મહારાષ્ટ્રના નાગપુર જિલ્લામાં હોળીના ઉત્સાહ વચ્ચે એક ચોંકાવનારી અને હૃદયદ્રાવક ઘટના સામે આવી છે. નાગપુરના કોરાડી વિસ્તારમાં ગુસ્સામાં એક દાદીએ પોતાના ચાર વર્ષના પૌત્ર પર ગરમ પાણી ફેંકી દીધું. આ ઘટનામાં 4 વર્ષનો ઓમ હરીશ વાંગે ગંભીર રીતે દાઝી ગયો છે અને હાલમાં તેનો એક ખાનગી હોસ્પિટલમાં સારવાર ચાલી રહી છે.
મળતી માહિતી મુજબ ઓમ ઘરની બહાર પિચકારીથી રંગે રમી રહ્યો હતો. તે દરમિયાન તેની દાદી સિંધુ ઠાકરે હોળીના લાકડા પર ગરમ કરેલું પાણી બાલ્ટીમાં ભરીને ઘરમાં લઈ જઈ રહી હતી. એ જ સમયે ઓમે પિચકારીમાંથી રંગ દાદીના પર ઉડાડ્યો હતો.
महाराष्ट्र के नागपुर में एक बुजुर्ग महिला ने अपने 4 साल के पोते ओम हरीश वांगे पर उबलता पानी डाल दिया, क्योंकि छोटा बच्चा जिसने उस पर रंग छिड़का था. बच्चे की हालत गंभीर बताई जा रही है. pic.twitter.com/Kk5KXMqWkR
— Shelja Pandey (@Sheljapandey21) March 5, 2026
આ અચાનક બનેલી ઘટનાથી ગુસ્સે ભરાયેલી દાદીએ તરત જ હાથમાં રહેલી ગરમ પાણીની બાલ્ટી ઓમ પર ઢોળી દીધી. ઉકળતું પાણી શરીર પર પડતા જ ઓમ બળતરાથી ચીસો પાડવા લાગ્યો. ઉકળતા પાણીથી તેના કમરથી નીચેનો ભાગ ગંભીર રીતે દાઝી ગયો. બાળકની ચીસો સાંભળી પરિવારના સભ્યો તરત જ ત્યાં દોડી આવ્યા.
પછી પોતાની ભૂલનો અહેસાસ થતા દાદીએ તરત જ બાલ્ટીમાંથી ઠંડું પાણી લઈને ઓમના શરીર પર ઢોળ્યું. પરિવારના અન્ય સભ્યોએ પણ ઠંડું પાણી નાખીને પ્રાથમિક સારવાર આપવાનો પ્રયાસ કર્યો. પરંતુ ઈજા ગંભીર હોવાથી ઓમને તાત્કાલિક એક ખાનગી હોસ્પિટલમાં દાખલ કરવામાં આવ્યો.
આ સમગ્ર ઘટના ઘરની બહાર લાગેલા સીસીટીવી કેમેરામાં કેદ થઈ ગઈ છે અને તેનો વીડિયો હાલમાં સોશિયલ મીડિયા પર વાયરલ થઈ રહ્યો છે. ઘટનાને લઈને વિસ્તારમાં દુખ અને રોષ વ્યક્ત કરવામાં આવી રહ્યો છે.
આ દરમિયાન પોલીસે સીસીટીવી ફૂટેજના આધારે તપાસ શરૂ કરી છે અને સંબંધિત દાદી સામે કડક કાર્યવાહી કરવાની માંગ ઉઠી રહી છે. એક નિર્દોષ બાળક સાથે બનેલી આ અમાનવીય ઘટનાએ સમાજને ઝંઝોળી નાખ્યો છે અને તહેવારો દરમિયાન પણ સંયમ અને સંવેદનશીલતા રાખવાની જરૂરિયાત પર ભાર મૂક્યો છે.
