પેટ કમિન્સના ઇજાગ્રસ્ત થવાના કારણે સનરાઈઝર્સ હૈદરાબાદે ઈશાન કિશનને તાત્કાલિક કેપ્ટન તરીકે નિયુક્ત કર્યો છે. કમિન્સ ઈજાના કારણે ટુર્નામેન્ટના શરૂઆતના કેટલાક મેચોમાં રમવા માટે ઉપલબ્ધ નહીં હોય, તેથી ટીમના નેતૃત્વમાં ફેરફાર કરવામાં આવ્યો છે. ઈશાન કિશન ટીમના કપ્તાન રહેશે જ્યારે અભિષેક શર્મા વાઇસ કેપ્ટન તરીકે જવાબદારી સંભાળશે.
ઈશાન કિશન કપ્તાન બનતા જ ઇન્ડિયન પ્રીમિયર લીગના ઈતિહાસમાં એક અનોખો સંયોગ બન્યો છે. પ્રથમ વખત એવું બનશે કે આઈપીએલની તમામ 10 ટીમોના કપ્તાન ભારતીય ખેલાડીઓ હશે. અગાઉ ક્યારેય આવું બન્યું નહોતું.
ગત બે સીઝનની વાત કરીએ તો 2024માં ફાફ ડુ પ્લેસિસ અને પેટ કમિન્સ વિદેશી ખેલાડી તરીકે અનુક્રમે રોયલ ચેલેન્જર્સ બેંગલુરુ અને સનરાઈઝર્સ હૈદરાબાદની આગેવાની કરી રહ્યા હતા. જ્યારે 2025માં પેટ કમિન્સ એકમાત્ર વિદેશી કપ્તાન હતા.
હવે પેટ કમિન્સ ઈજાના કારણે શરૂઆતના કેટલાક મેચ રમશે નહીં, તેથી આઈપીએલ 2026ના ટ્રોફી ફોટોશૂટમાં તમામ 10 ટીમોના કપ્તાન ભારતીય જોવા મળશે.
આઈપીએલ 2026માં ટીમોના કપ્તાન
રોયલ ચેલેન્જર્સ બેંગલુરુ – રજત પાટિદાર
મુંબઈ ઇન્ડિયન્સ – હાર્દિક પંડ્યા
ચેન્નાઈ સુપર કિંગ્સ – ઋતુરાજ ગાયકવાડ
પંજાબ કિંગ્સ – શ્રેયસ અય્યર
કોલકાતા નાઈટ રાઈડર્સ – અજિંક્ય રહાણે
લખનૌ સુપર જાયન્ટ્સ – ઋષભ પંત
રાજસ્થાન રોયલ્સ – રિયાન પરાગ
ગુજરાત ટાઇટન્સ – શુભમન ગિલ
દિલ્હી કેપિટલ્સ – અક્ષર પટેલ
સનરાઈઝર્સ હૈદરાબાદ – ઈશાન કિશન
આ કામ કરનાર એકમાત્ર ટીમ – ચેન્નાઈ સુપર કિંગ્સ
આઈપીએલના ઈતિહાસમાં ચેન્નાઈ સુપર કિંગ્સ એકમાત્ર એવી ટીમ છે જેણે ક્યારેય વિદેશી ખેલાડીને કપ્તાન બનાવ્યો નથી. ટીમની લાંબા સમય સુધી આગેવાની મહેન્દ્રસિંહ ધોનીએ સંભાળી હતી. તેમની ગેરહાજરીમાં ઘણીવાર સુરેશ રૈના કપ્તાન બનતા હતા. ત્યારબાદ રવિન્દ્ર જાડેજાને પણ તક મળી હતી અને હાલમાં ટીમના કપ્તાન તરીકે ઋતુરાજ ગાયકવાડ જવાબદારી સંભાળી રહ્યા છે.
