લંડન : યુકેમાં સેટલ થવા માગતા હોવ એટલે કે નાગરિકતા મેળવવા માગતા લોકો માટે એક ખૂબ મહત્વના સમાચાર આવ્યા છે જેમાં હવે યુકે તંત્ર દ્વારા નાગરિકત્વના નિયમોમાં ફેરફાર કરવાની તૈયારીઓ ચાલુ કરી દેવામાં આવી છે.
યુકે પીએમ કીર સ્ટાર્મરે ટૂંક સમયમાં નવી નાગરિકતા નીતિ લાગુ કરવાની જાહેરાત કરી છે. તેમણે કહ્યું કે હવે લોકો માટે બ્રિટિશ નાગરિકતા મેળવવી સરળ રહેશે નહીં. બ્રિટિશ સરકાર નાગરિકતા નિયમોમાં ફેરફાર કરી રહી છે. નવી નાગરિકતા નીતિ અમલમાં આવ્યા પછી લોકોને બ્રિટિશ નાગરિકતા મેળવવા માટે 10 વર્ષ રાહ જોવી પડશે.
મહત્વનું છે કે, પીએમ સ્ટાર્મરે મીડિયા બ્રીફિંગમાં સ્પષ્ટ કર્યું કે લોકોએ નવા નિયમોનું કડક પાલન કરવું પડશે. નવી નાગરિકતા નીતિ લાગુ કરવાનો ઉદ્દેશ્ય આગામી 5 વર્ષમાં ઇમિગ્રેશનની સંખ્યામાં ઘટાડો કરવાનો છે. નવી નીતિ વિશ્વના તમામ દેશો માટે છે. આમાં કોઈપણ દેશને કોઈ રાહત, મુક્તિ કે અનામત આપવામાં આવશે નહીં. પાછલી સરકારે સરહદ ખુલ્લી રાખી હતી અને દરેકને આવવાની મંજૂરી આપી હતી, પરંતુ હવે અમે સ્થળાંતર અને ઇમિગ્રેશનને નિયંત્રિત કરીશું.
આ બાબતે પીએમ સ્ટાર્મરે કહ્યું હતું કે, નવી સિસ્ટમ લાગુ થયા પછી બ્રિટનમાં ૫ વર્ષ રહ્યા પછી નાગરિકતા મેળવવાની સિસ્ટમનો અંત આવશે. નવા નિયમો અનુસાર, બ્રિટિશ નાગરિકતા ફક્ત તે લોકોને જ આપવામાં આવશે જેઓ બ્રિટનમાં ઓછામાં ઓછા 10 વર્ષ વિતાવે છે. દેશના અર્થતંત્ર અને સામાજિક વિકાસમાં ફાળો આપશે. નર્સો, ડોક્ટરો, એન્જિનિયરો વગેરે માટે ટૂંક સમયમાં નાગરિકતાનો વિચાર કરવામાં આવશે, પરંતુ બાકીના લોકોએ નવા નિયમોનું પાલન કરવું પડશે.
ઉલ્લેખનીય છે કે યુકેમાં જ્યારે સ્ટારમર સરકારને તેની રચના થઈ ત્યારથી જ ઇમિગ્રેશન પ્રત્યે વધતા અસંતોષનો સામનો કરવો પડ્યો છે. ઇમિગ્રેશન વિરોધીઓ માને છે કે ઇમિગ્રેશનથી જાહેર સેવાઓ પર દબાણ આવ્યું છે અને દેશના કેટલાક ભાગોમાં વંશીય તણાવ વધ્યો છે. આ અસંતોષ અને વંશીય તણાવ ઘટાડવા માટે, એક નવી નાગરિકતા નીતિ ઘડવામાં આવી છે. તેના અમલીકરણ પછી શરૂઆતની અસર જાેયા પછી નીતિના નિયમોમાં સુધારો કરવામાં આવશે.
જે નિયમોમાં ફેરફાર આવી શકે તેમ છે:-
- પીએમ સ્ટાર્મરે જણાવ્યું હતું કે બ્રિટિશ ગૃહ પ્રધાન યવેટ કૂપર હાઉસ ઓફ કોમન્સમાં શ્વેતપત્ર રજૂ કરશે. જેમાં સ્વાસ્થ્ય અને સારસંભાળ માટેના વિઝાને બંધ કરવાનો પ્રસ્તાવ મૂકાશે જેથી વિદેશમાંથી સારસંભાળ માટે આવનારા કર્મચારીઓની સંખ્યામાં અંકુશ લાવી શકાય.
- કુશળ કામદારો માટે લઘુત્તમ લાયકાતની જરૂરિયાતને ગ્રેજ્યુએશન સ્તર સુધી વધારવા માટે એક દરખાસ્ત રજૂ કરવામાં આવશે.
- કુશળ કામદારો માટે વિઝા નિયમો કડક કરવામાં આવશે.
- તેમના માટે લઘુત્તમ વેતન મર્યાદા પણ વધારવામાં આવશે.
- ભારત સહિત વિશ્વભરના વિદ્યાર્થીઓ માટે, ડિગ્રી પૂર્ણ કર્યા પછી વર્ક વિઝા પર રહેવાનો સમયગાળો ૨૪ મહિનાથી ઘટાડીને ૧૮ મહિના કરવામાં આવશે.
