દુનિયામાં ઘણી એવી ઘટનાઓ બની છે જેને વિજ્ઞાન આજ સુધી સમજાવી શક્યું નથી. પરંતુ શું તમે માનશો કે એક વિમાન હવામાં ગાયબ થયું અને પૂરાં 35 વર્ષ બાદ સુરક્ષિત રીતે લેન્ડ થયું? એ પણ ત્યારે, જ્યારે વિમાનની અંદર એકપણ માણસ જીવતો નહોતો. આજે અમે તમને સેન્ટિયાગો ફ્લાઇટ 513ની એ રહસ્યમય કહાની જણાવવા જઈ રહ્યા છીએ, જેને ઇતિહાસની સૌથી ડરામણી અને રહસ્યમયી ઘટના માનવામાં આવે છે.
વાત છે 4 સપ્ટેમ્બર 1954ની. જર્મનીના એક એરપોર્ટ પરથી સેન્ટિયાગો એરલાઇન્સનું વિમાન ફ્લાઇટ 513 બ્રાઝીલ માટે ઉડાન ભર્યું. આ વિમાનમાં 88 મુસાફરો અને 4 ક્રૂ મેમ્બર, કુલ 92 લોકો સવાર હતા. અચાનક એટલાન્ટિક મહાસાગર ઉપર વિમાનનો સંપર્ક રડારથી તૂટી ગયો. અઠવાડિયાં સુધી શોધખોળ કરવામાં આવી, સમુદ્રનો ખૂણો-ખૂણો ફંફોળી માર્યો, પરંતુ ન તો વિમાન મળ્યું અને ન કોઈ મુસાફર.
12 ઑક્ટોબર 1989ના રોજ બ્રાઝીલના પોર્ટો એલેગ્રે એરપોર્ટ પર અચાનક એક અજાણ્યું વિમાન રડાર પર દેખાયું. તે એક જૂનું લૉકડ સુપર કૉન્સ્ટેલેશન મોડલનું વિમાન હતું, જેનો ઉપયોગ દાયકાઓ પહેલાં બંધ થઈ ગયો હતો. કોઈપણ રેડિયો સંદેશ વિના વિમાનએ રનવે પર એકદમ સચોટ લેન્ડિંગ કરી. જ્યારે એરપોર્ટ સ્ટાફ વિમાન પાસે પહોંચ્યો, ત્યારે ત્યાં સંપૂર્ણ સન્નાટો હતો.
વિમાનની બધી સીટો પર મુસાફરો બેઠેલા હતા, પરંતુ તેઓ માણસ નહીં, કંકાલ બની ગયા હતા. તેમના કપડાં અને સામાન બધું એવું જ હતું, જેમ 1954માં હતું. સૌથી વધુ ચોંકાવનારી બાબત કોકપિટમાં જોવા મળી—ત્યાં પાયલટ કેપ્ટન વિક્ટર સેલેસ્ટાનો કંકાલ પોતાની સીટ પર બેઠેલો હતો અને તેના હાથ હજુ પણ કંટ્રોલ પેનલ પર હતા.
આ ખબર સૌપ્રથમ “વીકલી વર્લ્ડ ન્યૂઝ” નામના અખબારમાં છપાઈ હતી, જે પોતાની બનાવટી અને ખોટી વાર્તાઓ માટે જાણીતું હતું. 1954માં સેન્ટિયાગો એરલાઇન્સ નામની કોઈ કંપની કે ફ્લાઇટ 513 ગુમ થયાનો કોઈ સત્તાવાર સરકારી રેકોર્ડ ઉપલબ્ધ નથી. વિજ્ઞાન કહે છે કે કંકાલ ક્યારેય વિમાનને લેન્ડ કરી શકે નહીં, કારણ કે એ માટે મગજ અને પેશીઓની જરૂર પડે છે.
Santiago Flight 513ની કહાની આજે પણ ઈન્ટરનેટ પર પેરાનોર્મલ વાર્તાઓના શોખીનો વચ્ચે ખૂબ લોકપ્રિય છે. ભલે તેની પાછળ કોઈ પુરાવો ન હોય, પરંતુ આ કહાની વિચારવા મજબૂર કરે છે. હાલ, આ કહાની એક અર્બન લેજન્ડ એટલે કે એક કલ્પિત ડરાવણી વાર્તા જ બની રહી છે.
