બોલિવૂડ એક્ટર ગોવિંદા અંગે છેલ્લા કેટલાક સમયથી ઇન્ટરનેટ પર વિવિધ ચર્ચાઓ અને અફવાઓ વાયરલ થઈ રહી છે. જેના કારણે લાખો લોકો તેમની દરેક નાની-મોટી હરકત પર નજર રાખી રહ્યા છે. કેટલાક લોકો એવો દાવો કરી રહ્યા છે કે એક્ટર આર્થિક તંગીમાંથી પસાર થઈ રહ્યા છે, તેથી તેઓ સ્કૂલ અને નાના-મોટા ઇવેન્ટ્સમાં ડાન્સ કરી રહ્યા છે. આ પ્રકારની અફવાઓ પર ગોવિંદાના ભત્રીજા વિનય આનંદે સવાલ ઉઠાવતા કહ્યું કે આવી વાતો ફેલાય કેવી રીતે?
વિનય આનંદે એક ઇન્ટરવ્યુ દરમિયાન ગોવિંદાની આર્થિક પરિસ્થિતિ વિશે ઉઠતા પ્રશ્નોને સંપૂર્ણપણે અફવા ગણાવ્યા. તેમણે કહ્યું, “તે સુપરસ્ટાર છે. તેઓ જ્યાં પણ ઊભા રહી જાય ત્યાં તેમને 25-30 લાખ રૂપિયા સહેલાઈથી મળી શકે. લોકો તેમને ગરીબ કહી રહ્યા છે – આ લોકો મૂર્ખ છે. કોઈ લખે છે કે ગોવિંદા રસ્તા પર આવી જશે… અરે પાગલો, શું બકવાસ કરી રહ્યા છો? તેઓ 90ના દાયકાના સુપરસ્ટાર છે અને એક ફિલ્મ માટે પણ કરોડો રૂપિયા લેતા હતા.”
ગોવિંદાના ભત્રીજાએ તેમના ગોલ્ડન પિરિયડને યાદ કરતા કહ્યું, “જ્યારે લોખંડવાલામાં 13 લાખમાં ફ્લેટ મળતા હતા, ત્યારે તેઓ એક ફિલ્મ માટે કરોડો રૂપિયા લેતા હતા. તમે કેવી રીતે કહી શકો કે તેઓ રસ્તા પર આવી ગયા છે? તેમની 5 ફિલ્મોએ એટલી કમાણી કરી છે જેટલી કદાચ 70-80 ફિલ્મોએ મળીને પણ નહીં કરી હોય.”
તેમણે આગળ ઉમેર્યું, “કેટલા સ્ટાર્સ હશે જે પૈસા વિના ફરી રહ્યા હશે. તમે એક એવા લેજેન્ડ વિશે આવી મૂર્ખાઈભરી વાતો કેવી રીતે કરી શકો?” વિનયે આવી અફવાઓ પર નિરાશા વ્યક્ત કરતાં કહ્યું, “હું જ્યારે પણ સોશિયલ મીડિયા ખોલું છું ત્યારે ગોવિંદા જ દેખાય છે – આ છે સ્ટારડમ.”
ઉલ્લેખનીય છે કે ગોવિંદા છેલ્લા કેટલાક દિવસોથી પોતાની પત્ની Sunita Ahuja સાથે જોડાયેલા આરોપોને લઈને ચર્ચામાં હતા. ત્યારબાદ તેમનો એક વીડિયો સોશિયલ મીડિયા પર વાયરલ થયો, જેમાં તેઓ એક સ્કૂલ ફંક્શનમાં ડાન્સ કરતા દેખાયા. આ વીડિયો જોઈને અનેક લોકોએ વિવિધ સવાલો ઉઠાવ્યા.
