ભારતે અમેરિકા સમક્ષ માંગણી મૂકી, જેની અમેરિકાએ સકારાત્મક ખાતરી આપી
બિઝનેસમેનને હવે પહેલા કરતા ઓછા સમયમાં અમેરિકન વિઝા મળશે. આ સિસ્ટમ એપ્રિલથી અમલમાં આવી શકે છે તો H1B વિઝા પર અમેરિકામાં કામ કરતા વ્યાવસાયિકોના પરિવારો પણ અમેરિકામાં જ વિઝા રિન્યુઅલની સુવિધા મેળવી શકે છે. આ માટે અમેરિકા તરફથી સકારાત્મક ખાતરી આપવામાં આવી છે. ગયા શુક્રવારે નવી દિલ્હીમાં વાણિજ્ય અને ઉદ્યોગ પ્રધાન પીયૂષ ગોયલ અને યુએસ એમ્બેસેડર કેથરિના તાઈના નેતૃત્વમાં યુએસ-ભારત વેપાર નીતિ મંચની બેઠકનું આયોજન કરવામાં આવ્યું હતું. જેમાં આ મુદ્દાઓ પર ચર્ચા કરવામાં આવી હતી. શનિવારે ગોયલે કહ્યું કે ઈ-૧ અને ઈ-૨ વિઝા મેળવવામાં ઘણો સમય લાગે છે, અમેરિકા સમક્ષ સમય ઘટાડવાની માંગ કરવામાં આવી હતી. તેમણે કહ્યું કે એપ્રિલથી વિઝા પહેલા કરતા ઓછા સમયમાં મળવા લાગશે. સ્ટુડન્ટ વિઝામાં પહેલેથી જ કોઈ સમસ્યા નથી. તેમણે કહ્યું કે H1B વિઝા પ્રોફેશનલ્સને હવે વિઝા રિન્યુઅલ માટે ભારત આવવાની જરૂર નથી, પરંતુ તેમના પરિવારો પાસે આ સુવિધા નથી. ભારતે અમેરિકા સમક્ષ પરિવારને પણ આ સુવિધા આપવાની માગણી મૂકી હતી, જેના પર અમેરિકાએ સકારાત્મક ખાતરી આપી છે. આયાત-નિકાસ સાથે સંકળાયેલા ઉદ્યોગપતિઓને ઈ-૧ વિઝાની જરૂર પડે છે. રોકાણના ધોરણે અમેરિકામાં કામ કરતા લોકોને ઈ-૨ વિઝાની જરૂર પડે છે. આ વિઝા મેળવવામાં ઘણા મહિનાઓ લાગે છે. વાણિજ્ય સચિવ સુનીલ બર્થવાલે કહ્યું કે બેઠકમાં બંને દેશોની સરકારી ખરીદીમાં એકબીજાની ભાગીદારી વધારવા પર ગંભીરતાથી ચર્ચા કરવામાં આવી હતી. અમેરિકી સરકારની પ્રાપ્તિમાં ભારતની ભાગીદારી આપણી નિકાસમાં નોંધપાત્ર વધારો કરી શકે છે. જાે કે, બદલામાં અમેરિકાને પણ ભારતની સરકારી ખરીદીમાં તક આપવી પડશે.
