નાબાર્ડના ૪૪મા સ્થાપના દિવસ નિમિત્તે, અમદાવાદ ખાતે આયોજિત કાર્યક્રમમાં માનનીય રાજ્યસભા સાંસદ શ્રીમતી રમીલાબેન બારા મુખ્ય અતિથિ હતા અને ‘યોજક’ના અધ્યક્ષ, વરિષ્ઠ સામાજિક કાર્યકર ડૉ. ગજાનન ડાંગે ખાસ અતિથિ તરીકે હાજર રહ્યા હતા.
રાજ્યસભાના માનનીય સાંસદ શ્રીમતી રમીલાબેન બારાએ જણાવ્યું હતું કે નાબાર્ડના સ્થાપના દિવસની ઉજવણી ગ્રામીણ ભારતના વિકાસનો ઉત્સવ છે. તેમણે કહ્યું કે માનનીય પ્રધાનમંત્રીના નેતૃત્વમાં, યુવાનો, મહિલાઓ, ખેડૂતો અને ગરીબો – આ ચાર સ્તંભોને ધ્યાનમાં રાખીને નીતિ નિર્માણ કરવામાં આવી રહ્યું છે. શ્રીમતી રમીલાબેને નાબાર્ડના વોટરશેડ, વાડી, એસએચજી, એફપીઓ વગેરે કાર્યક્રમોની પ્રશંસા કરી અને કહ્યું કે તેના જિલ્લા વિકાસ મેનેજરો દ્વારા, નાબાર્ડ સમગ્ર ભારતમાં પાયાના કામમાં સામેલ છે. સરકાર ગરીબોને આત્મનિર્ભર બનાવવા માટે ઘણી યોજનાઓ ચલાવી રહી છે અને આ સંદર્ભમાં, નાબાર્ડ પાસે એવી દિશા છે જેના દ્વારા ગ્રામીણ ભારતની સ્થિતિ સકારાત્મક રીતે બદલી શકાય છે.
‘યોજક’ના ચેરમેન ગજાનન ડાંગેએ નાબાર્ડ સ્ટાફને સ્થાપના દિવસ પર અભિનંદન આપતા જણાવ્યું હતું કે ભારત ગામડાઓનો દેશ છે અને છેલ્લા ચાર દાયકામાં, નાબાર્ડ આ ગામડાઓની જીવાદોરી બની ગયું છે. ૧૯૯૩ થી નાબાર્ડ સાથે સંકળાયેલા હોવાનો પોતાનો અનુભવ શેર કરતા શ્રી ડાંગેએ કહ્યું કે નાબાર્ડ એક એવી સંસ્થા છે જે વ્યાવસાયિકતાની સાથે ભારતીય મૂલ્યોનું પણ પાલન કરે છે. તેમણે કહ્યું કે નાબાર્ડના પાયલોટ પ્રોજેક્ટ્સ જેમ કે એસએચજી, એફપીઓ , વોટરશેડ વગેરે ખૂબ જ સફળ રહ્યા છે અને ત્યારબાદ તેનો મોટા પાયે અમલ કરવામાં આવ્યો છે.
ગુજરાતના વિવિધ પ્રદેશોમાંથી બેંકો અને કૃષિ સંસ્થાઓના પ્રતિનિધિઓનું સ્વાગત કરતા શ્રી બી કે સિંઘલે જણાવ્યું હતું કે નાબાર્ડ તેમને પોતાના ગ્રાહકો તરીકે નહીં પરંતુ પોતાના ભાગીદારો તરીકે માને છે અને આ ભાગીદારીના આધારે, નાબાર્ડ ગ્રામીણ સમૃદ્ધિ માટે પ્રતિબદ્ધ છે. શ્રી સિંઘલે જણાવ્યું હતું કે ઘણા કારણોસર, ખેતી પ્રવૃત્તિઓમાં મહિલાઓની ભાગીદારી વધી રહી છે. ખેતીનું સ્ત્રીકરણ થયું છે, પરંતુ ખેતીની માલિકીના સ્ત્રીકરણ, ગ્રામીણ લોનના સ્ત્રીકરણ અને ઉત્પાદક જૂથોના સ્ત્રીકરણ (FPO, OFPO) માટે આપણે ઘણી લાંબી મજલ કાપવાની છે. જ્યાં સુધી મહિલાઓ સશક્ત નહીં થાય ત્યાં સુધી વિકાસ સમાવિષ્ટ અને સંતુલિત નહીં થાય.
આ પ્રસંગે, ‘એક પેડ મા કે નામ’ થીમ પર વૃક્ષારોપણ કરવામાં આવ્યું હતું અને મહેમાનોએ નાબાર્ડના એફપીઓ કાર્યક્રમ સાથે સંકળાયેલા ખેડૂત ઉત્પાદક સંગઠનો અને આદિવાસી વિકાસ કાર્યક્રમના લાભાર્થી સમુદાયો દ્વારા મૂકવામાં આવેલા પ્રદર્શનની મુલાકાત લીધી હતી અને તેમને વ્યવસાય વિકાસ સૂચનો આપ્યા હતા. નાબાર્ડ દ્વારા વિવિધ શ્રેણીઓમાં શ્રેષ્ઠ પ્રદર્શન કરતી સહકારી બેંકો અને સહકારી મંડળીઓને પણ સન્માનિત કરવામાં આવ્યા હતા.
