ન્યુયોર્ક: ન્યૂયોર્કમાં રમાઈ રહેલી યુએસ ઓપન ટેનિસ ચેમ્પિયનશીપમાં વર્તમાન ચેમ્પિયન રાફેલ નડાલે શક્તિશાળી રશિયન ખેલાડી કારેન ખચાનવ ઉપર રોમાંચક મેચમાં જીત મેળવીને આગામી રાઉન્ડમાં કૂચ કરી લીધી હતી. ચાર સેટમાં ત્રીજા રાઉન્ડની મેચ ચાલી હતી. પ્રથમ સેટ ગુમાવી દીધા બાદ નડાલે આ મેચ ૫-૭, ૭-૫, ૭-૬, ૭-૬ થી જીત મેળવી હતી. સ્પેનિશ ખેલાડીએ પ્રથમ સેટ ગુમાવી દીધો હતો પરંતુ ત્યારબાદ જોરદાર વાપસી કરીને બાકીના ત્રણ સેટ જીતી લીધા હતા. પ્રથમ ક્રમાંકિત ખેલાડી રાફેલ નડાલ હવે અંતિમ ૧૬ની મેચમાં જાર્જિયાના નિકોલોસ સામે રમશે. ૧૭ વખતના ગ્રાન્ડસ્લેમ ચેમ્પિયન નડાલે ચોથી વખત યુએસ ઓપનમાં તાજ જીતવાના ઈરાદા સાથે એન્ટ્રી કરી છે.
એક વખતે એવું લાગતું હતું કે રશિયન ખેલાડી અપસેટ સર્જશે પરંતુ નડાલે જારદરા વાપસી કરીને બાકીના ત્રણ સેટ જીતી લીધા હતા. અગાઉની બે મેચોમાં એક પણ સેટ ન ગુમાવ્યા બાદ ત્રીજા રાઉન્ડની મેચમાં નડાલ પ્રથમ સેટ હારી ગયો હતો. મહિલા વર્ગમાં રશિયાની સ્ટાર ખેલાડી શારાપોવાએ જીત મેળવીને ત્રીજા રાઉન્ડમાં કૂચ કરી હતી. આ ઉપરાંત અમેરિકાની મેડિસન કીની પણ જીત થઈ હતી. આ વખતની સ્પર્ધા ખુબ જ રોમાંચક દેખાઈ રહી છે. સિંગલ્સ ચેમ્પિયન બનનાર ખેલાડીને ૩.૮ મિલિયન ડોલરની ઇનામી રકમ આપવામાં આવશે જ્યારે સિંગલ્સ ફાઈનાલિસ્ટને ૧૮૫૦૦૦૦ ડોલરની રકમ આપવામાં આવનાર છે. સેમિફાઇનલ અને ક્વાર્ટર ફાઈનલમાં વિજેતા બનનારને પણ જંગી રકમ ચુકવવામાં આવનાર છે. સ્પેનના રાફેલ નડાલ સામે આ વખતે મોટા પડકાર રહેલા છે. રાફેલ નડાલ સામે આ વખતે પુરુષોની સિંગલ્સ ફાઈનલ પહેલા નોવાક જાકોવિક અને રોજર ફેડરર પડકાર ફેંકી શકે છે. નડાલને પોતાના તાજને જાળવવા માટે જારદાર મહેનત કરવી પડશે. આવી જ રીતે મહિલા સિંગલ્સમાં પણ સ્ટેફાનેને તાજને જાળવવા મુશ્કેલી રહેશે. કારણ કે, સેરેના વિલિયમ્સ પણ મેદાનમાં ઉતરી રહી છે.
ઇતિહાસ ઉપર નજર કરવામાં આવે તો યુએસ ઓપનમાં સૌથી વધુ વખત તાજ પાંચ વખત રોજર ફેડરર, જીમી કોનર્સ, પેટ સામ્રસે જીત્યા છે જ્યારે મહિલા વર્ગમાં સેરેના વિલિયમ્સે છ વખત તથા ક્રિસ એવર્ટે પણ છ વખત મહિલા સિંગલ્સનો તાજ જીત્યો છે. ગયા વર્ષની સરખામણીમાં ઇનામી રકમમાં પાંચ ટકાનો વધારો કરવામાં આવ્યો છે. રેકોર્ડ ૩.૮ મિલિયન ડોલરની રકમ ખર્ચ કરવામાં આવનાર છે. સિંગલ્સ વિજેતાને ગયા વર્ષની સરખામણીમાં ૨.૭ ટકા વધુ રકમ મળશે.
