ભારતીય ક્રિકેટ ટીમના સ્ટાર બેટ્સમેન રિંકુ સિંહ જલ્દી જ મેદાનની બહાર પોતાની જિંદગીની નવી શરૂઆત કરવા જઈ રહ્યો છે. ઉત્તર પ્રદેશના જૌનપુરથી સમાજવાદી પાર્ટીની સાંસદ પ્રિયા સરોજની સાથે તેના લગ્ન હવે જૂન 2026માં થવા જઈ રહ્યાં છે. ઇન્ટરનેશનલ ક્રિકેટના વ્યસ્ત કાર્યક્રમના કારણે લગ્નની તારીખ પહેલા ઘણીવાર બદલવામાં આવી, પરંતુ હવે પરિવારે જૂનમાં લગ્ન ફાઇલન કર્યા છે. પરિજનો અનુસાર, ક્રિકેટ સિઝન પૂરી થયા પછી જ લગ્ન રાખવાનો નિર્ણય કર્યો, જેથી રિંકુ સિંહને વધુમાં વધુ સમય મળી શકે.
રિંકુ સિંહ અને પ્રિયા સરોજની સગાઈ 8 જૂન 2025ના રોજ લખનઉમાં યોજાઈ હતી. આ કાર્યક્રમ રાજકીય અને રમતગમત જગતના મોટા નામોની હાજરીને કારણે ભારે ચર્ચામાં રહ્યો હતો. આ સમારોહમાં સમાજવાદી પાર્ટીના પ્રમુખ અખિલેશ યાદવ BCCIના ઉપાધ્યક્ષ રાજીવ શુક્લા, તેમજ અનેક સાંસદો અને ધારાસભ્યો હાજર રહ્યા હતા.
સગાઈ બાદ શરૂઆતમાં લગ્નની તારીખ 18 નવેમ્બર 2025 નક્કી કરવામાં આવી હતી, પરંતુ વ્યસ્ત ક્રિકેટ શેડ્યૂલના કારણે તેને મુલતવી રાખવી પડી. ત્યારબાદ ફેબ્રુઆરી 2026નો વિકલ્પ સામે આવ્યો, પરંતુ એ સમયગાળામાં T20 વર્લ્ડ કપ અને ત્યારબાદ IPL યોજાવાને કારણે યોજના ફરી બદલવી પડી.
રિંકુ સિંહના મોટા ભાઈ સોનુ સિંહના જણાવ્યા મુજબ, લગ્ન ક્યાં યોજાશે તે અંગેનો અંતિમ નિર્ણય જલ્દી લેવામાં આવશે. હાલ લખનઉ અને વારાણસીને સંભવિત સ્થળો તરીકે જોવામાં આવી રહ્યા છે. લગ્ન બાદ અલીગઢમાં એક ભવ્ય રિસેપ્શન યોજાવાની શક્યતા છે, જેમાં રાજકારણ, ક્રિકેટ, ફિલ્મ જગત અને સમાજસેવા સાથે જોડાયેલી ઘણી જાણીતી હસ્તીઓ હાજર રહે તેવી ચર્ચા છે.
રિંકુ સિંહને દેશભરમાં ઓળખ IPL 2023 દરમિયાન મળી હતી, જ્યારે તેમણે ગુજરાત ટાઇટન્સ સામે યશ દયાલની બોલિંગ પર સતત પાંચ છક્કા મારીને સૌને ચોંકાવી દીધા હતા. આ બાદ તેઓ ટીમ ઇન્ડિયામાં સ્થાન મેળવવામાં સફળ રહ્યો. હવે ક્રિકેટના આ ચમકતા તારાના અને રાજકીય પરિવાર સાથે જોડાયેલા આ સંબંધ પર ફેન્સ તેમજ સિયાસી વર્તુળોની નજર ટકી રહી છે.
