અમદાવાદ : અમદાવાદ મ્યુનિસિપલ કોર્પોરેશન હસ્તકના ટાઉનહોલને હવે વધુ સુવિધાસજ્જ અને અદ્યતન બનાવવાની તજવીજ હાથ ધરાઇ છે. બહુ ટૂંકા સમયમાં શહેરની મધ્યમાં આવેલો હેરિટેજ સમાન ટાઉનહોલ રૂ. ૯ કરોડના ખર્ચે નવાં ક્લેવર ધારણ કરશે. મ્યુનિ. કોર્પો. દ્વારા થોડાં વર્ષ અગાઉ શહેરના એકમાત્ર ટાઉનહોલને સુવિધાસજ્જ બનાવાયો હતો. જૂની ઢબના ટાઉનહોલમાં ૧૧પ૦ બેઠકની સીટિંગ એરેજમેન્ટ સાથે આકર્ષક સીલિંગ, કાર્પેટ અને એરકન્ડિશનર સાથે મોટા પાયે રિનોવેશન કરાયું હતું, પરંતુ છેલ્લાં વર્ષોમાં ઊભી થયેલી જરૂરિયાતો અને ઊણપો વિશે હાથ ધરાયેલી નાગરિકો અને મ્યુનિસિપલ કાઉન્સિલરોની રજૂઆત બાદ ટાઉનહોલને અદ્યતન બનાવવાનો નિર્ણય લેવાયો છે. જો અગાઉના રિનોવેશન બાદ પણ ફરી એકવાર ટાઉનહોલ જર્જિરતતાના આરે છે, દિવસની ત્રણેય શિફ્ટથી ભરપૂર રહેતા ટાઉનહોલનું ઇન્ટિરિયર હવે ઊધઈના હવાલે છે.
લાઈટનાં બોક્સમાં ઊધઈ આવી જતાં લાઈટ માટેની પ્લેટો અને બોક્સ લબડી પડ્યાં છે. ખુરશી નીચેની કાર્પેટ જર્જિરત બની ગઈ છે. ક્યારેક લોકોના કાર્પેટમાં પગ ભરાઈ જવાથી પડી જવાના બનાવ પણ બની રહ્યા હોવાની ફરિયાદ થઈ રહી છે. ખુરશીની હાલત પણ ખરાબ બની છે. ટાઉનહોલના પા‹કગમાં અત્યારે ઠેર ઠેર ગાબડાં પડ્યાં છે. વોશરૂમ પણ હવે કાયાપલટ કરવા જેવા બન્યા છે એટલું જ નહીં, ટાઉનહોલનું બહારનું ક્લેવર પણ ખરાબ થયું છે. દીવાલ પર ક્યાંક વૃક્ષ ઊગી નીકળેલાં દેખાઈ રહ્યાં છે એ હવે ઐતિહાસિક ટાઉનહોલ રિનોવેશન ઝંખે છે.
આ અંગે મ્યુનિસિપલ કોર્પોરેશન વિભાગનાં સંબંધિત સૂત્રોએ જણાવ્યું હતું કે, ટાઉનહોલને રિનોવેટ કરવા અંગેની પ્રક્રિયા શરૂ થઈ ચૂકી છે. રિનોવેશનની કામગીરી અંગેનું પ્રેઝન્ટેશન તૈયાર થઈ રહ્યું છે, જે થોડા સમયમાં ફાઇનલ કરાયા બાદ આગળની વહીવટી કામગીરી હાથ ધરવામાં આવશે. ટાઉનહોલનાં સ્ટેજ લાઇટિંગ અને ઇકો સાઉન્ડ સિસ્ટમને અદ્યતન બનાવાશે. ખુરશી નવી લગાવવામાં આવશે. લાઇટિંગ, કાર્પેટ વગેરે લગાવાશે. પા‹કગની સુવિધા, વોશ રૂમ-ગ્રીન રૂમને પણ સુવિધાયુક્ત બનાવાશે. પીવાના પાણીની વ્યવસ્થા માટે કૂલર લગાવાશે, જ્યારે હાલનાં ઓછી કેપેસિટીવાળાં એરકન્ડિશનરને હટાવી કેસેટ એસીથી આખા હોલને વાતાનુકૂલિત કરવામાં આવશે. ટાઉનહોલને અદ્યતન બનાવવા જરૂરી કામગીરીની પ્રક્રિયા બાદ ટેન્ડરિંગ માટે ઓર્ડર આપી દેવાશે. જો કે, ટાઉનહોલના રિનોવેશનના નિર્ણયને લઇ શહેરના જાગૃત નાગરિકો અને કલાપ્રેમી જનતામાં ખુશીની લાગણી ફેલાઇ છે.
