રાજકોટ: શહેરમાં એક ચોંકાવનારો કિસ્સો સામે આવ્યો છે. પરિણીત પ્રેમિકાને મળવા જતા પ્રેમીને મોત મળ્યું હોવાની ઘટના સામે આવી છે. રાજકોટ શહેરના તાલુકા પોલીસ સ્ટેશન વિસ્તારમાં આવેલી લક્ષ્મણ ટાઉનશીપમાં ગત ગુરુવારના રોજ ચોથા માળેથી એક વ્યક્તિ જમીન ઉપર પટકાતા તેનું મોત નીપજ્યું હોવાની ઘટના સામે આવી હતી. સમગ્ર મામલાની જાણ થતા તાત્કાલિક અસરથી રાજકોટ શહેરના તાલુકા પોલીસનો કાફલો ઘટના સ્થળ ખાતે દોડી ગયો હતો. પોલીસની પ્રાથમિક તપાસમાં મૃતક બે સંતાનોનો પિતા હોવાનું તેમજ મૂળ કાલાવડનો રહેવાસી અને હાલ મેટોડા વિસ્તારમાં રહેતો હોવાનું જાણવા મળ્યું છે.
પોલીસની પ્રાથમિક પૂછપરછમાં મૃતક મનીષ લક્ષ્મણ ટાઉનશીપ ખાતે પોતાની પરિણીત પ્રેમિકાને મળવા આવ્યો હતો. બનાવની રાત્રે મનીષ પોતાની પરિણીત પ્રેમિકાને તેના ફ્લેટ ઉપર મળવા આવ્યો હતો. પરંતુ અચાનક જ પરિણીત પ્રેમિકાનો પતિ ઘરે આવી પહોંચતા પોતે ગભરાઈ ગયો હતો. તેમજ ફ્લેટના ચોથા માળે આવેલી ગેસ પાઇપલાઇન પકડીને નીચે ઉતરવાનો પ્રયાસ કરી રહ્યો હતો. દરમિયાન પાઇપ પરથી મનીષની પકડ છૂટી જતાં તે સીધો નીચે પટકાયો હતો. જેના કારણે તેનું મૃત્યુ થયું હોવાનું હાલ અનુમાન લગાવવામાં આવી રહ્યું છે.
મળતી વિગત અનુસાર, પરિણીત પ્રેમિકાનો પતિ જ્યારે તેના ઘરે પહોંચ્યો હતો. ત્યારે પોતાના ફ્લેટમાંથી પોતાની પત્ની સાથે કોઈ પુરુષ વાતચીત કરી રહ્યો હોવાની તેને શંકા ગઈ હતી. જેના કારણે તેણે ઘર તેમજ બાલ્કની સહિતના ભાગમાં તપાસ કરી હતી. ત્યારે બાલ્કનીના ભાગે મહિલાના પતિએ તપાસ કરવા જતાં મનીષે ગેસની પાઇપલાઇન પરથી પોતાની પકડ ગુમાવી હતી. બનાવની રાત્રીએ મહિલાનો પતિ ભજનમાં ગયો હતો. જોકે વીજળી ગુલ થતાં તે પોતે વહેલો પરત આવી ગયો હતો. ત્યારે વહેલો પરત આવતાં પત્ની અને તેના પ્રેમીનો ભાંડો ફૂટી ગયો હતો.
