રાજકોટ: વિશ્વ ઉમિયા ફાઉન્ડેશન (VUF) ના નેજા હેઠળ કાર્યરત પ્રતિષ્ઠિત બિઝનેસ નેટવર્કિંગ પ્લેટફોર્મ ‘VIBES’ દ્વારા આગામી ૧૧ જુલાઈ, ૨૦૨૬ (શનિવાર) ના રોજ રાજકોટ ખાતે તેના પ્રથમ ઇન્ડસ્ટ્રિયલ ચેપ્ટર અને સમગ્ર નેટવર્કના ૨૦માં ચેપ્ટર ‘આદિત્ય રાજકોટ’નો ભવ્ય લોન્ચિંગ સમારોહ યોજાવા જઈ રહ્યો છે.
વિશ્વ ઉમિયા ફાઉન્ડેશન ‘આધ્યાત્મિક ચેતનાથી રાષ્ટ્રીય ચેતના’ના સંકલ્પ સાથે શિવ અને શક્તિ એટલે કે જગતજનની મા ઉમિયાના વિશ્વના સૌથી ઊંચા (૫૦૪ ફૂટ) મંદિરનું નિર્માણ કરી રહ્યું છે. આ સાથે સંસ્થા સમાજ ઉત્થાન અને સનાતન સંસ્કૃતિના વિકાસ માટે ૨૨ જેટલી વિવિધ પ્રવૃત્તિઓ ચલાવે છે, જેમાં ‘યુવા ઉદ્યોગકારો અને વેપાર નેટવર્કિંગ માટે કાર્યરત ‘VIBES’ સંસ્થાનો એક અત્યંત મહત્વપૂર્ણ મુખ્ય પ્રકલ્પ છે. આ પ્લેટફોર્મનો મુખ્ય ઉદ્દેશ્ય ૫૦૦૦થી વધુ અગ્રણી ઉદ્યોગસાહસિકોને એક મંચ પર લાવીને વ્યાપારી નેટવર્કિંગને વૈશ્વિક સ્તરે મજબૂત કરવાનો છે.
આ ભવ્ય કાર્યક્રમનું આયોજન મોટા મવા, સેકન્ડ રિંગ રોડ, ધ ગ્રાન્ડ પેલેસની સામે આવેલા ‘રીમુઝ FEC’ ખાતે સવારે ૭:૦૦ વાગ્યે કરવામાં આવ્યું છે. આ ચેપ્ટરનું લોન્ચિંગ વિશ્વ ઉમિયા ફાઉન્ડેશનના પ્રમુખ આર. પી. પટેલ, બાલાજી વેફર્સના સ્થાપક અને મેનેજિંગ ડિરેક્ટર ચંદુભાઈ વિરાણી, ફાઉન્ડેશનના ઉપપ્રમુખ ડી. એન. ગોલ તેમજ રાજકોટ સંગઠનના ચેરમેન ગૌતમભાઈ ધમસાણીયાના વરદહસ્તે સંપન્ન થશે.
VIBESના ચેરમેન આકાશ વડાલીયા, સેન્ટ્રલ કોર કમિટીના સભ્યો મયુર પટેલ અને સાગર પટેલે માહિતી આપતા જણાવ્યું હતું કે, અમદાવાદ, સુરત, વડોદરા, મુંબઈ અને હિંમતનગર જેવા વિવિધ શહેરોમાં સફળતાપૂર્વક ૧૯ ચેપ્ટર્સ કાર્યરત કર્યા બાદ, રાજકોટનું આ પ્રથમ ચેપ્ટર સ્થાનિક ઉદ્યોગો અને વ્યવસાયો માટે વિકાસના નવા દ્વાર ખોલશે. આ બિઝનેસ લોન્ચિંગ મીટિંગ માટે પ્રોફેશનલ ‘બિઝનેસ એટાયર’ રાખવામાં આવ્યો છે.
