રાજ્યના અગરિયા વિસ્તારના શ્રમિકો-વાલીઓના બાળકોને પ્રારંભિક શિક્ષણ ઘરઆંગણે પૂરૂં પાડવાના પાયલોટ પ્રોજેકટ રૂપે ‘‘સ્કૂલ ઓન વ્હીલ’’ હરતી-ફરતી શાળાનો પ્રારંભ કરવામાં આવ્યો છે. સર્વશિક્ષા અભિયાન દ્વારા આ હેતુસર રૂ. ૩.પ૦ લાખના અંદાજીત ખર્ચે રાજ્ય માર્ગ વાહન વ્યવહાર નિગમની બિનવપરાશી બસને મોબાઇલ શિક્ષણ સુવિધાથી સજ્જ કરવામાં આવી છે.
આ સ્કૂલ ઓન વ્હીલમાં બારીઓમાં નવી ટેકનોલોજીના લુવર્સ લગાવવામાં આવ્યા છે જેથી રેતી કે પાણી અંદર પ્રવેશી ન શકે ઉપરાંત પીવીસી ફલોરીંગ, ગ્રીન બોર્ડ, ૩.૭ કે.વી.ની અપગ્રેડ સોલાર સિસ્ટમ, ર૯ ઇંચ ટી.વી., સેટઅપ બોકસ (ડી-ટુ-એચ), ૬ પંખા અને ૬ એલ.ઇ.ડી. લાઇટ, ફાયર એસ્ટિંગવિસર તથા પીવાના પાણી માટેની ટેન્ક, એક ખુરશી, ૧૮ રાઇટીંગ ડેસ્કની સુવિધાઓ ઉપલબ્ધ બનાવાઇ છે.
આ પ્રયોગ સફળ થયેથી આગામી સમયમાં વધુ ૩૦ જેટલી બસોને જી.એસ.આર.ટી.સી.ના સહયોગથી ‘‘સ્કૂલ ઓન વ્હિલ’’ પ્રોજેકટ તરીકે મોડિફાય કરવાનું રાજ્ય સરકારનું આયોજન છે. લગભગ ૧ર૦૦ જેટલાં બાળકોને તબક્કાવાર તેનો લાભ અપાશે. જ્યારે અગરિયા વિસ્તારના બાળકો પોતાની મૂળ શાળામાં જાય ત્યારે આ બસનો ઉપયોગ બીજા સ્થળાંતર કરતાં બાળકો માટે પણ કરી શકાશે તેવું પણ નક્કી કરવામાં આવ્યું છે.
અત્રે એ નિર્દેશ કરવો જરૂરી છે કે સર્વ શિક્ષા અભિયાનનો મુખ્ય ઉદ્દેશ રાઇટ ટુ એજ્યુકેશન એકટની જોગવાઇ મુજબ ૬ થી ૧૪ વર્ષના તમામ બાળકોના નામાંકન, સ્થાયીકરણ, માળખાકીય સુવિધાઓ, ગુણવત્તાયુકત શિક્ષણ પૂરૂં પાડી તેમનું ધોરણ ૧ થી ૮નું પ્રારંભિક શિક્ષણ પૂરૂં પાડવાનો છે.
રાજ્યમાં જુદી-જુદી ભૌગોલિકતા, સામાજિક અને વ્યવસાયિક વૈવિધ્યતાને કારણે કે વાલીઓના સ્થળાંતર જેવા કારણોથી ખાસ કરીને અગરિયા વિસ્તારના જિલ્લાઓ કચ્છ, પાટણ, સુરેન્દ્રનગર, અમરેલી, બનાસકાંઠા, ભાવનગર, ભરૂચ જિલ્લાઓમાં વાલીઓ છ થી આઠ માસના સમયગાળા દરમિયાન અગરિયા વિસ્તારમાં કામગીરી માટે સ્થળાંતર કરે છે.
મુખ્યમંત્રી વિજયભાઇ રૂપાણીએ નાયબ મુખ્યમંત્રી નીતિનભાઇ પટેલ અને શિક્ષણમંત્રી ભૂપેન્દ્રસિંહ ચુડાસમાની ઉપસ્થિતિમાં ગાંધીનગરમાં આ પાયલોટ પ્રોજેક્ટનો પ્રારંભ કરાવ્યો છે.
રાજ્ય સરકારે સૌને માટે શિક્ષણ-સહજ, સરળ બનાવવાના ઉદાત ભાવથી રાજ્યનું એક પણ બાળક શિક્ષણથી વંચિત ન રહે તે સાથે અગરિયા વિસ્તારના સ્થળાંતર કરતાં પરિવારના બાળકો પણ શિક્ષણથી વંચિત ના રહે અને કામના સ્થળે અગરિયાના બાળકોને શિક્ષણની સુવિધા તેમજ ટેકનોલોજીના ઉપયોગથી શિક્ષણ પ્રાપ્ત થાય તે માટે ‘‘સ્કૂલ ઓન વ્હિલ’’ હરતી ફરતી શાળા પ્રોજેકટ પાયલોટ બેઝ પર શરૂ કર્યો છે.
સર્વ શિક્ષા અભિયાન દ્વારા તૈયાર કરવામાં આવેલ ઇ-કન્ટેન્ટના ઉપયોગથી સ્થળાંતરના સમયગાળા દરમિયાન એટલે કે ઓકટોબરથી એપ્રિલ માસ દરમિયાન અગરિયા વિસ્તારમાં બાળકો વાલી સાથે રહી શિક્ષણ પ્રાપ્ત કરશે.