નવી દિલ્હી: ICC ટી20 વર્લ્ડ કપ 2026માં ભારતે અત્યાર સુધીમાં બે મેચ રમી છે અને બંનેમાં જીત નોંધાવી છે. અમેરિકા સામે 32 રને જીત મેળવ્યા બાદ નામીબિયા સામે પણ 93 રને જીત મેળવી છે. હવે 15 ફેબ્રુઆરી એટલે કે રવિવારે ટીમ ઇન્ડિયાનો સામનો પાકિસ્તાન સામે થવાનો છે. આ હાઈ વોલ્ટેજ મેચ માટે બધા આતુરતાથી રાહ જોઈ રહ્યાં છે. કોલંબોમાં પ્રેમદાસા સ્ટેડિયમમાં આ મેચ રમાવાની છે. જો કે, પાકિસ્તાન સામે મેચ પહેલા ભારતના નામે એક મોટ રેકોર્ડ નોંધાઈ ગયો છે.
ટી20 વર્લ્ડ કપમાં સતત 10 મેચ જીતનાર પ્રથમ ટીમ
નામિબિયા સામેની જીત સાથે ભારતે ટી20 વર્લ્ડ કપમાં સતત 10મી જીત નોંધાવી. 2024થી 2026 સુધી વિશ્વ કપમાં ભારત એકપણ મેચ હાર્યું નથી. આ સાથે ભારત ટી20 વર્લ્ડ કપમાં સતત 10 મેચ જીતનાર પ્રથમ દેશ બન્યો છે.
આ પહેલા આ રેકોર્ડ સંયુક્ત રીતે દક્ષિણ આફ્રિકા અને ઓસ્ટ્રેલિયાના નામે હતો, જેમણે સતત 8-8 મેચ જીતી હતી.
ટી20 વર્લ્ડ કપમાં સતત સૌથી વધુ જીત નોંધાવનાર ટીમો
ભારત – 10* (2024-2026)
દક્ષિણ આફ્રિકા – 8 (2024)
ઓસ્ટ્રેલિયા – 8 (2022-2024)
ઇંગ્લેન્ડ – 7 (2010-2012)
ભારત – 7 (2012-2014)
નામિબિયાના કેપ્ટન ગેરહાર્ડ ઇરાસમસે ટોસ જીતીને પ્રથમ બોલિંગ કરવાનો નિર્ણય લીધો હતો. નિર્ધારિત 20 ઓવરમાં ભારતે પ્રથમ બેટિંગ કરતાં 9 વિકેટે 209 રન બનાવ્યા. ઇશાન કિશને સર્વાધિક 61 રન બનાવ્યા, જ્યારે હાર્દિક પંડ્યાએ 52 રનની તોફાની ઇનિંગ રમી.
210 રનના લક્ષ્યાંકનો પીછો કરતા નામિબિયાની ટીમ 18.2 ઓવરમાં માત્ર 116 રન પર જ ઓલ આઉટ થઈ ગઈ. ભારત તરફથી સૌથી વધુ 3 વિકેટ વરુણ ચક્રવર્તીએ લીધી. અક્ષર પટેલ અને હાર્દિક પંડ્યાએ 2-2 વિકેટ લીધી. અર્શદીપ સિંહ, શિવમ દુબે અને જસપ્રીત બુમરાહને 1-1 વિકેટ મળી.
