જો તમારા વિસ્તારમાં પાઇપ દ્વારા મળતી નેચરલ ગેસ એટલે કે PNG સુવિધા શરૂ થઈ ગઈ હોય, તો આ સમાચાર તમારા માટે ખૂબ જ મહત્વપૂર્ણ છે. સરકારે મોટો નિર્ણય લઈ સ્પષ્ટ કર્યું છે કે જ્યાં પાઇપલાઇન પહોંચી ગઈ છે, ત્યાં રહેતા લોકોને હવે LPG ગેસ સિલિન્ડર પરની નિર્ભરતા છોડવી પડશે. જો તમે 3 મહિનાની અંદર PNG કનેક્શન નહી લો, તો તમારા ઘેર આવતી LPG સિલિન્ડરની સપ્લાય બંધ કરી દેવામાં આવશે.
આ નિર્ણય કેમ લેવાયો?
CNN-News18 અનુસાર, સરકારે ‘પેટ્રોલિયમ અને પ્રાકૃતિક ગેસ વિતરણ આદેશ, 2026’ હેઠળ આ પગલું લીધું છે. તેના પાછળ બે મુખ્ય કારણો છે:
સપ્લાયમાં મુશ્કેલી: પશ્ચિમ એશિયામાં ચાલી રહેલા યુદ્ધ અને હોર્મુઝ જળ માર્ગ (Strait of Hormuz)માં અવરોધને કારણે LPGની વૈશ્વિક સપ્લાય પર અસર પડી છે.
ઇંધણ સુરક્ષા: સરકારે શહેરોમાં પાઇપલાઇનનો વ્યાપ વધારીને સિલિન્ડર પરની નિર્ભરતા ઘટાડવાનો નિર્ણય કર્યો છે, જેથી બચેલા સિલિન્ડરોને તેવા ગામોમાં પહોંચાડી શકાય જ્યાં હજી પાઇપલાઇન નથી.
નિયમોમાં શું ખાસ છે?
- 3 મહિનાની મુદત: PNG સુવિધા ઉપલબ્ધ થયા બાદ જો કોઈ ઘર કનેક્શન લેતું નથી, તો જાણ કર્યા પછી 3 મહિનામાં તેની LPG સપ્લાય બંધ થઈ જશે.
- NOCનો વિકલ્પ: જો ટેકનિકલ કારણોસર તમારા ઘરે પાઇપલાઇન લગાવી શકાતી નથી, તો વિભાગ તમને NOC આપશે અને આવી સ્થિતિમાં તમારો LPG સિલિન્ડર ચાલુ રહેશે.
- સોસાયટીઓ માટે નિયમ: હાઉસિંગ સોસાયટી અથવા કોમ્પ્લેક્સના માલિકોને પાઇપલાઇન માટે 3 કાર્યદિવસમાં મંજૂરી આપવી ફરજિયાત રહેશે, તેઓ ના પાડી શકશે નહીં.
PNGના ફાયદા
સરકાર લોકો PNG અપનાવે તે માટે પ્રોત્સાહન આપી રહી છે, કારણ કે:
- સિલિન્ડર બુકિંગ અથવા રિફિલ કરવાની ઝંઝટ નથી.
- ગેસ સીધી પાઇપ મારફતે રસોડા સુધી પહોંચે છે અને સતત સપ્લાય રહે છે.
- સિલિન્ડર કરતા વધુ સુરક્ષિત અને આધુનિક માનવામાં આવે છે.
અફવાઓથી સાવધાન રહો
સોશિયલ મીડિયામાં ચાલી રહેલી કેટલીક ખોટી ખબરને સરકારે સંપૂર્ણપણે નકારી કાઢી છે. તેમાં કહેવામાં આવતું હતું કે ગેસ સિલિન્ડર બુકિંગના નિયમોમાં ફેરફાર થયો છે, જે ખોટું છે.
મંત્રાલયે સ્પષ્ટ કર્યું છે કે પ્રધાનમંત્રી ઉજ્જવલા યોજના (PMUY) અને સામાન્ય ગ્રાહકો માટે બુકિંગના નિયમોમાં કોઈ બદલાવ કરવામાં આવ્યો નથી. શહેરોમાં 25 દિવસ અને ગામડાંમાં 45 દિવસ બાદ જ આગામી રિફિલ બુક કરી શકાય છે.
સરકારે લોકોને અપીલ કરી છે કે ગભરાટમાં આવીને (Panic Booking) સિલિન્ડર બુક ન કરે, કારણ કે દેશમાં ગેસનો પૂરતો જથ્થો ઉપલબ્ધ છે.
