દેશભરમાં LPG ગેસના પુરવઠાને લઈને છેલ્લા કેટલાક દિવસોથી ચર્ચા વધી રહી છે. કેટલાક વિસ્તારોમાં લોકો જરૂરિયાત કરતાં વધુ ગેસ સિલિન્ડર બુક કરાવીને ઘરે સંગ્રહ કરી રહ્યા હોવાના અહેવાલો સામે આવ્યા છે. જોકે સરકાર અને ગેસ કંપનીઓએ સ્પષ્ટ કર્યું છે કે દેશમાં LPG ગેસનો પુરવઠો સંપૂર્ણપણે સામાન્ય છે અને ગભરાવાની કોઈ જરૂર નથી.
સરકારી માહિતી મુજબ, દેશભરમાં દરરોજ લગભગ 50 લાખથી વધુ LPG ગેસ સિલિન્ડર ગ્રાહકો સુધી પહોંચાડવામાં આવે છે. સામાન્ય રીતે ગ્રાહક દ્વારા બુકિંગ કરાયા પછી બે થી ત્રણ દિવસમાં સિલિન્ડર ડિલિવરી થઈ જાય છે. તેમ છતાં કેટલાક વિસ્તારોમાં ગેસના કાળાબજાર અને સંગ્રહખોરીની ફરિયાદો સામે આવી રહી છે. ઉત્તર પ્રદેશમાં તાજેતરમાં એક રાજકારણીના ઘરેથી 55 ગેસ સિલિન્ડર મળી આવ્યા હોવાની ઘટના પણ સામે આવી હતી, જેના બાદ વહીવટીતંત્ર દ્વારા કાર્યવાહી કરવામાં આવી હતી.
ઘરમાં કેટલા LPG સિલિન્ડર રાખી શકાય?
ઘરેલુ ગેસ કનેક્શન ધરાવતા ગ્રાહકો માટે નિયમો અનુસાર સામાન્ય રીતે બે 14.2 કિલોના LPG સિલિન્ડર રાખવાની મંજૂરી હોય છે. તેમાં એક સિલિન્ડર રસોડામાં ઉપયોગ માટે હોય છે, જ્યારે બીજો સિલિન્ડર બેકઅપ તરીકે રાખવામાં આવે છે. જ્યારે પહેલું સિલિન્ડર ખાલી થઈ જાય ત્યારે ગ્રાહક બીજા સિલિન્ડરનો ઉપયોગ કરી શકે છે અને તે જ સમયે નવું સિલિન્ડર બુક કરી શકે છે.
આ સિસ્ટમથી ગ્રાહકોને ગેસની અછતનો સામનો કરવો ન પડે અને વધારાના સિલિન્ડર સંગ્રહ કરવાની જરૂર પણ રહેતી નથી. મોટાભાગની ગેસ કંપનીઓના ઘરેલુ કનેક્શનમાં આ નિયમ લાગુ પડે છે.
ક્યારે સંગ્રહખોરી ગણાય?
જો કોઈ વ્યક્તિ સામાન્ય જરૂરિયાત કરતાં વધારે ગેસ સિલિન્ડર એકઠા કરે છે અથવા ઘર, દુકાન કે ગોડાઉનમાં મોટા પ્રમાણમાં ભરેલા સિલિન્ડર સંગ્રહિત કરે છે તો તેને સંગ્રહખોરી ગણવામાં આવી શકે છે. ઘરેલુ LPG સિલિન્ડરનો વ્યાપારી ઉપયોગ કરવો, વધારે કિંમતે વેચવાનો પ્રયાસ કરવો અથવા બુકિંગ નિયમોનો દુરુપયોગ કરવો પણ નિયમોનું ઉલ્લંઘન ગણાય છે.
નિયમ ભંગ કરનાર સામે થઈ શકે છે કાર્યવાહી
ભારતમાં LPG ગેસને આવશ્યક ચીજવસ્તુ તરીકે વર્ગીકૃત કરવામાં આવ્યો છે. તેથી કાળાબજાર અથવા ગેરકાયદેસર સંગ્રહ ગંભીર ગુનો માનવામાં આવે છે. જો કોઈ વ્યક્તિ નિયમોનો ભંગ કરીને વધારે સિલિન્ડર સંગ્રહ કરે છે તો વહીવટીતંત્ર વધારાના સિલિન્ડર જપ્ત કરી શકે છે અને સંબંધિત વ્યક્તિ સામે કેસ પણ નોંધાઈ શકે છે. કાયદા મુજબ આવા કેસોમાં ત્રણ મહિનાથી લઈને સાત વર્ષ સુધીની જેલ સજા તેમજ દંડની જોગવાઈ છે.
