ઉત્તર પ્રદેશના હાથરસ જિલ્લામાં કૈલાશ નગરમાંથી એક ચોંકાવનારો કિસ્સો સામે આવ્યો છે. આગ્રાની રહેવાસી એક યુવતીના લગ્ન એક મહિના પહેલા એક યુવક સાથે થયા હતા, પરંતુ લગ્નના થોડા જ દિવસો પછી બંને વચ્ચે વિવાદ શરૂ થયો. જણાવાઈ રહ્યું છે કે, પત્ની પતિના શ્યામ રંગ અને શારીરિક સંબંધોને લઈને અસંતુષ્ટ હતી. જેને લઈને તેણે પોતાના પતિ સાથે રહેવાથી ઇનકાર કરી દીધો.
વિવાદ વકરતા બંને પક્ષો પોલીસ સ્ટેશન પહોંચ્યા હતા. જ્યાં પત્નીએ જણાવ્યું કે, હું આગ્રાની રહેવાસી છું, હાથરસમાં મારા લગ્ન કૈલાશ નગરમાં રહેતા એક છોકરા સાથે થયા છે. છોકરો પ્રાઇવેટ કંપનીમાં નોકરી કરે છે. લગ્નને એક મહિનો થઈ ગયો છે. હું પતિથી અસંતુષ્ટ છું. મને પતિ તરફથી ઘણી સમસ્યા છે. એટલે હું તેને છોડવા માગું છું.
આ કેસમાં જ્યારે પતિ સાથે વાત થઈ તો તેણે જણાવ્યું કે, હું અભિષેક સક્સેના કૈલાશ નગરનો રહેવાસી છું અને બેકરીમાં કામ કરું છું. લગ્નને એક મહિનો થયો છે. હું મારી પત્નીને પસંદ નથી એટલે એ મને છોડી રહી છે. અમારા બંનેની સહમતિથી લગ્ન થયા હતા, પણ હવે તે મારી સાથે વાત-વાતમાં ઝઘડા કરે છે. લગ્નમાં અઢી થી 3 લાખ રૂપિયાનો ખર્ચ થયો હતો. પરંતુ લગ્ન તુટી રહ્યાં છે, તો દુઃખ થઈ રહ્યું છે.
પોલીસનું કહેવું છે કે, પતિ-પત્ની પોલીસ સ્ટેશન પહોંચ્યા હતા. પતિ સાથે પત્ની રહેવા માગતી નથી. પોલીસ સ્ટેશનમાં બંને પરિવારો પણ આવ્યા હતા. બંનેને સમજાવવાનો ખૂબ પ્રયત્ન કરવામાં આવ્યો. પરંતુ, પત્ની, પતિ સાથે રહેવા માગતી નથી, આ મામલે આગળ કાર્યવાહી કરવામાં આવી રહી છે.
