રાજકોટ: ઇન્સ્ટાગ્રામ પર પાંગર્યો પ્રેમ, 21 વર્ષીય મધ્યપ્રદેશની યુવતી 17 વર્ષના સગીરને ભગાડી રાજકોટના જેતપુર તાલુકાના પીઠડીયા ગામના 17 વર્ષીય સગીર સાથે મધ્ય પ્રદેશની એક 21 વર્ષની યુવતીને પ્રેમ થઈ જતા તેને ભગાડી ગઈ હતી. જેને પગલે તેના છોકરાના પિતાએ અજાણ્યા વ્યક્તિ વિરુદ્ધ રાજકોટ જિલ્લાના વીરપુર પોલીસ સ્ટેશનમાં કલમ 137 (2) મુજબ ગુનો નોંધાવ્યો હતો. વીરપુર પોલીસ ટેકનિકલ સર્વેલન્સના માધ્યમથી સગીર અને તેની 21 વર્ષીય પ્રેમિકાને સુરતથી ઝડપી લાવી છે. યુવતી અને સગીરની મુલાકાત ઇન્સ્ટાગ્રામ પર થઈ હતી અને સમય જતાં બંને વચ્ચે પ્રેમ પાંગર્યો હતો.
જો કે ત્યાર બાદ વીરપુર પોલીસ બંનેને સુરતથી લાવી હતી અને સગીરને તેના માતા-પિતાને સોંપી દેવામાં આવ્યો હતો. પોલીસે 21 વર્ષીય પ્રેમિકાની અટકાયત કરી તેનું નિવેદન લીધું હતું, અને તેને નોટિસ પણ આપવામાં આવી હતી. ઇન્વેસ્ટિગેશન ઓફિસર એસ. જી. રાઠોડે જણાવ્યું કે 21 વર્ષીય આરોપી મહિલા મધ્યપ્રદેશના જાંબુવા જિલ્લાની વતની છે.
યુવતી અને સગીર યુવક છેલ્લા દોઢ વર્ષથી એકબીજાના સંપર્કમાં હતા. બંને ઇન્સ્ટાગ્રામ મારફતે સંપર્કમાં આવ્યા હતા. પોલીસ તપાસમાં જાણવા મળ્યું કે મહિલા ખેત મજૂરી કરે છે. હાલ તે અમરેલી જિલ્લાના બાબરા પંથકમાં ખેત મજૂરી કરે છે. બંને વચ્ચે પ્રેમ પાંગર્યાં બાદ યુવતીએ તેના સગીર પ્રેમી સાથે ભાગી જવાનો પ્લાન ઘડ્યો હતો. જે પ્રમાણે મહિલા ગોંડલ આવી હતી અને સગીર યુવક પણ પોતાના ગામથી ગોંડલ પહોંચ્યો હતો, જ્યાંથી બંને બસમાં બેસીને સુરત પહોંચ્યા હતા.
પ્રાથમિક તપાસમાં જાણવા મળ્યું કે, સગીર ITIમાં અભ્યાસની સાથે સાથે પેટ્રોલ પંપ પર ફિલરમેન તરીકે નોકરી કરતો હતો. ગાયબ થયા બાદ તેણે પોતાનો મોબાઈલ સ્વીચ ઓફ કરી દીધો હતો અને પોતાની માતાને ઇન્સ્ટાગ્રામ પર મેસેજ કરીને જણાવ્યું કે તેની મોટરસાયકલ ગોંડલ બસ સ્ટેશનમાં છે. જે બાદ પોલીસે તપાસ કરીને હાલ સગીર અને તેની 21 વર્ષીય પ્રેમિકાને સુરતથી ઝડપી લાવી છે, ત્યારે આ મામલો હાલ ચર્ચાનો વિષય બન્યો છે.
