સંસદનું વિશેષ સત્ર શરૂ ૧૮ સપ્ટેમ્બરથી શરૂ અને ૨૨ સપ્ટેમ્બર સુધી ચાલશે. આ પહેલા રવિવારે ઉપરાષ્ટ્રપતિ અને રાજ્યસભાના અધ્યક્ષ જગદીપ ધનખરે નવા સંસદ ભવનમાં રાષ્ટ્રધ્વજ ફરકાવ્યો હતો. સંસદ સંકુલમાં સંબોધન દરમિયાન પીએમ મોદીએ કહ્યું કે ચંદ્ર પર ત્રિરંગો લહેરાવી રહ્યો છે. શિવ શક્તિ પોઈન્ટ પ્રેરણાનું કેન્દ્ર બની ગયું છે. ચંદ્રયાન ૩ પ્રેરણાનું નવું કેન્દ્ર છે. G-૨૦ની અભૂતપૂર્વ સફળતા, ઘણી શક્યતાઓ અને સફળતા અને ભારત ગ્લોબલ સાઉથનો અવાજ બની ગયું છે. વડાપ્રધાન નરેન્દ્ર મોદીએ કહ્યું કે આ સત્ર નાનું છે, પરંતુ સમયની દૃષ્ટિએ મોટું સત્ર છે. આ ઐતિહાસિક ર્નિણયોનું સત્ર હશે. તેમણે વધુમાં કહ્યું કે જ્યારે આખી દુનિયામાં આ (ચંદ્રયાન-૩) જેવી સિદ્ધિ પ્રાપ્ત થાય છે, ત્યારે તે આધુનિકતા અને ટેક્નોલોજી સાથે જોડાયેલી છે. અને જ્યારે આવું થાય છે, ત્યારે ઘણી તકો આપણા દ્વારે ઊભી રહે છે.
વડાપ્રધાન નરેન્દ્ર મોદીએ કહ્યું કે ભારતને હંમેશા એ વાત પર ગર્વ રહેશે કે આફ્રિકન યુનિયન જી-૨૦નું કાયમી સભ્ય બન્યું છે. આ બધું ભારતના ઉજ્જવળ ભવિષ્યની નિશાની છે. ગઈકાલે એક આંતરરાષ્ટ્રીય કોન્ફરન્સ સેન્ટર ‘યશોભૂમિ’ પણ દેશને સમર્પિત કરવામાં આવ્યું હતું. વધુમાં PM મોદીએ કહ્યું કે આવતીકાલે ગણેશ ચતુર્થીનો પવિત્ર તહેવાર છે. ગણેશજીને વિઘ્નો દૂર કરનાર માનવામાં આવે છે. હવે ભારતની વિકાસયાત્રામાં કોઈ અડચણો નહીં આવે, હવે ભારત તેના તમામ સંકલ્પો અને સપનાઓને કોઈપણ અવરોધ વિના પૂરા કરશે. તેથી, ગણેશ ચતુર્થીના દિવસે આ નૂતન પ્રસ્થાન નવા ભારતના તમામ સપનાઓ પૂર્ણ કરશે.
