પ્રેમ જાતિ, ધર્મ, સમુદાય કે અમીરી-ગરીબી જોતો નથી. એવા ઘણા કિસ્સાઓ સામે આવ્યા છે જેમાં પ્રેમ ઉંમર અને લિંગની મર્યાદાઓ પણ ઓળંગી જાય છે. તમને જાણીને નવાઈ લાગશે, પણ આ હકીકત છે કે, આજે એવા ઘણા કપલ્સ છે જેમના વચ્ચે ઉંમરનો મોટો તફાવત હોય. હાલમાં જ એક અમેરિકન લેસ્બિયન કપલ ખૂબ જ ચર્ચામાં છે, જે બંને મહિલાઓ છે અને તેમની ઉંમરમાં 19 વર્ષનો તફાવત છે. 35 વર્ષની એક મહિલાને આધેડ વયની સ્ત્રી સાથે પ્રેમ થઈ ગયો અને મુલાકાતના માત્ર 3 મહિનામાં જ બંનેએ લગ્ન કરી લીધા હતા. જોકે, તેમને સોશિયલ મીડિયા પર ભારે ટ્રોલિંગનો સામનો કરવો પડે છે, અને લોકો તેમને મા-દીકરી સમજી લે છે.
‘પીપલ’ વેબસાઇટના અહેવાલ મુજબ, અમેરિકાના મેરીલેન્ડમાં રહેતું આ કપલ હાલ ચર્ચાનું કેન્દ્ર બન્યું છે. 36 વર્ષની ઓલિવિયા રીડ અને 55 વર્ષની કેલી રીડની મુલાકાત 2023માં ડેટિંગ એપ ‘બમ્બલ’થી થઈ હતી. શરૂઆતમાં બંને વચ્ચે લગભગ બે અઠવાડિયા સુધી વાતો ચાલી હતી. જ્યારે તેમને એકબીજાનો સ્વભાવ ગમ્યો, ત્યારે મેસેચ્યુસેટ્સમાં રહેતી કેલી 8 કલાક ડ્રાઈવ કરીને ઓલિવિયાને મળવા ગઈ હતી. બંનેએ સાથે વીકએન્ડ વિતાવ્યો અને ત્યારે જ તેમને અહેસાસ થઈ ગયો કે, તેમનો આ સંબંધ લાંબો ચાલવાનો છે.
તેણે પોતાના મિત્રો સાથે આ સંબંધ વિશે વાતચીત કરી અને, તેમને પણ કોઈ વાંધો નહોતો. માર્ચ મહિનામાં કેલી ઓલિવિયાને મળવા ગઈ હતી અને, તેના માત્ર 3 અઠવાડિયા પછી બંને સાથે રહેવા લાગ્યા હતા. જૂનના અંત સુધીમાં તો બંનેએ લગ્ન પણ કરી લીધા હતા. ઓલિવિયાએ જણાવ્યું કે, તેણે ક્યારેય વિચાર્યું નહોતું કે, તેના લગ્ન આટલી જલ્દી થઈ જશે. ઓલિવિયાએ વધુમાં જણાવ્યું કે, કેલીને મળતા પહેલા જ તે એક પુરુષ સાથેના 6 વર્ષ જૂના સંબંધમાંથી બહાર આવી હતી, ત્યારે જ તેને સમજાયું હતું કે, તેને સ્ત્રીઓ પણ ગમે છે.
તો બીજી તરફ કેલીનું કહેવું છે કે, ઓલિવિયાને મળતા પહેલા તેના છૂટાછેડા થઈ ચૂક્યા હતા અને, તે વર્ષથી એકલી હતી. તેણે આ દરમિયાન એપની મદદથી કેટલાક લોકોને ડેટ કર્યા હતા, પરંતુ તેને કોઈ પસંદ આવ્યું નહોતું. પણ પહેલી જ વાર ઓલિવિયાને મળ્યા પછી તેને લાગ્યું કે, બસ આ જ સાચો સાથી છે! કપલની ઉંમરમાં ભલે 19 વર્ષનો તફાવત હોય, પણ તેમની વચ્ચે ઘણી વસ્તુઓ સમાન છે. તેમને બધું જ સાથે કરવું ગમે છે, પછી ભલે તે રાશન ખરીદવા જવાનું હોય કે ટીવી શો જોવાનો હોય. જોકે, સોશિયલ મીડિયા પર તેમને લોકોની ટીકાઓ સહન કરવી પડે છે, કારણ કે ઘણા લોકો ઉંમરના તફાવતને કારણે તેમને મા-દીકરી સમજી બેસે છે.
