અમદાવાદ: ચોમાસું હવે ગુજરાતના અન્ય ભાગ તરફ પણ આગળ વધી રહ્યું છે. ભારતીય હવામાન વિભાગ (IMD)ના તાજેતરના વેધર મેપ અનુસાર રાજ્યમાં 12 જુલાઈ સુધી સાર્વત્રિક વરસાદની આગાહી કરવામાં આવી છે. આજે (7 જુલાઈ) દક્ષિણ ગુજરાત અને દક્ષિણ સૌરાષ્ટ્રના કેટલાક જિલ્લાઓમાં અત્યંત ભારે વરસાદની સંભાવનાને પગલે રેડ એલર્ટ જાહેર કરવામાં આવ્યું છે. જ્યારે અમદાવાદ સહિત મધ્ય ગુજરાતમાં વાદળછાયું વાતાવરણ, છૂટાછવાયા વરસાદ તેમજ વીજળીના કડાકા-ભડાકાની શક્યતા વ્યક્ત કરવામાં આવી છે.
છેલ્લા 24 કલાકમાં ક્યાં કેટલો વરસાદ?
છેલ્લા 24 કલાક દરમિયાન સૌરાષ્ટ્ર-કચ્છ વિસ્તારમાં ચોમાસું સક્રિય રહ્યું હતું, જ્યારે રાજ્યના અન્ય વિસ્તારોમાં સામાન્યથી મધ્યમ વરસાદ નોંધાયો હતો. અમરેલી જિલ્લાના વિવિધ વિસ્તારોમાં અતિભારે વરસાદ નોંધાયો હતો. દમણ અને ડાંગ જિલ્લામાં અત્યંત ભારે વરસાદ વરસ્યો હતો. નવસારી, વલસાડ, તાપી, સાબરકાંઠા અને દાદરા નગર હવેલીમાં પણ ભારે વરસાદ નોંધાયો હતો. ઉપરાંત ગીર સોમનાથ, ભાવનગર અને દીવ જિલ્લાના અનેક વિસ્તારોમાં પણ નોંધપાત્ર વરસાદ વરસ્યો હતો.
હવામાન વિભાગે આજે ભાવનગર, સુરત, તાપી, ડાંગ, નવસારી અને વલસાડ જિલ્લામાં રેડ એલર્ટ જાહેર કર્યું છે. આ વિસ્તારોમાં ભારેથી અત્યંત ભારે વરસાદ પડવાની સંભાવના છે. જોકે 8 જુલાઈથી વરસાદની તીવ્રતામાં થોડો ઘટાડો થઈ શકે છે, તેમ છતાં રાજ્યના મોટાભાગના વિસ્તારોમાં વરસાદી માહોલ યથાવત રહેવાની શક્યતા છે.
હવામાન વિભાગના જણાવ્યા મુજબ આગામી ત્રણ દિવસ દરમિયાન ઉત્તર અરબી સમુદ્ર, સમગ્ર ગુજરાત તેમજ હરિયાણા, પંજાબ અને રાજસ્થાનના કેટલાક વિસ્તારોમાં દક્ષિણ-પશ્ચિમ ચોમાસું વધુ આગળ વધવા માટે અનુકૂળ પરિસ્થિતિ સર્જાઈ રહી છે. જેના કારણે ગુજરાતમાં પણ વરસાદની ગતિવિધિ વધુ સક્રિય રહેવાની શક્યતા છે.
દક્ષિણ ઝારખંડ અને ઉત્તર આંતરિક ઓડિશા પર સર્જાયેલું ડિપ્રેશન આગામી 24 કલાકમાં ઝારખંડ, ઉત્તર છત્તીસગઢ અને પૂર્વ મધ્ય પ્રદેશ તરફ આગળ વધવાની શક્યતા છે. તેની અસરથી ગુજરાતમાં ભેજનું પ્રમાણ વધશે અને વરસાદી સિસ્ટમ વધુ મજબૂત બનશે. આ ઉપરાંત ઓફ-શોર ટ્રફ, મોસમી ટ્રફ અને શિયર ઝોન જેવી હવામાન પ્રણાલીઓ પણ સક્રિય હોવાથી આગામી દિવસોમાં રાજ્યમાં વરસાદ માટે અનુકૂળ પરિસ્થિતિ રહેશે.
હવામાન વિભાગના ડાયરેક્ટર એ.કે. દાસે જણાવ્યું છે કે દક્ષિણ ગુજરાત અને દક્ષિણ સૌરાષ્ટ્રમાં આજે અત્યંત ભારે વરસાદની સંભાવના છે. સાથે જ માછીમારોને 10 જુલાઈ સુધી દરિયો ન ખેડવાની સલાહ આપવામાં આવી છે. તંત્રે લોકોને ભારે વરસાદ દરમિયાન સાવચેતી રાખવા અને જરૂરી હોય ત્યારે જ બહાર નીકળવાની અપીલ કરી છે.
