ઇંગ્લેન્ડમાં ચાલી રહેલા મહિલા ટી20 વર્લ્ડ કપ દરમિયાન મેદાન પર ખરાબ પ્રદર્શનનો સામનો કરી રહેલી પાકિસ્તાન ટીમ વિશે એવા અહેવાલો સામે આવી રહ્યા છે કે ટીમની અંદર મતભેદો વધી રહ્યા છે અને ડ્રેસિંગ રૂમનું વાતાવરણ પણ તણાવપૂર્ણ બન્યું છે. જોકે, પાકિસ્તાન ક્રિકેટ બોર્ડ (PCB)એ આ અહેવાલોની સત્તાવાર પુષ્ટિ કે ખંડન કર્યું નથી, પરંતુ સોશિયલ મીડિયા અને મુખ્યધારા મીડિયામાં ટીમની અંદરની સમસ્યાઓ અંગે ચર્ચા ચાલી રહી છે.
પાકિસ્તાનને મંગળવારે વર્લ્ડ કપમાં સતત ચોથી હારનો સામનો કરવો પડ્યો હતો. ટીમ હજુ સુધી એક પણ મેચ જીતી શકી નથી. ટૂર્નામેન્ટ પહેલાં આયર્લેન્ડ અને વેસ્ટ ઇન્ડિઝ સામે રમાયેલી ત્રિકોણીય શ્રેણીમાં પણ પાકિસ્તાનની જીતનું ખાતું ખુલ્યું નહોતું. ગયા વર્ષે યોજાયેલા વન-ડે વર્લ્ડ કપમાં પણ પાકિસ્તાન છેલ્લાં સ્થાને રહ્યું હતું. અહેવાલો મુજબ, ખેલાડીઓની પસંદગીના મુદ્દે ટીમની કેપ્ટન ફાતિમા સના અને ટીમ મેન્ટર વહાબ રિયાઝ વચ્ચે ગંભીર મતભેદો છે.
બાંગ્લાદેશ સામેની મેચ પહેલાં ફાતિમા સનાએ સિનિયર ખેલાડી આલિયા રિયાઝના રૂમમાં તેમના પતિના રોકાણ અંગે વાંધો ઉઠાવ્યો હતો. એક રિપોર્ટ મુજબ, સનાના કહેવા પર આલિયાના પતિ અલી યુનિસને રૂમ છોડવો પડ્યો હતો. વધુમાં, બાંગ્લાદેશ સામેની મેચના એક દિવસ પહેલાં આલિયા પ્રેક્ટિસમાં હાજર રહેવાની બદલે પોતાના પતિ સાથે ફરવા ગઈ હોવાનું પણ કહેવાય છે.
અહેવાલ અનુસાર, બાંગ્લાદેશ સામેની મેચમાં ફાતિમા સના ઇચ્છતી નહોતી કે આલિયા રિયાઝને પ્લેઇંગ ઇલેવનમાં સ્થાન મળે, પરંતુ વ્હાબ રિયાઝે તેમની પસંદગી કરી હતી. મેચમાં આલિયાનું પ્રદર્શન નિરાશાજનક રહ્યું અને પાકિસ્તાનને હારનો સામનો કરવો પડ્યો. ત્યારબાદ સનાએ ટીમના તમામ સભ્યોની હાજરીમાં વ્હાબ રિયાઝને કહ્યું હતું કે હાર માટે તેઓ જવાબદાર છે, કારણ કે તેઓ ટીમમાં શિસ્તના નિયમો યોગ્ય રીતે લાગુ કરવામાં નિષ્ફળ રહ્યા હતા.
ઉલ્લેખનીય છે કે છેલ્લા 3-4 વર્ષોમાં PCBએ મહિલા ટીમના મુખ્ય કોચમાં સતત ફેરફાર કર્યા છે. આ સમયગાળા દરમિયાન માર્ક કોલેસ જેવા વિદેશી કોચ ઉપરાંત જુનૈદ ખાન, બાસિત અલી, સલિમ જાફર અને મોહતાસિમ રાશિદ જેવા સ્થાનિક કોચ અને સપોર્ટ સ્ટાફ પણ ટીમ સાથે જોડાયેલા રહ્યા છે.
