પોતાની સૈન્ય શક્તિને મજબૂત બનાવતી વખતે, ઈરાને તેના શસ્ત્રોની શક્તિમાં વધુ વધારો કર્યો છે. હાલમાં જ દુનિયાની સામે એક નવું ડ્રોન રજૂ કરતી વખતે ઈરાને કહ્યું છે કે તે ઈઝરાયેલ પર હુમલો કરવા સક્ષમ છે. ઈરાનના સંરક્ષણ મંત્રીએ ઈરાનમાં સંરક્ષણ ઉદ્યોગ દિવસ પર આયોજિત પ્રદર્શનમાં ‘મોહાજેર-૧૦’ ડ્રોનનું અનાવરણ કર્યું હતું.
ઈરાનના રાષ્ટ્રપતિ ઈબ્રાહિમ રાઈસી, ઈસ્લામિક રિવોલ્યુશનરી ગાર્ડ કોર્પ્સના વરિષ્ઠ કમાન્ડર પણ આ કાર્યક્રમમાં હાજર હતા. ઈરાનનું આ નવું ડ્રોન માનવરહિત એટેક એરક્રાફ્ટ છે, જેને અમેરિકા દ્વારા નિર્મિત MQ-૯ રીપરની જેમ ડિઝાઇન કરવામાં આવ્યું છે. આ ડ્રોનનો એક વીડિયો પણ સામે આવ્યો છે, જેમાં મોહજેર-૧૦ અજાણ્યા એરસ્ટ્રીપ પરથી ઉડતો જોઈ શકાય છે. કહેવામાં આવી રહ્યું છે કે આ ડ્રોન અલગ-અલગ પ્રકારના બોમ્બ અને એન્ટી રડાર સાધનો લઈ જવા માટે પણ સક્ષમ છે. શું છે ડ્રોનની વિશેષતા?… મોહજેર ડ્રોનનું પ્રથમ સંસ્કરણ ૧૯૮૦ના દાયકામાં ઇરાક સાથેના આઠ વર્ષના યુદ્ધ દરમિયાન વિકસાવવામાં આવ્યું હતું.
ઈરાની મીડિયા અનુસાર, આ મોહજેરનું નવું વર્ઝન છે. આ ડ્રોન પોતાની સાથે ૩૦૦ કિલો હથિયાર લઈ જઈ શકે છે. તે મહત્તમ ૨૧૦ કિમી પ્રતિ કલાકની ઝડપે ઉડવાની ક્ષમતા સાથે ૪૫૦ લિટર ઇંધણ રાખી શકે છે. સરકારી મીડિયા અનુસાર, ‘મોહાજેર-૧૦’ ડ્રોન આકાશમાં લગભગ ૭૦૦૦ મીટરની ઉંચાઈ પર ઉડી શકે છે, સાથે જ તે લગભગ ૨૦૦૦ કિલોમીટરનું અંતર પણ રોકાયા વિના કાપી શકે છે. ઈરાને એક દિવસ પહેલા તેના નવા ડ્રોનનું અનાવરણ કર્યું હતું, ઈઝરાયેલના વડાપ્રધાન બેન્જામિન નેતન્યાહુએ ઈરાન પર પશ્ચિમમાં હેબ્રોનમાં ઈઝરાયેલીઓ પર ગોળીબાર અને હુમલા માટે જવાબદાર હોવાનો આરોપ લગાવ્યો હતો. તેણે તાજેતરના હુમલા માટે ઈરાનને ફંડિંગ અને પ્રોત્સાહિત કરવા માટે જવાબદાર ઠેરવ્યા હતા. સોમવારે ઈઝરાયેલે ઈરાનના હિતોને નિશાન બનાવીને સીરિયામાં હવાઈ હુમલો કર્યો હતો.
