ટી20 વર્લ્ડ કપ 2026 હવે પોતાના સુપર 8 રાઉન્ડમાં પહોંચી ચૂક્યો છે. 20માંથી 12 ટીમો બહાર થઈ ચૂકી છે અને બાકીની 8 ટીમો ખિતાબી જીત માટે રેસમાં છે. ટી20 વર્લ્ડ કપ એક મોટી આઈસીસી ટૂર્નામેન્ટ છે, જેને જીતવી દરેક ટીમ અને ખેલાડીનું સપનું હોય છે. પરંતુ આખું કરિયર પૂરું થવા છતાં કોઈનું સપનું પૂરું થાય છે અને કોઈનું નહીં. આ વર્ષે ટુર્નામેન્ટ પછી કેટલાક ખેલાડી એવા છે જે ટી20 ફોર્મેટમાંથી સંન્યાસની જાહેરાત કરી શકે છે. આવા જ પાંચ ખેલાડીઓની યાદીમાં નીચે મુજબ છે.
સૂર્યકુમાર યાદવ
ભારતીય ટી20 ટીમના કેપ્ટન સૂર્યકુમાર યાદવ આ યાદીમાં સૌથી ચોંકાવનારું નામ છે. 35 વર્ષીય સુર્યા હાલમાં ટીમની કેપ્ટનશીપ સંભાળી રહ્યા છે, પરંતુ વધતી ઉંમર અને ભવિષ્યની યોજનાઓને ધ્યાનમાં લેતાં એવું માનવામાં આવે છે કે વર્લ્ડ કપ બાદ તેઓ ટી20 ફોર્મેટમાંથી દૂર થઈ શકે છે જેથી યુવા ખેલાડીઓને તક મળી શકે. જોકે તેમનું ફોર્મ ભારત માટે હંમેશા મહત્વપૂર્ણ રહ્યું છે, પરંતુ 2026નો આ મેગા ઇવેન્ટ તેમના આંતરરાષ્ટ્રીય કરિયરની છેલ્લી મંજિલ બની શકે છે.
ગ્લેન મેક્સવેલ (ઓસ્ટ્રેલિયા)
ઓસ્ટ્રેલિયન ઓલરાઉન્ડર ગ્લેન મેક્સવેલ પહેલેથી જ વનડે ક્રિકેટમાંથી નિવૃત્તિ લઈ ચૂક્યા છે અને હાલમાં ફક્ત ટી20 ઇન્ટરનેશનલમાં સક્રિય છે. મેક્સવેલ હવે 37 વર્ષનો થવા જઈ રહ્યો છે. પૂર્વ દિગ્ગજ રિકી પોન્ટિંગે પણ સંકેત આપ્યા છે કે 2026 વર્લ્ડ કપ મેક્સવેલની છેલ્લી આંતરરાષ્ટ્રીય ટૂર્નામેન્ટ બની શકે છે. ટી20 વર્લ્ડ કપમાં તેમનું નબળું ફોર્મ એ પણ સૂચવે છે કે હવે તેઓમાં પહેલાની જેમ ચમક રહી નથી. ઓસ્ટ્રેલિયન ટીમને આ વર્લ્ડ કપના ગ્રુપ સ્ટેજમાંથી જ બહાર થવું પડ્યું હતું, જેમાં તેમનું ફોર્મ પણ એક કારણ ગણાઇ રહ્યું હતુ.
ડેવિડ મિલર (દક્ષિણ આફ્રિકા)
દક્ષિણ આફ્રિકાના દિગ્ગજ મિડલ ઓર્ડર બેટ્સમેન ડેવિડ મિલરે લાંબા સમયથી ટીમ માટે ફિનિશર તરીકે મહત્વપૂર્ણ ભૂમિકા ભજવી છે. 2010થી આંતરરાષ્ટ્રીય ક્રિકેટ રમતા મિલરે 2024 વર્લ્ડ કપના ફાઇનલમાં મળેલી હાર બાદ 2026ને પોતાનું અંતિમ લક્ષ્ય બનાવ્યું હતું. હવે ટૂર્નામેન્ટ નિર્ણાયક તબક્કે પહોંચી છે ત્યારે આ અનુભવી બેટ્સમેન દક્ષિણ આફ્રિકાની જર્સીમાં પોતાના છેલ્લી કેટલાક મેચ રમી રહ્યો છે.
મહંમદ નબી (અફઘાનિસ્તાન)
અફઘાનિસ્તાન ક્રિકેટના સૌથી સિનિયર ખેલાડી મહંમદ નબી 41 વર્ષની ઉંમરે આ વર્લ્ડ કપના સૌથી વયસ્ક ખેલાડીઓમાંના એક છે. નબીએ પહેલેથી જ વનડે ક્રિકેટને અલવિદા કહી દીધું છે. અફઘાનિસ્તાન સુપર-8ની રેસમાંથી બહાર થતાં જ નબી આ ટૂર્નામેન્ટ બાદ પોતાના સંન્યાસની સત્તાવાર જાહેરાત કરી શકે છે.
આદિલ રશીદ (ઇંગ્લેન્ડ)
ઇંગ્લેન્ડના દિગ્ગજ લેગ સ્પિનર આદિલ રશીદ પણ પોતાના કરિયરના અંતિમ તબક્કામાં છે. 37 વર્ષીય રશીદ ઇંગ્લેન્ડની બે વર્લ્ડ કપ જીત (2019 અને 2022)માં મહત્વપૂર્ણ ભાગ રહ્યા છે. ટી20 ફોર્મેટમાં તેમની ચોકસાઈ અને વિકેટ લેવાની ક્ષમતા બેમિસાલ રહી છે. પરંતુ શક્ય છે કે તેઓ પણ આ ટૂર્નામેન્ટ બાદ ક્રિકેટને અલવિદા કહી દે.
