અમદાવાદ: પડોશી રાજ્ય મહારાષ્ટ્ર, ખાસ કરીને મુંબઈમાં વરસી રહેલા ભારેથી અતિભારે વરસાદની અસર હવે ગુજરાતમાં પણ જોવા મળી શકે છે. હવામાનમાં ઝડપથી થઈ રહેલા ફેરફારો વચ્ચે હવામાન નિષ્ણાત અંબાલાલ પટેલે રાજ્યમાં આગામી દિવસોમાં વરસાદી માહોલ વધુ સક્રિય બનવાની આગાહી કરી છે. તેમના જણાવ્યા અનુસાર, બંગાળના ઉપસાગરમાં સર્જાઈ રહેલી સિસ્ટમ અને વધતા ભેજના કારણે ગુજરાતમાં ચોમાસું હવે જોર પકડશે.
અંબાલાલ પટેલના જણાવ્યા મુજબ, આગામી દિવસોમાં બંગાળનો ઉપસાગર સક્રિય બનવાની પૂરેપૂરી શક્યતા છે. તેના કારણે ભેજયુક્ત પવનો ગુજરાત તરફ આગળ વધશે અને રાજ્યના અનેક વિસ્તારોમાં વરસાદ માટે અનુકૂળ વાતાવરણ ઊભું થશે. તેમણે ખેડૂતો અને સામાન્ય નાગરિકોને હવામાનની સ્થિતિ પર સતત નજર રાખવા તેમજ જરૂરી સાવચેતી રાખવાની સલાહ આપી છે.
આગાહી મુજબ મધ્ય ગુજરાત, ઉત્તર ગુજરાત તેમજ મહીસાગર, પંચમહાલ, સાબરકાંઠા અને અરવલ્લી જિલ્લામાં સારા વરસાદની સંભાવના છે. કેટલાક વિસ્તારોમાં ભારેથી અતિભારે વરસાદ પણ નોંધાઈ શકે છે. અમદાવાદ અને ગાંધીનગર સહિતના શહેરોમાં પણ વરસાદી ઝાપટાંથી લઈને સારા વરસાદની શક્યતા વ્યક્ત કરવામાં આવી છે.
બીજી તરફ હવામાન વિભાગના જણાવ્યા અનુસાર રાજ્યમાં સાયક્લોનિક સર્ક્યુલેશન સક્રિય બનતા દક્ષિણ ગુજરાત, ઉત્તર ગુજરાત અને સૌરાષ્ટ્રના અનેક જિલ્લાઓમાં આગામી સાત દિવસ દરમિયાન વરસાદની ગતિવિધિમાં નોંધપાત્ર વધારો થઈ શકે છે. વાવણી કર્યા બાદ વરસાદની રાહ જોઈ રહેલા ખેડૂતો માટે આ આગાહી રાહતના સમાચાર સમાન માનવામાં આવી રહી છે.
અંબાલાલ પટેલે વધુમાં જણાવ્યું કે હાલમાં અલ નીનોની અસરને કારણે રાજ્યમાં ગરમી અને ઉકળાટનું પ્રમાણ વધુ છે. જોકે આગામી દિવસોમાં ભેજનું પ્રમાણ વધતાં વરસાદી સિસ્ટમ વધુ મજબૂત બનશે. શરૂઆતમાં છૂટાછવાયા વિસ્તારોમાં વરસાદ થશે, પરંતુ **29 જૂનથી 7 જુલાઈ** દરમિયાન રાજ્યના મોટા ભાગના વિસ્તારોમાં વરસાદનું જોર વધવાની સંભાવના છે.
તેમણે જણાવ્યું કે ઉત્તર ગુજરાતમાં ખેડૂતો માટે વાવણીલાયક વરસાદ પડી શકે છે, જ્યારે મહીસાગર, પંચમહાલ, અમદાવાદ, ગાંધીનગર, અરવલ્લી અને સાબરકાંઠા સહિતના જિલ્લાઓમાં પણ સારા વરસાદની શક્યતા છે. ક્યાંક સામાન્ય તો ક્યાંક ભારે અને અતિભારે વરસાદ પણ પડી શકે છે.
જો આગાહી મુજબ વરસાદ નોંધાશે તો રાજ્યમાં ખેતીની કામગીરીને વેગ મળશે અને લાંબા સમયથી ગરમી તથા ઉકળાટથી પરેશાન લોકોને પણ રાહત મળશે.
