પ્રથમ ભવ્ય સ્ક્રીનિંગ હોવાનું માનવામાં આવે છે.
ધર્મા પ્રોડક્શન્સ અને વાર્તાકાર ફિલ્મના સંયુક્ત બેનર હેઠળ બનેલી આ ફિલ્મના નિર્માતા વાસુ ધોળકિયાએ જણાવ્યું હતું કે, “ગુજરાતી સિનેમામાં કંઈક નવું અને અલગ કરવાનો અમારો પ્રયાસ હતો. બોલિવૂડના અગ્રણી પ્રોડક્શન હાઉસ સાથે જોડાઈને અમે આ ભવ્ય શો યોજ્યો, જેને દર્શકો તરફથી અપેક્ષા કરતાં પણ વધુ સારો પ્રતિસાદ મળ્યો છે.”
ફિલ્મના લેખક અને અભિનેતા દીપ ધોળકિયાએ જણાવ્યું હતું કે, “‘જિંદગી Once More’ હવે ચોથા સપ્તાહમાં પ્રવેશી ચૂકી છે. બાપ-દીકરાના લાગણીસભર સંબંધોની આ વાર્તા વધુને વધુ લોકો સુધી પહોંચે તે માટે અમે સતત પ્રયાસ કરી રહ્યા છીએ અને આ ઐતિહાસિક શોએ અમારા ઉત્સાહમાં વધારો કર્યો છે.”
દિગ્દર્શક જયમીનના નિર્દેશનમાં બનેલી આ ફિલ્મને ડ્રાઇવ-ઇન સિનેમામાં ઉપસ્થિત દર્શકોએ વિષયવસ્તુ, સંવેદનશીલ રજૂઆત અને કલાકારોના અભિનય માટે ભરપૂર વખાણી હતી.
ફિલ્મની ટીમે આ ઐતિહાસિક ઇવેન્ટને સફળ બનાવવા બદલ તમામ દર્શકો અને ચાહકોનો આભાર વ્યક્ત કર્યો હતો. ‘જિંદગી Once More’ હાલમાં પણ ગુજરાતભરના સિનેમાઘરોમાં સફળતાપૂર્વક ચાલી રહી છે.
