અમદાવાદ સહિત રાજ્યમાં હવે ઠંડીનો અનુભવ થવા લાગી ગયો છે. ખાસ કરીને અમદાવાદમાં તો સવારમાં લોકો ઠંડી અનુભવી રહ્યા છે. નલિયામાં પારો એકાએક ગગડ્યો હતો અને લઘુત્તમ તાપમાન ઘટીને ૧૨.૬ ડિગ્રી થઇ ગયું હતું. અમદાવાદમાં પણ પારો હવે ૨૦થી નીચે પહોંચી ગયો છે. ઠંડી વધવાના સ્પષ્ટ સંકેત દેખાઈ રહ્યા છે. કારણ કે, જમ્મુ કાશ્મીર, ઉત્તરાખંડ અને હિમાચલમાં ભારે હિમવર્ષા છેલ્લા ચાર દિવસથી થઇ રહી છે. મેદાની ભાગોમાં પણ ઘણી જગ્યાએ વરસાદ થયો છે જેમાં દિલ્હીનો સમાવેશ થાય છે. રાજસ્થાનમાં યલો એલર્ટની જાહેરાત કરવામાં આવી છે. અમદાવાદમાં સવારમાં ઓફિસ જતા લોકો હવે ગરમ વસ્ત્રોમાં સજ્જ દેખાયા હતા. વહેલી સવારમાં અને મોડી રાત્રે ઠંડીનો અનુભવ થઇ રહ્યો છે. બપોરના ગાળામાં હજુ પણ લોકોને ઓછા પ્રમાણમાં ગરમીનો અનુભવ થઇ રહ્યો છે.
આમ હવે ધીરેધીરે ઠંડી પોતાની અસર દેખાડતી જઇ રહી છે. ત્યારે આગામી દિવસોમાં હજુ પણ ઠંડીનો પારો વધુ નીચે સરકે તેવી આગાહી પણ વ્યકત કરાઇ છે ત્યારે શિયાળાની ઠંડીપ્રેમી નાગરિકો ખુશીની લાગણી વ્યકત કરી રહ્યા છે. મોટાભાગના લોકો મોડી રાત્રે ગરમ વસ્ત્રોમાં પણ નજરે પડવા લાગી ગયા છે. તાપમાનમાં આગામી બે દિવસ દરમિયાન કોઇ મોટા ફેરફારની શક્યતા દેખાઈ રહી નથી પરંતુ ઠંડા પવનોના લીધે ફુલગુલાબી ઠંડીનો અનુભવ હવે લોકોને થઇ રહ્યો છ.વહેલી સવારમાં લોકો ફિટનેસને જાળવવા માટે પણ વધુ સાવધાન બન્યા છે અને ટાઈમ ટેબલ બનાવી રહ્યા છે.
ઠંડીની શરૂઆત થતા ફિટનેસ જાળવવા માટેનો આ સર્વશ્રેષ્ઠ ગાળો હોવાથી જરૂરી નિષ્ણાતોની મદદ લેવાઈ રહી છે. ફુલગુલાબી ઠંડીમાં વહેલી સવારમાં બાગ બગીચા હવે હાઉસફુલ નજરે પડી રહ્યા છે. ફિટનેસ મેળવવા માટે જીમમાં જતા લોકોની સંખ્યામાં પણ વધારો થઈ રહ્યો છે. હાલમાં મિશ્ર સિઝન હોવાના લીધે નાના બાળકો અને મોટી વયના લોકોને સાવધાન રહેવાનો પણ ગાળો છે. હાલમાં તબીબો પાસે જુદા જુદા પ્રકારના બેવડી સિઝનના ઈન્ફેકશન અને ફુડ પોઈઝનીંગના કેસો સાથે લોકો વધુ આવી રહ્યા છે. અમદાવાદ શહેરમાં આજે લઘુત્તમ તાપમાન ૧૯.૧ ડિગ્રી રહ્યું હતું. બીજી બાજુ નલિયામાં તાપમાન ગગડીને ૧૨.૬ ડિગ્રી સુધી નીચે પહોંચી ગયું હતું. વાદળછાયુ વાતાવરણ આવતીકાલે પણ યથાવત રહેવાની શક્યતા છે.
