કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેને સંગરુરની એક અદાલતે માનહાનિના કેસમાં સમન્સ પાઠવ્યા છે. સંગરુરમાં હિન્દુ સુરક્ષા પરિષદ બજરંગ દળ હિંદના હિતેશ ભારદ્વાજે સ્થાનિક કોર્ટમાં તેમની સામે માનહાનિનો કેસ દાખલ કર્યો હતો. એવો દાવો કરવામાં આવે છે કે કોંગ્રેસ અધ્યક્ષે કર્ણાટક ચૂંટણી દરમિયાન બજરંગ દળ પર ‘અપમાનજનક ટિપ્પણી’ કરી હતી. કથિત અપમાન બદલ બજરંગ દળ હિંદે તેમની પાસેથી ૧૦૦ કરોડ રૂપિયાની માંગણી કરી છે. સંગરુર સિવિલ જજ (વરિષ્ઠ વિભાગ) રમનદીપ કૌરે કોંગ્રેસ અધ્યક્ષને ૧૦ જુલાઈએ હાજર થવા કહ્યું છે. હિતેશે દાવો કર્યો હતો કે કોંગ્રેસના પ્રમુખ મલ્લિકાર્જુન ખડગેએ બજરંગ દળની તુલના “રાષ્ટ્ર વિરોધી સંગઠન” સાથે કરી હતીપ અને કર્ણાટકમાં સરકાર બને તો બજરંગ દળ પર પ્રતિબંધ મૂકવાની વાત કરી હતી. વિહિપની યુવા પાંખએ દાવો કર્યો છે કે કોંગ્રેસે મેનિફેસ્ટોના પેજ નંબર ૧૦ પર બજરંગ દળ પર પ્રતિબંધ મૂકવાનું વચન આપ્યું છે. એવો દાવો કરવામાં આવે છે કે કોંગ્રેસ અધ્યક્ષે બજરંગ દળની તુલના પ્રતિબંધિત સંગઠન પીએફઆઇ અને સ્ટુડન્ટ ઈસ્લામિક મૂવમેન્ટ્સ ઑફ ઈન્ડિયા સાથે કરી હતી.
વિહિપના ચંદીગઢ યુનિટે ૪ મેના રોજ કોંગ્રેસ અધ્યક્ષને કાનૂની નોટિસ મોકલીને વિહિપ અને બજરંગ દળને ૧૪ દિવસની અંદર ૧૦૦ કરોડ રૂપિયા ચૂકવવા જણાવ્યું હતું. કર્ણાટક વિધાનસભા ચૂંટણીમાં કોંગ્રેસે વચન આપ્યું છે કે જો તે સત્તામાં આવશે તો સરકાર નિર્ણાયક પગલાં લેશે અને પીએફઆઇ, બજરંગ દળ જેવા સંગઠનો પર પ્રતિબંધ લગાવશે. કોંગ્રેસના ઘોષણાપત્રમાં કહેવામાં આવ્યું છે કે પીએફઆઈ અને બજરંગ દળ જેવા સંગઠનો જાતિ અને ધર્મના આધારે સમાજમાં નફરત ફેલાવી રહ્યા છે. મેનિફેસ્ટો જાહેર થયા બાદ બજરંગ દળે કર્ણાટક સહિત અન્ય રાજ્યોમાં વિરોધ પ્રદર્શન કર્યું હતું.કોંગ્રેસ અધ્યક્ષ મલ્લિકાર્જુન ખડગેએ આ વિવાદ પર ટિપ્પણી કરવાનો ઇનકાર કર્યો હતો. એક સવાલના જવાબમાં તેમણે કહ્યું કે પાર્ટીએ તેનો જવાબ આપી દીધો છે. જ્યારે પાર્ટીએ સ્પષ્ટ કરી દીધું છે કે, ‘હું આ અંગે કોઈ અભિપ્રાય આપવા માંગતો નથી.’ પાર્ટીનો મેનિફેસ્ટો ખુદ ખડગેની હાજરીમાં બહાર પાડવામાં આવ્યો હતો.
