દેશભરમાં ચોમાસાની આતુરતાથી રાહ જોતા લોકો માટે રાહતના સમાચાર સામે આવ્યા છે. લગભગ એક અઠવાડિયાના વિરામ બાદ દક્ષિણ-પશ્ચિમ ચોમાસું ફરી ધીમે ધીમે આગળ વધી રહ્યું છે. જોકે તેની ગતિ હજુ સામાન્ય કરતાં ધીમી હોવાનું ભારતીય હવામાન વિભાગ (IMD)એ જણાવ્યું છે. હાલમાં ચોમાસું મહારાષ્ટ્ર, તેલંગાણા, છત્તીસગઢ, ઝારખંડ અને બિહારના કેટલાક વિસ્તારો સુધી પહોંચી ગયું છે અને આગામી બે-ત્રણ દિવસમાં વધુ વિસ્તારોમાં આગળ વધવા માટે પરિસ્થિતિ અનુકૂળ હોવાનું માનવામાં આવે છે.
ગુજરાતમાં ક્યાં પડશે વરસાદ?
ગુજરાતમાં હાલ પ્રિ-મોન્સૂન એક્ટિવિટી સક્રિય છે. હવામાન વિભાગના તાજેતરના બુલેટિન મુજબ આજે દક્ષિણ ગુજરાતના મોટાભાગના જિલ્લાઓમાં હળવાથી મધ્યમ વરસાદ અથવા ગાજવીજ સાથે વરસાદી ઝાપટાં પડવાની સંભાવના છે. સુરત, નવસારી, વલસાડ, ડાંગ, તાપી, ભરૂચ, નર્મદા, વડોદરા અને છોટાઉદેપુર સહિતના વિસ્તારોમાં વરસાદી માહોલ જોવા મળી શકે છે. દમણ અને દાદરા-નગર હવેલીમાં પણ વરસાદની શક્યતા વ્યક્ત કરવામાં આવી છે.
આ ઉપરાંત અમદાવાદ, ખેડા, આણંદ, પંચમહાલ અને દાહોદ જિલ્લાના કેટલાક વિસ્તારોમાં ગાજવીજ સાથે વરસાદ પડી શકે છે. સૌરાષ્ટ્રના રાજકોટ, અમરેલી, ભાવનગર, ગીર સોમનાથ, બોટાદ અને દીવમાં પણ છૂટાછવાયા વરસાદી ઝાપટાં પડવાની શક્યતા છે. જ્યારે રાજ્યના અન્ય વિસ્તારોમાં હવામાન મુખ્યત્વે સૂકું રહેવાની આગાહી કરવામાં આવી છે.
11 રાજ્યો માટે ભારે વરસાદની ચેતવણી
IMDએ દેશના ઓછામાં ઓછા 11 રાજ્યો અને કેન્દ્રશાસિત પ્રદેશોમાં ભારેથી અતિભારે વરસાદની ચેતવણી જાહેર કરી છે. ઉત્તર-પૂર્વ ભારત, પૂર્વીય રાજ્યો તેમજ દક્ષિણ ભારતના કેટલાક ભાગોમાં ભારે વરસાદ પડી શકે છે. બીજી તરફ બિહાર, ઝારખંડ, ઓડિશા અને રાજસ્થાનમાં ગાજવીજ અને તેજ પવન સાથે વરસાદની શક્યતા વ્યક્ત કરવામાં આવી છે. કેટલાક વિસ્તારોમાં ગરમી અને હીટવેવની સ્થિતિ યથાવત રહેવાની પણ આગાહી છે.
ગુજરાતમાં ચોમાસું કેમ મોડું પડી રહ્યું છે?
સામાન્ય રીતે ગુજરાતમાં 15 જૂનની આસપાસ ચોમાસાની સત્તાવાર એન્ટ્રી થઈ જતી હોય છે, પરંતુ આ વર્ષે ચોમાસું હજુ રાજ્ય સુધી પહોંચ્યું નથી. હવામાન નિષ્ણાતોના જણાવ્યા અનુસાર અરબ સાગર અને બંગાળની ખાડીમાં ચોમાસાના પવનોને આગળ ધપાવવા માટે જરૂરી અનુકૂળ પરિસ્થિતિઓનો અભાવ છે. ઉપરાંત ગુજરાતથી ઓડિશા સુધી ઉચ્ચ દબાણનો પટ્ટો (હાઈ પ્રેશર બેલ્ટ) સર્જાતા ચોમાસાની ગતિ ધીમી પડી છે.
25 જૂન બાદ બદલાશે ચિત્ર
હવામાન વિભાગના અનુમાન પ્રમાણે 25 જૂન પછી વાતાવરણમાં મોટો ફેરફાર જોવા મળી શકે છે. લો-લેવલ સોમાલી જેટ મજબૂત બનતા અરબ સાગર તરફથી ભેજવાળા પવનોને બળ મળશે. સાથે જ અરબ સાગર અને બંગાળની ખાડીમાં સાયક્લોનિક સર્ક્યુલેશન સર્જાવાની સંભાવના છે, જેના કારણે વરસાદી સિસ્ટમ વધુ સક્રિય બનશે.
હવામાન નિષ્ણાતોનું માનવું છે કે જૂનના અંતિમ સપ્તાહમાં ગુજરાતમાં ચોમાસું જોર પકડી શકે છે અને રાજ્યના મોટા ભાગના વિસ્તારોમાં સાર્વત્રિક વરસાદી માહોલ સર્જાઈ શકે છે. જેના કારણે ખેડૂતો સહિત સામાન્ય લોકોને ગરમીમાંથી મોટી રાહત મળવાની આશા છે.
